Gilbert Perdez

Pumalo na sa 449,615 ang kabuuang bilang ng mga gumaling mula sa coronavirus disease (COVID-19) sa Pilipinas.

Ito’y bunsod ng naitalang 291 na bagong recoveries ng Department of Health o DOH.

Nagkaroon naman ng 1,952 na bagong impeksiyon dahilan upang umakyat sa 485,797 ang total cases sa bansa.

Sa bilang na ito, 26,784 ang active cases.

Nanguna ang Davao City sa may pinakamaraming bagong kaso na 143 cases, sinundan ng Quezon City (98), Rizal (80), Cavite (77), at Bulacan (74).

Samantala, 34 pang pasyente ang pumanaw dahilan upang sumampa sa 9,398 ang death toll sa buong kapuluan.

Aarangkada na sa ika-31 ng Enero ang ‘mock bar examinations’ ng Korte Suprema.

Ayon sa Supreme Court (SC), ito’y bilang bilang paghahanda para sa kauna-unahang digitalized bar examination na idaraos sa November 2021.

Katuwang ang Philippine Associate of Law Schools (PALS), isasagawa ng mataas na hukuman ang mock test na lalahukan ng 120 students sa Baguio City, Metro Manila, Cebu, at Davao.

Bubuksan ang online portal ng Kataas-taasang Hukuman para sa mga gustong sumali sa mga aktibidad simula ika-12 ng Enero kung saan itinakda naman ang deadline ng aplikasyon sa ika-20 ng Enero.

Samantala, nilinaw naman ng Korte Suprema na ang makukuhang grado ng mga examinees sa mock bar exams ay hindi isasama sa aktuwal na bar examinations at wala ring merit o demerit na matatanggap ang mga lalahok na estudyante.

Inaprubahan na ng Food and Drug Administration (FDA) ang aplikasyon ng Clover Biopharmaceuticals para makapagsagawa ng COVID-19 vaccine trials sa Pilipinas.

Bunga nito, ayon sa FDA, dalawang vaccine developers na ang pinapayagang magkasa ng trials sa bansa upang masubukan ang bisa ng mga naimbento nilang bakuna.

Matatandaang nakalusot na rin ang kaparehong aplikasyon ng Johnson & Johnson noong ika-28 ng Disyembre ng nakaraang taon.