Nakapagtala ang China ng walong bagong kaso ng coronavirus disease 2019 (COVID-19).
Ayon sa National Health Commission (NHC), mas marami ito kumpara sa tatlong kaso na naitala nila kamakalawa.
Anim naman sa bagong impeksiyon ay sinasabing imported cases, habang mula naman sa Beijing ang dalawa pang bagong kaso.
Nilagdaan na ni Pangulong Rodrigo Duterte para maging isang ganap na batas ang Republic Act No. 11479 o Anti-Terrorism Act of 2020.
Ayon kay Presidential Spokesman Harry Roque, malaki ang maitutulong nito sa kampanya ng gobyerno laban sa mga naghahasik ng lagim hindi lamang sa Pilipinas kundi pati na rin sa buong mundo.
Sinabi ni Roque na pinag-aralang mabuti ng Pangulo at ng kanyang legal team ang anti-terrorism law at tinimbang ding maigi ang pangamba ng mga stakeholders.
Matatandaang kumalat sa social media ang hashtag #JunkTerrorBill mula sa iba’t ibang sektor dahil sa sinasabing malawak na kahulugan o depinisyon ng “terorismo” na nakapaloob sa nasabing batas at maaari rin umano itong gamitin laban sa mga kritiko ng gobyerno.
Pinatawan ng isang taong pagkakakulong ng isang korte sa South Korea ang dating boypren ng yumaong K-pop star na si Goo Hara.
Ayon sa hukuman, napatunayang guilty si Choi Jong-Bum sa iba’t ibang kaso dulot nang pamba-blackmail kay Goo tungkol sa umano’y sex videos ng dalawa na naging dahilan upang magpakamatay ang biktima.
Natagpuang wala nang buhay si Goo sa kanilang bahay noong november 2019 at hinihinalang nagpakamatay dahil sa sinasabing pananakot ni Choi na ikakalat ang kanilang malalaswang video, maliban pa sa mga masasamang komento na natanggap ng biktima mula sa mga netizens.
Giit pa ng korte, nagtamo ng matinding trauma at seryosong pagkasira ng reputasyon si Goo na maaaring nagtulak dito para kitilin ang kanyang sariling buhay.
Nagbitiw na sa puwesto si French Prime Minister Edouard Philippe matapos ang kanyang pamumuno sa gobyerno ni President Emmanuel Macron sa loob ng tatlong taon.
Ayon sa tanggapan ni Macron, agad na tinanggap ng presidente ang resignation ni Philippe, kasabay ng pagtatakda ng panibagong reshuffle o balasahan, partikular sa hanay ng gabinete.
Sinasabing isang matapat na tauhan ni Macron si Philippe pero isa rin ito sa mga maaaring makaharap ng presidente sa 2022 presidential election.
Patay ang dalawa katao habang pitong iba pa ang sugatan sa bayan ng Ambo sa Ethiopia kung saan ililibing sana ang Ethiopian musician at activist na si Haacaaluu Hundeessaa.
Magugunitang nilikida si Hundeessaa dahilan upang mag-aklas ang mga tao.
Una nang napatay ang siyam na katao bunsod pa rin ng nasabing pangyayari.
Ibinunyag ng aktres na si Sharon Cuneta na dalawang beses siyang nakunan.
Sa isang post sa social media, binalikan niya ang mga panahong gusto niyang makita ang mga sanggol na nawala sa kanya dahil sa miscarriages.
Ayon kay Ate Shawie, papangalanan niya raw sana ang mga ito ng Andrea at Rafael.
Si Sharon ay may anak kay Gabby Concepcion na si KC habang may tatlo rin siyang anak kay Sen. Francis Pangilinan.
Nakalabas na ng ospital si Panamanian boxing legend Roberto “Hands of Stone” Duran.
Matatandaang dinapuan ng coronavirus disease 2019 (COVID-19) ang six-time boxing world champion pero masaya niyang ibinalita sa mga fans ang kanyang paggaling.
Nagpasalamat naman si Duran sa kanyang pamilya, fans, at sa mga doktor na gumamot sa kanya.
Patay ang tinatayang mahigit 160 katao matapos gumuho isang minahan ng jade sa Hpakant, Kachin state, Myanmar.
Ayon sa Myanmar Fire Services Department, unang nakuha sa pinangyarihan ng pagguho ang 50 minero habang maraming iba pa ang kasalukuyang pinaghananap.
Hinihinalang bumigay ang minahan dahil sa halos walang tigil na pagbuhos ng ulan sa naturang lugar.
Isang daan at walo (108) pang Pilipino sa labas ng bansa ang tinamaan ng COVID-19.
Ayon sa Department of Foreign Affairs (DFA), dahil dito’y umakyat na sa 8,614 ang positibong kaso sa hanay ng mga Pinoy abroad.
Nasa 561 naman ang death tool matapos masawi ang pito pang pasyente.
Samantala, umakyat naman sa 5,148 ang bilang ng recoveries kasunod ng paggaling ng labimpito pang Pinoy sa ibayong dagat.
Nakapagtala ng dagdag na 294 na kaso ng coronavirus disease 2019 (COVID-19) ang Department of Health (DOH).
Dahil dito, ayon kay Health Undersecretary Maria Rosario Vergeire, umakyat na sa 38,805 ang bilang ng mga tinamaan ng virus sa bansa.
Sa nabanggit na bilang, 52 ang “fresh cases” habang 242 naman ang “late cases.”
Sumampa naman sa 10,673 ang recoveries matapos gumaling ang 235 pang pasyente.
Samantala, pumalo na sa 1,274 ang mga nasawi kasunod ng pagpanaw ng apat pang biktima.