Gilbert Perdez

Kritikal ang kondisyon ng isang 83 taong gulang na Pilipino na nakabase sa Philadelphia matapos looban ang kanilang bahay.

Dahil dito, sumisigaw ngayon ng hustisya ang pamilya ng biktimang si Mauricio Gesmundo Sr. na nasa Intensive Care Unit o ICU ng Temple University Hospital.

Sa imbestigasyon, mag-isa lamang si Gesmundo nang pasukin ng hindi pa nakikilalang salarin ang kanilang tahanan, ginulpi, at iniwang may busal sa bibig kung saan tinangay pa ang kanyang cash na $30k.

Patuloy ang imbestigasyon sa insidente.

Nasawi ang apat na lalaki makaraang tambangan sa Sitio Bakud, Barangay Banah, bayan ng Tipo-Tipo sa Basilan.

Pahayag ni Basilan Rep. Mujiv Hataman, kabilang sa mga napaslang tserman ng Barangay Matata sa bayan ng Ungkaya Pukan na si Bin Saudi Sarakil.

Kinilala naman ang iba pang biktima na sina Usop Abdul Majid, Kain Manisan at Ibrahim Abdulkarim.

Batay sa imbestigasyon ng pulisya, lulan ng sasakyan ang mga biktima nang harangin ng isang grupo ng mga armadong lalaki at walang awang niratrat ang mga ito na naging sanhi ng agaran nilang pagkamatay.

Inaalam pa ang motibo at pagkakakilanlan ng mga may kagagawan ng naturang krimen.

Dinapuan ng COVID-19 ang 12 empleyado ng Department of Health Western Visayas Center for Health Development o DOH-CHD6.

Dahil dito, ayon kay Dr. Mary Jane Juanico, head ng infectious disease cluster ng DOH region 6, nagpapatuloy ang contact tracing upang matunton ang mga nakasalamuha ng mga empleyado.

Sa mga kumpirmadong kaso, tig-isa mula sa engineering unit at health and promotion office habang sampu naman mula sa regional epidemiology and surveillance unit (RESU).

Gayunman, nilinaw ni Juanico na wala pa silang “concrete findings” kung paano at saan nahawa ng virus ang kanilang mga kawani lalo pa’t kababalik pa lamang ng mga ito sa kani-kanilang trabaho matapos ang holiday season.

Tatlong hinihinalang “hot meat” traders ang arestado sa pagsalakay ng mga awtoridad sa isang illegal slaughterhouse sa bayan ng Guiguinto sa Bulacan.

Kinilala ni Bulacan Police Director, Col. Lawrence Cajipe ang mga suspek na sina Richard Merez, Nilda Plamenco, at Renz Angelo Merez.

Nakatanggap umano ng sumbong ang pulisya hinggil sa double-dead meat slaughterhouse sa Sitio Ibayo, Barangay Pritil na pinatatakbo ng isang “alyas Jaypee”.

Nakatakas ang target ng operasyon habang naaresto ang tatlong indibidwal at nasabat mula sa mga ito ang ilang piraso ng ‘double dead’ na baboy.

Sasampahan ang mga suspek ng kasong paglabag sa Food Safety Act.