Gilbert Perdez

Pinaratangan ni Pakistani Prime Minister Imran Khan ang India na siyang nasa likod umano ng pag-atake sa kanilang bansa.

Magugunitang nilusob ng mga armadong lalaki na may dalang granada ang Pakistan Stock Exchange kung saan dalawang guwardiya ang nasawi at isang pulis bago napatay ang mga ito ng security forces.

Sa kanyang pahayag sa parliament, isiniwalat ni Khan na matagal na silang nakakatanggap ng intelligence reports ukol sa pag-atake.

Itinuturing naman ni Khan na tagumpay ang kanilang operasyon dahil napatay din nila ang mga salarin.

Inalis na ang nationwide lockdown sa Sri Lanka, isang buwan matapos ikasa muli ang selective curfew bunsod ng pagtaas ng coronavirus infections.

Ngunit, ayon kay Sri Lankan President Gotabaya Rajapaksa, wala nang nangyayaring local transmission kaya niya ginawa ang nabanggit na hakbang.

Samantala, mananatili naman ang ipinatutupad na curfew tuwing gabi sa naturang bansa.

Pinatawan ng tatlong taong pagkakakulong at multa na nagkakahalaga ng 300,000 Egyptian pounds o 18,500 U.S. dollars ang isang sikat na belly-dancer sa Egypt dahil sa umano’y malalaswa nitong mga post sa social media.

Sinasabing ang 42-anyos na si Sama el-Masry ay inaresto noong Abril dahil sa mga mahahalay nitong post, kabilang ang ilang video sa Tiktok.

Ayon sa korte, nilabag ni el-Masry ang family principles at values sa Egypt bunsod ng mga post ng dancer na inilarawan din ng prosekusyon na “sexually suggestive.”

Idinepensa naman ni El-Masry na ninakaw ang kanyang cellphone at hindi siya ang nagpost ng mga nabanggit na larawan at videos kaya’t nangako siyang i-aapela niya ang kanyang kaso.