Author

Gilbert Perdez

DWIZ 882

Pooled sampling strategy sa COVID-19 tests iminungkahi

Iminungkahi ni Iloilo Rep. Janette Garin ang paggamit ng pooled sampling strategy upang mapataas pa ang testing capacity ng bansa.

Ayon kay Garin, ang testing method na kanyang tinutukoy ay nangangailangan ng 100,000 kits upang masaklaw at ma-test ang isang milyon katao para sa coronavirus disease (COVID-19).

Samantala, sinabi rin ni Presidential Adviser for Entrepreneurship Joey Concepcion na kapag na-validate na ang pooled testing, gagamitin ang prosesong ito sa pag-test sa maraming industriya tulad ng mga nagtatrabaho sa construction, pabrika, business process outsourcing industry at kahit sa mga overseas Filipino workers.

June 18, 2020 0 comment

HEADLINES NATIONAL NEWS

Walang bagong kaso ng COVID-19 sa mga bilangguan —DOJ

written by Gilbert Perdez

Walang nai-report na bagong kaso ng coronavirus disease 2019 (COVID-19) sa mga bilangguan at penal farms na pinamamahalaan ng Bureau of Corrections (BuCor).

Ito, ayon kay Justice Undersecretary at Spokesperson Markk Perete, ay dahil hindi pa nadagdagan ang 301 cases na naitala (as of June 15).

Sinabi ni Perete na mas maraming kaso sa New Bilibid Prisons (NBP) sa Muntinlupa, kabilang ang 141 persons deprived of liberty at 38 staff personnel.

June 18, 2020 0 comment

RONDA PROBINSYA

‘Buy and sell’ portal para sa mga magsasaka binuksan ng MinDA

written by Gilbert Perdez

Binuksan na ng Mindanao Development Authority (MinDA) ang “MinDATienda Portal” o “Buy & Sell Portal” para sa mga magsasaka at mangingisda sa Lupang Pangako.

Sa isang Facebook post, sinabi ni Secretary Emmanuel Piñol na ipo-post sa www.mindatienda.com ang ilang impormasyon at pagsasama-samahin ang mga orders, kabilang ang pag-proseso ng mga shipment sa labas ng Mindanao.

Ayon kay Piñol, ginawa ang inisyatiba upang matulungan ang mga mangingisda at magsasaka sa pagbebenta ng kanilang mga pinaghirapang produkto, gayundin sa kanilang pagbangon mula sa matinding epekto ng coronavirus disease 2019 (COVID-19) pandemic.

June 18, 2020 0 comment

HEADLINES RONDA PROBINSYA

10 NPA members sa Mindanao nagbalik-loob sa pamahalaan

written by Gilbert Perdez

Nagbalik-loob sa pamahalaan ang 10 miyembro ng New People’s Army (NPA) – kabilang ang tatlong unit leaders – matapos ang sunod-sunod na negosasyon sa South Cotabato sa Mindanao.

Ayon kay Lt. Col. Lino Capellan, tagapagsalita ng Police Regional Office (PRO)-12, kasamang isinuko ng mga rebelde ang kanilang mga armas sa Sitio Datal Kadi, Barangay Tasiman, Lake Sebu.

Samantala, sinabi naman ni PRO-12 Director, Brig. Gen. Michael John Dubria na ang pinakahuling accomplishment ng pulisya ay bahagi ng mga hakbang ng gobyerno sa pagtugon sa internal insurgency sa mapayapang paraan.

June 18, 2020 0 comment

INTERNATIONAL NEWS

Approval rating ni Russian President Vladimir Putin sumadsad

written by Gilbert Perdez

Sumadsad ang approval rating ni Russian President Vladimir Putin dahil sa kasalukuyang krisis na dulot ng coronavirus disease 2019 (COVID-19).

Batay sa pinakahuling survey na isinagawa ng independent research centre na Levada, nakakuha si Putin ng 59% na approval rating na mas mababa sa 69% na nasungkit niya noong Pebrero.

Kabilang umano sa ikinagagalit ng publiko at maging ng kanyang mga tagasuporta ay ang pension reform na isinulong ni Putin, gayundin ang pagbagsak ng presyo ng langis at ang nagbabadyang krisis pang-ekonomiya na pangalawang beses nang nangyari sa Russia sa loob ng 10 taon.

Nabatid na hindi rin nagustuhan ng mga kritiko ang ikinasang pagbabago sa Konstitusyon na magpapanatili kay Putin sa kapangyarihan hanggang 2036.

June 18, 2020 0 comment

NATIONAL NEWS

Compound sa Muntinlupa isinailalim sa extreme localized community quarantine

written by Gilbert Perdez

Isang compound sa Muntinlupa City ang isinailalim sa extreme localized community quarantine (ELCQ) dahil sa mataas na bilang ng mga dinadapuan ng coronavirus disease 2019 (COVID-19).

Sinasabing ginawa ang hakbang kasunod ng matagumpay na localized lockdown sa Morning Breeze sa Alabang.

