Magdo-donate ng 10,000 test kits ang isang South Korean company bilang tulong sa Pilipinas sa laban nito kontra coronavirus disease 2019 (COVID-19).
Ayon kay Sanghoon Ko, director general ng Korea Trade (KOTRA), ang donasyon ng SD Biosensor ay nagkakahalaga ng 100,000 dollars.
Sa liham na ipinadala ni Ko kay Health Secretary Francisco Duque III, ang mga test kits ay agad na ipapadala ngayong buwan kung tatanggapin ito ng ahensya.
Malugod na tinanggap ng Police Regional Office sa Caraga Region (PRO-13) ang 200 bagong miyembro ng Philippine National Police (PNP) na tutulong sa pangangalaga ng kapayapaan at kaayusan sa rehiyon.
Ayon kay Police Maj. Renel Serrano, PRO-13 public information officer, ang mga bagong recruits ay kinabibilangan ng 170 lalaki at 30 babae na nanumpa na rin sa kanilang tungkulin nitong Miyerkules.
Hinamon naman ni regional director Brig. Gen. Joselito Esquivel Jr. ang mga bagong pulis na gawin ang iniatang sa kanilang tungkulin para sa Diyos, sa bayan, at sa kani-kanilang pamilya.
Nagpatupad ng bagong travel restrictions ang lokal na pamahalaan ng Ormoc City upang malimitahan ang pagpasok ng mga tao at maiwasan ang pagkalat ng coronavirus disease 2019 (COVID-19).
Sa Executive Order No. 76 ni City Mayor Richard Gomez, hindi maaaring pumasok sa lungsod ang mga hindi residente mula sa ibang lugar na may local transmission, kahit pa may negosyo ito o nagtatrabaho sa lugar.
Papayagan namang pumasok ang mga may negosyo at nagtatrabaho sa Ormoc pero nakatira sa mga lugar na walang local transmission. Gayunman, hihingan ang mga ito ng ID, barangay certification, QR code mula sa “safe ormoc.today website”, at health pass mula sa city health office na valid sa loob ng pitong araw.
Muling nagbalik-loob sa pamahalaan ang isang buong pamilya na umano’y mga miyembro ng New People’s Army (NPA) sa Butuan City.
Ayon kay Police Col. Canilo Fuentes, nagpasya ang hindi pinangalanang mag-asawa at tatlo nilang anak na sumuko sa pulisya dahil halos wala na silang makain at sa hirap ng buhay sa kabundukan.
Kasamang isinuko ng magpapamilya ang apat na revolver na may mga bala at isang shotgun.
Aminado si Jed Madela na umaasa na lamang siya ngayon sa kanyang savings dahil sa kawalan ng raket dulot ng coronavirus pandemic.
Ayon kay Madela, nakakadagdag din sa mga problema niya ang pagsasara ng ABS-CBN kung saan siya nagtatrabaho.
Sa kabila nito, kumpiyansa naman ang Kapamilya singer na makakabangon din ang lahat mula sa pagsubok na kinakaharap nila ngayon.
Nag-donate ng mahigit 40,000 euros o $45,000 si tennis star Novak Djokovic sa isang bayan sa Serbia na apektado ng coronavirus pandemic.
Ayon sa 33-anyos na manlalaro, ang pera ay ipinamahagi niya para sa mga mamamayan ng Novi Pazar.
Matatandaang nagdeklara ng state of emergency sa nabanggit na bayan noong nakaraang buwan dahil sa pagkalat ng COVID-19.
Umakyat na sa 8,506 ang bilang ng mga Pilipinong dinapuan ng COVID-19 sa labas ng bansa.
Ito’y makaraang makapagtala ang Department of Foreign Affairs (DFA) ng 32 pang impeksiyon sa hanay ng mga Pinoy abroad.
Sumampa naman sa 5,131 bilang ng mga gumaling kasunod ng paggaling ng 30 pang pasyente.
Samantala, lima pang Pinoy sa ibayong dagat ang nasawi dahil sa COVID-19 dahilan upang pumalo na sa 554 ang bilang ng mga iginupo ng nasabing sakit.
Muling nilinaw ng Bureau of Fisheries and Aquatic Resources (BFAR) na walang outbreak ng sakit sa mga tilapia at hipon.
Ayon sa BFAR, lumabas kasi sa kanilang pag-aaral na ang pagkamatay ng mga isda sa lawa ng Taal at Laguna de Bay ay dulot ng pagbaba ng oxygen sa tubig kasunod ng pagbabago sa lagay ng panahon.
Bukod dito, binanggit din sa advisory ng ahensya na ligtas kainin ang mga huling tilapia at hipon sa rehiyon ng Ilocos.
Samantala, pinayuhan naman ng BFAR ang mga negosyante na tiyaking nasusunod ang mga biosecurity measures tulad ng regular na pagpapalit ng tubig at paglilinis sa kanilang palaisdaan.
Sa ganitong paraan umano, maiiwasan ang mga sakit gaya ng white spot syndrome, tilapia lake disease, at iba pang virus na dumadapo sa mga isda.
Ibinasura ng Korte Suprema ang kauna-unahang petisyon na kumukuwestiyon sa legalidad ng Bayanihan law at iba pang quarantine measures sa gitna ng coronavirus pandemic.
Ayon sa Supreme Court Public Information Office, dinismis ng mataas na hukuman ang petisyon ni dating law Dean Jaime Ibañez dahil sa kabiguan nitong patunayan na nagkaroon ng ‘grave abuse of discretion’ sa panig ng mga respondents.
Kabilang sa mga ito sina Cabinet Secretary Karlo Nograles, Health Secretary Francisco Duque III, at ang Inter-Agency Task Force.
Giit ni Ibañez, masyadong malawak at hindi makatwiran ang mga ipinatutupad na alituntunin ng gobyerno bilang tugon sa pandemya.
Labis ang paghingi ng paumanhin ng aktres na si Elisse Joson sa kanyang ina.
Ayon sa aktres, may hindi sila pagkakaunawaan ng kanyang nanay na siyang tanging kasama niya sa paglaban sa buhay.
Sa programang “Magandang Buhay” sa Kapamilya network, bumuhos ang luha ni Elisse at personal itong nag-sorry sa kanyang ina na nasa studio rin ng mga oras na iyon.
Sagot naman ng kanyang ina, wala siyang ibang iniisip kundi ang kabutihan ng kanyang anak.