Sumampa na sa 10,004 ang bilang ng mga tinamaan ng coronavirus disease (COVID-19) sa Pilipinas.
Ito’y matapos makapagtala ang Department of Health (DOH) ng 320 na bagong impeksiyon nitong nakalipas na 24 oras.
Samantala, pumalo na sa 1,506 ang bilang ng mga gumaling mula sa COVID-19 bunsod ng 98 new recoveries.
Ayon sa ahensya, nasa 658 na ang mga nasawi kasunod ng 21 new deaths na kanilang naitala.
Gagawa ng pelikula sa kalawakan si action star Tom Cruise.
Katunayan, ayon kay Jim Bridenstine, administrator ng National Aeronautics and Space Administration, nakipag-ugnayan na sa kanila si Cruise kaugnay ng movie shot na binabalak nitong gawin sa outer space.
Sa isang tweet, binanggit ni Bridenstine na excited na siyang makatrabaho ang sikat na aktor.
Magiging katuwang din umano ni Cruise ang Tesla at SpaceX sa lilikhaing feature film sa kalawakan.
Halos balik na umano sa normal ang lahat sa South Korea.
Ito’y makaraang buksan na ang mga opisina, museums at libraries nang tanggalin ang lockdown sa pagsadsad ng bilang ng kaso ng coronavirus doon.
Isa ang SoKor sa mga matinding tinamaan ng COVID-19 outbreak pero dahil sa matinding “trace, test and treat” program na ginawa nito ay mabilis nitong nakontrol ang pagkalat ng virus.
Ayon sa Korea Centers for Disease Control, dalawang impeksiyon na lamang ang naitala nila sa kanilang bansa nitong nakalipas na 24 oras.
Makabubuti para sa lahat kung magpapasya ang PBA Board of Governors na kanselahin ang 45th season ng liga dahil sa coronavirus disease (COVID-19) pandemic.
Ito ang binigyang diin ni San Miguel guard Chris Ross sa gitna na rin ng patuloy na pagdami ng bilang ng kaso ng COVID-19 sa bansa.
Ayon sa veteran guard, hindi dapat matuloy ang mga laro ng PBA hangga’t wala pang natutuklasang bakuna laban sa nabanggit na sakit.
Matatandaang inilunsad ang bagong season ng PBA noong Marso 8 pero nakaisang laro lang ito at hindi na ito nasundan pa dahil sa paglaganap ng COVID-19.
Ibinunyag ni Tanzanian President John Magufuli ang umano’y sablay na resulta ng imported coronavirus testing kits matapos umanong magpositibo ang mga samples na nakuha mula sa mga hayop.
Sa isang event sa Chato, binanggit ni Magufuli ang aniya’y “technical errors” sa mga ginawang COVID-19 tests.
Ayon kay Magufuli, sinubukan nilang kumuha ng non-human samples mula sa isang bunga ng native tree na pawpaw, kambing, at tupa kung saan nilagyan nila ito ng mga pangalan ng tao at edad.
Ngunit hindi umano alam ng lab technicians kung saan galing ang mga samples at nagulat na lamang si Magufuli nang magpositibo ang resulta mula sa mga ito.
Giit ni Magufuli, hindi makabubuti sa kanyang nasasakupan ang mga tinatanggap nitong tulong mula sa ibang bansa.
Inihayag ng kampo ni world heavyweight boxing champion Anthony Joshua ng Britanya na handa itong lumaban nang walang manonood nang live sa paligid ng boxing ring.
Ginawa ni promoter Eddie Hearn ang pahayag matapos sabihin ng British Boxing Board of Control (BBBC) na posibleng magkaroon ng professional boxing events simula sa Hulyo nang walang ringside viewers bunsod ng COVID-19 pandemic.
Maliban dito, plano ring limitahan ang event ng hanggang limang laban lamang dahil sa social distancing.
