Patay ang walong hinihinalang rebelde matapos makasagupa ang security forces sa Kashmir, India.
Ayon sa Indian army, naglunsad ng joint operations ang pulisya at militar sa mga lugar ng Shopian at Pampore nang makatanggap ng impormasyon hinggil sa presensya ng mga armadong indibidwal.
Nabatid na nagtago pa sa loob ng isang mosque ang dalawang rebelde pero napatay din sila ng mga rumespondeng awtoridad.
Balak sagupain ni Filipino fighter Lito Adiwang si dating strawweight champion at elite grappler Yoshitaka Naito ng Japan.
Paliwanag ni Adiwang, gusto niyang makaharap ang mga pinakamagagaling sa ONE Championship matapos ang sunod-sunod niyang panalo sa mga nakaraang torneo.
Wala pang pahayag ang kampo ni Naito ukol sa hamon ni Adiwang.
Ikinukonsidera ng Philippine Health Insurance Corp. (PhilHealth) ang pagsasampa ng kasong libelo laban sa pinuno ng grupo ng mga pribadong ospital bunsod ng alegasyon nito na may utang ang ahensya sa kanila na nagkakahalaga ng P18-B.
Ginawa ni PhilHealth President at CEO Ricardo Morales ang pahayag matapos isiwalat ni Dr. Rustico Jimenez, presidente ng Private Hospitals Association of the Philippines Inc. (PHAPI), na mayroon silang unpaid reimbursement claims.
Ngunit binigyang diin ni Morales na kung pagbabatayan ang mga datos ay wala silang pagkakautang sa PHAPI.
Kaya naman hinamon ni Morales si Jimenez na mag-usap muna sila nang harapan.
Ayon kay Morales, sa halip na makipag-ugnayan sa kanyang tanggapan ukol sa isyu, may pinili ni Jimenez na lumapit sa media.
Patuloy na namamayagpag sa Youtube ang music video ni Sarah Geronimo para sa kanyang kanta na “Tala”.
Katunayan, ayon sa Viva Artists Agency, itinanghal ang video bilang “most viewed OPM music video” sa nasabing sharing platform.
Sinasabing umani na ng mahigit 141 million views ang nabanggit music video ni Sarah.
Sinusubukang takasan ni PhilHealth president at chief executive officer Ricardo Morales ang responsibilidad na sugpuin ang umano’y corruption sa ahensya.
Ito ang binigyang diin ni Presidential Spokesperson Harry Roque bunsod ng aniya’y pag-iwas ni Morales sa mga mapaminsalang isyu na bumabalot sa Philhealth.
Ginawa ni Roque ang pahayag matapos siyang hamunin ni Morales na kasuhan ang mga tiwaling PhilHealth officials kung may nakikita itong sapat na ebidensya laban sa mga ito.
Giit ni Roque, hindi na kailangang hintayin ni Morales na umakto ang korte sa usapin dahil may kapangyarihan naman itong magsuspinde o magtanggal ng sinumang opisyal o personnel ng state corporation.
Plano ng Department of Public Works and Highways (DPWH) na magtayo ng mga dormitoryo para sa mga front-liners partikular sa mga probinsya.
Sa isinagawang Laging Handa briefing, sinabi ni DPWH Secretary Mark Villar na nakikipag-ugnayan na sila sa mga local government units (LGUs) sa ilang lungsod kung saan sila maaaring magtayo ng matutulugan ng mga healthcare workers.
Kabilang sa mga tinututukan nilang siyudad ay ang Cebu, Tacloban, at Samar.
Dagdag ni Villar, inaasahang makukumpleto na rin ngayong buwan ang anim na cluster dormitories na ipinatatayo nila sa Quezon Memorial Circle sa Quezon City.
Nasa ilalim pa rin ng partial lockdown ang National Bureau of Investigation (NBI) matapos mapositibo sa coronavirus disease 2019 (COVID-19) ang isang personnel at limang detainees.
Dahil dito, ayon kay NBI Deputy Director at spokesman Ferdinand Lavin, nangangahulugang tatanggap na lamang ang ahensya ng pre-scheduled transactions.
Matatandaang nasawi ang isang senior citizen detainee sa NBI matapos tamaan ng COVID-19 habang ilalagay naman sa isolation room ang mga nagpositibo sa virus.
Sinabi ni Lavin na walang tigil ang rapid testing, disinfection at sanitation sa kanilang tanggapan.
Bumaba umano ang ‘morale’ ng mga taga-Department of Health (DOH) bunsod ng isinasagawang imbestigasyon ng Office of the Ombudsman laban kay Sec. Francisco Duque III.
Ayon kay DOH Spokesperson Maria Rosario Vergeire, wala pa silang natatanggap na pormal na komunikasyon mula sa anti-graft office ukol sa umano’y posibleng anomalya sa paghawak ng ahensya sa coronavirus disease 2019 (COVID-19) crisis.
Sinabi ni Vergeire na bukas sila sa imbestigasyon at pinaghahandaan na nila ito.
Gayunman, binigyang diin ng opisyal na hindi naman kailangan na lumiban pa sa trabaho o tuluyang magbitiw ang kalihim dahil sa naturang usapin.
Umakyat na sa 7,378 ang kabuuang bilang ng mga gumaling sa coronavirus disease (COVID-19) sa Pilipinas.
Ito’y makaraang makapagtala ang Department of Health (DOH) ng 288 na bagong recoveries.
Gayunman, 661 na bagong kaso naman ang nadagdag sa listahan ng DOH, kasama na rito ang 460 na fresh cases habang 201 naman ang late cases.
Dahil dito, nasa 28,459 na ang kabuuang bilang ng mga tinamaan ng COVID-19 sa buong bansa.
Samantala, umabot na sa 1,130 ang bilang ng mga nasawi kasunod ng pagpanaw ng 14 pang pasyente.
Ibinasura ng Malacañang ang plano ng Philippine Health Insurance Corporation (PhilHealth) na huwag munang ipatupad ang Republic Act 11223 o ang Universal Health Care (UHC) Act.
Ginawa ni Presidential Spokesperson Harry Roque ang pahayag matapos isiwalat ni PhilHealth president at chief executive officer Ricardo Morales sa isang pagdinig sa Kongreso na mayroong pangangailangan para magkaroon ng “general delay” ng full implementation ng batas.
Giit ni Morales, inaasahang malulugi ng P40.7-bilyon ang PhilHealth mula Pebrero nang taong 2020 hanggang Enero nang susunod na taon dulot ng coronavirus disease 2019 (COVID-19) pandemic.
Subalit binigyang diin ni Roque na hindi maaaring maantala ang implementasyon ng UHC Act dahil labag ito sa itinatakda ng batas.