Ayon kay Public Information Office (PIO) Chief Tez Navarro, ipinag-utos ni Mayor Jaime Fresnedi ang pagsasailalim sa dalawang linggong ELCQ sa Sitio Pagkakaisa Zone 3 Interior na tahanan ng may 26 pamilya at matatagpuan sa Brgy. Sucat sa nabanggit na lungsod.

Nabatid na epektibo ang kautusan mula ika-13 hanggang ika-26 ng Hunyo.

Ayon kay Navarro, (as of June 17) nakapagtala na ang Muntinlupa City Health Office (CHO) ng 17 confirmed cases at apat na recoveries sa Sitio Pagkakaisa.

Samantala, sinabi ni CHO chief Dra. Teresa Tuliao na lahat ng mga aktibong kaso sa sitio ay kasalukuyang inoobserbahan at ginagamot sa Ospital ng Muntinlupa (OsMun).

Sa kabuuan, mayroon nang 310 confirmed cases sa Munti, 197 recoveries, 78 active cases habang 35 naman ang mga nasawi.

June 17, 2020 0 comment

RONDA PROBINSYA

Antique gov’t muling humirit na payagan na ang backriders

written by Gilbert Perdez

Muling humirit ang pamahalaang panlalawigan ng Antique sa Department of Transportation-Land Transportation Office (DOTr-LTO) na payagan ang mga motorcycle back riders habang nasa ilalim sila ng modified general community quarantine (MGCQ).

Ayon kay Antique Governor Rhodora Cadiao, nahihirapan ang mga residente sa kanilang lalawigan lalo na ang mga nasa liblib na lugar dahil bawal pa ring bumiyahe ang mga magka-angkas sa motorsiklo.

Batay sa tala, mayroong halos 12,000 registered motorcycle units sa Antique.

June 17, 2020 0 comment

HEADLINES NATIONAL NEWS

Palasyo umaasang ‘di magkakaroon ng dengue outbreak

written by Gilbert Perdez

Umaasa ang Malacañang na hindi magkakaroon ng iba pang outbreak ng nakamamatay na sakit sa Pilipinas – tulad ng dengue – habang nagpapatuloy ang coronavirus disease (COVID-19) pandemic.

Ginawa ni Presidential Spokesperson Harry Roque ang pahayag matapos magbabala ang Department of Health (DOH) na posibleng tumaas ang mga kaso ng dengue sa bansa bunsod ng pagpasok ng tag-ulan.

Matatandaang nagdeklara ng national dengue epidemic ang DOH noong Agosto ng taong 2019 dahil sa paglobo ng bilang ng mga tinamaan ng nabanggit na sakit sa ilang lugar sa bansa.

June 17, 2020 0 comment

RONDA PROBINSYA

Bangsamoro gov’t balik na sa kanilang 2nd regular session

written by Gilbert Perdez

Balik na sa regular session ang Bangsamoro Transition Authority (BTA) ng Bangsamoro Autonomous Region in Muslim Mindanao (BARMM) makaraan ang mahigit dalawang buwan.

Pinangunahan ni BARMM Chief Minister Ahod “Murad” Ebrahim ang pagbubukas ng ikalawang regular na sesyon ng parliyamento na nakatuon sa pagtugon ng rehiyon sa coronavirus disease 2019 (COVID-19) crisis.

Ayon kay Ebrahim, titiyakin niyang mararamdaman ng mga mamamayan ang Bangsamoro Government.Ipinagmalaki rin ng opisyal na namahagi na sila ng mahigit 400 food packs at relief goods sa mga benepisyaryo.

June 17, 2020 0 comment

HEADLINES

Ilang senador suportado ang hakbang ng Ombudsman laban kay Duque, DOH execs

written by Gilbert Perdez

Welcome sa ilang senador ang imbestigasyon ng Office of the Ombudsman laban kay Department of Health (DOH) Secretary Francisco Duque III at sa iba pang health officials bunsod ng umano’y mga kapalpakan ng DOH sa pagtugon sa coronavirus disease 2019 (COVID-19) pandemic.

Para kay Sen. Bong Go, mahalagang magkaroon ng patas na pagsisiyasat sa usapin at kailangan din aniyang malaman ng taumbayan kung saan napupunta ang pondong nakalaan para sa krisis.

Sinabi naman ni Sen. Panfilo Lacson na napapanahon ang pagkilos ng Ombudsman at umaasa siyang mapapanagot ang sinumang opisyal sakaling mayroon mang paglabag sa batas ang mga ito.

Samantala, iginiit ni Senate Minority Leader Franklin Drilon na suportado niya ang imbestigasyon ng anti-graft body ukol sa anumang iregularidad partikular sa pagbili ng mga personal protective equipment (PPE)’s, gayundin ang posibleng sablay na COVID-19 test package ng PhilHealth.

June 17, 2020 0 comment

Newer Posts

Older Posts