Ang susunod sanang laban ni Joshua ay sa Hunyo 20 kontra Bulgarian Kubrat Pulev pero hindi rin naman ito matutuloy dahil sa krisis.
Matatandaang nabawi ni Joshua ang kanyang IBF, WBA, WBO at IBO belts mula kay Mexican-American Andy Ruiz Jr. sa Saudi Arabia noong December 2019.
Pinangangambahang patay ang 10 sundalo matapos sumabog ang sinasakyan nilang armored vehicle sa northern Sinai sa Egypt.
Ayon kay Army spokesman Tamer Al-Rifai, kasama sa mga nasawi ang ilang opisyal pero hindi niya matiyak kung may mga sugatan din sa insidente.
Wala pang umaakong grupo sa pag-atake na naganap sa banal na buwan ng Ramadan.
Tinatayang mahigit 800 rebel fighters na ang napatay ng Egyptian security forces mula noong 2018 sa Sinai.
Tinatayang walong milyong pamilya ang hindi pa umano nabibigyan ng tulong sa ilalim ng social amelioration program (SAP) ng pamahalaan.
Sa virtual meeting ng Defeat coronavirus disease 2019 (COVID-19) Committee ng Kamara, isiniwalat ni DSWD Sec. Rolando Bautista na nasa 10.1-M households pa lang mula sa target na 18-M pamilya ang nakatanggap ng ayuda.
Sinasabing mula nitong Abril 30, nasa P53.8-B ng first tranche mula sa P100-B na ayuda ang naipamahagi pa lamang sa mga beneficiaries.
Kasama sa mga nakatanggap ng alokasyon ay ang 85% ng 4Ps, 45% ng target TNVS at PUV beneficiaries, at 47% ng non-4Ps na mula sa low-income families.
Hindi naman ipinaliwanag ng DSWD kung bakit hindi nakumpleto ang pamumudmod ng first tranche ng financial aid gayung Abril 17 pa na-i-release ng Budget Department ang nasa P196-B na pondo ng SAP.
Samantala, inaasahang ipapamahagi na ang 2nd tranche ng P100-B ng SAP para sa mga target beneficiaries ngayong Mayo. —Ulat mula kay Jill Resontoc (Patrol 7)
Iminungkahi ni Sub-committee on Social Amelioration Co-Chairperson Lucy Torres-Gomez ang pagpapalawak sa target beneficiaries ng Social Amelioration Program (SAP) para sa buwan ng Mayo ngayong taon.
Sa virtual hearing ng Defeat Covid-19 Committee ng Kamara, mula sa 18-M na target lamang ng SAP, umapela si Gomez na gawing 20 milyon ang mga benepisyaryo.
Ayon kay Gomez, dapat ikonsidera ang aniya’y “newly poor” na napapabilang sa 9-M low-income families at 6.4-M lower middle income families.
Aniya, ang P100-B allocation para sa buwan ng Mayo ay maaring hatiin sa 20-M beneficiaries.
Nangangahulugan lamang ito na magiging uniform na para sa lahat ng beneficiaries ang halaga na makukuha mula sa SAP kung saan magiging P5,000 na ang matatanggap ng lahat ng benepisyaryo.
Kasabay nito, inirekomenda rin ni Torres na simplehan at gawing madali ang proseso sa pagkuha ng ayuda upang mapasama ang lahat ng target beneficiaries. —Ulat mula kay Jill Resontoc (Patrol 7)
Ibinabala ng United Nations na posibleng kumalat sa Yemen ang coronavirus disease (COVID-19).
Ito’y makaraang makapagtala ito ng unang dalawang kaso ng pagkamatay dahil sa nabanggit na sakit.
Karamihan umano sa mga naitatalang kaso ay mula sa lungsod ng Aden kung saan nagkasa na ito ng tatlong araw na curfew.
Kasabay nito, ibinabala rin ng ilang international health officials na lantad sa outbreak ang mga taga-Yemen dahil nawasak sa giyera ang karamihan sa kanilang mga health facilities.