Binawi ng lokal na pamahalaan ng General Santos ang business permits ng mga sabungan sa lungsod.
Ito’y matapos irekomenda ng City Inter-Agency Task Force (CIATF) ang pagpapatigil sa operasyon ng mga cockpit arenas nang magpositibo sa COVID-19 ang dalawang residente na dumalo sa isang derby.
Napuna rin umano ng CIATF na hindi nasusunod ang standard health protocols sa ilang sabungan tulad ng physical distancing at pagsusuot ng face mask o face shield.
Sumalang sa random drug test ang mga matataas na opisyal ng National Capital Region Police Office (NCRPO), kabilang ang mga commander at hepe ng iba’t-ibang tanggapan at support units.
Sa New Year’s Call na ginanap sa Camp Bagong Diwa, Taguig City, mismong si NCRPO chief, Brig. Gen. Vicente Danao Jr. ang nanguna sa drug test ng mga hepe o opisyal ng pulisya.
Matagal nang tradisyon sa uniformed service ang New Year’s call kung saan pinapayagan ang mga matataas na opisyal na magpakita ng courtesy at loyalty sa kani-kanilang mga commander.
Samantala, binigyang diin ni Danao na layon ng random drug test na malinis ang hanay ng PNP laban sa illegal na droga.
Ipinag-utos na ng isang korte sa Sulu ang pag-aresto sa siyam na pulis na nasibak dahil sa pagkakasangkot sa pamamaril sa apat na Army intelligence operatives sa Jolo noong June 2020.
Bukod dito, ayon kay Prosecutor Honey Delgado ng Office of the Prosecutor General, nasa proseso na ng pagdinig ang korte kaugnay ng hirit na hold departure orders laban sa mga akusado upang hindi makalabas ng bansa ang mga ito.
Matatandaang nakakita ng sapat na basehan ang prosekusyon laban kina Senior M/Sgt. Abdelzhimar Padjiri; M/Sgt. Hanie Baddiri; S/Sgt. Iskandar Susulan; S/Sgt. Ernisar Sappal; Cpl. Sulki Andaki; Pat. Moh Nur Pasani; S/Sgt. Almudzrin Hadjaruddin; Pat. Alkajal Mandangan; at Pat. Rajiv Putalan para sa apat na bilang ng kasong murder at planting of evidence.
Samantala, umaasa si Philippine National Police (PNP) spokesperson, Brig. Gen. Ildebrandi Usana na susuko na sa lalong madaling panahon ang mga naturang pulis.
Inaasahang matatapos na ngayong buwan ang rehabilitasyon ng Terminal 2 ng Ninoy Aquino International Airport (NAIA).
Katunayan, ipinagmalaki ng Department of Transportation (DOTr) na 98.10% nang kumpleto ang nabanggit na proyekto.
Matatandaang inihayag ni Manila International Airport Authority (MIAA) General Manager Ed Monreal na target na tapusin ang rehabilitation project noong March 2020 ngunit dahil sa coronavirus pandemic ay hindi ito natuloy.
Hindi matutuloy sa ika-19 ng Enero ang oral arguments kaugnay ng mga petisyon na kumukuwestiyon sa legalidad ng Republic Act 11479 o ang Anti-Terrorism Act (ATA) of 2020.
Ito’y makaraang tamaan ng COVID-19 ang ilang personnel ng Office of the Solicitor General (OSG).
Dahil dito, ayon kay Supreme Court Clerk of Court Edgar Aricheta, sa ika-2 na ng Pebrero gaganapin ang deliberasyon.
Sinasabing ipinarating ni Solicitor General Jose Calida sa Mataas na Hukuman na nagpositibo sa coronavirus ang kanyang Assistant Solicitor General at ilang staff na dadalo sana sa oral arguments.
Nadagdagan ng 551 ang bilang ng mga gumaling mula sa coronavirus disease 2019 (COVID-19) sa Pilipinas.
Dahil dito, ayon sa Department of Health (DOH), umakyat na sa 459,737 ang total recoveries o 92.6% ng lahat ng impeksiyon sa bansa.
Batay sa COVID-19 bulletin ng DOH, nakapagtala ito ng 2,048 na bagong kaso dahilan upang pumalo sa 496,646 ang kabuuang bilang ng COVID-19 cases.
Pinakamaraming bago ang naitala sa Bulacan na 98 new infections na sinundan ng Davao City, 89; Pangasinan, 84; Maynila, 80; at Leyte,73.
Samantala, sumampa na sa 9,876 ang death toll sa bansa bunsod ng pagpanaw ng 137 pasyente.
JUST IN: Kaso ng COVID-19 sa bansa, nadagdagan pa ng 2,048 ngayong Biyernes, Enero 15.
Pumalo na sa kabuuang 496,646 ang bilang ng kumpirmadong kaso ng COVID-19 sa bansa. Mayroon namang 27,033 naitalang active cases. | https://t.co/HHOy7zaafm pic.twitter.com/LJfCnCP4Jq
— DWIZ Newscenter (@dwiz882) January 15, 2021
Patay ang personal doctor ni Pope Francis matapos tamaan ng coronavirus disease 2019 (COVID-19).
Sa ulat ng Catholic News Agency (CNA), si Dr. Fabrizio Soccorsi ay binawian ng buhay sa Gemelli Hospital sa Roma sanhi ng komplikasyong dulot ng COVID-19.
Ang Italya ay isa sa mga bansang pinaka-apektado ng pandemya.
Matatandaang noong December 2020 ay dinapuan din ng virus ang dalawang kardinal.
Natagpuan na ng mga awtoridad ang cockpit voice at flight data recorders ng bumagsak na pampasaherong eroplano sa Indonesia.
Ayon kay Indonesian Armed Forces chief Hadi Tjahjanto, mahalaga ang mga nabanggit na items upang matukoy ang posibleng naging sanhi ng trahedya.
Sinabi ni Hadi na may dalawang signal na natukoy mula sa black box ng Sriwijaya Air bago bumagsak at patuloy pa itong sinusuri.
Una nang nakita sa flight tracking data na bumulusok ang Boeing 737-500 sa dagat halos apat na minuto pa lamang matapos itong umalis ng Soekarno-Hatta international airport.
Wala umanong senyales na may nakaligtas sa 62 katao na lulan ng naturang eroplano.
Binalot ng dilim ang buong Pakistan makaraang magkaproblema sa electricity distribution system na nakaapekto sa mahigit 200 milyong mamamayan.
Paliwanag naman ni Energy Minister Omar Ayub Khan, ang countrywide blackout ay dulot ng biglaang pagbagsak ng frequency sa power transmission system.
Magugunitang nagkaroon din ng malawakang brownout dahil sa umano’y pag-atake ng mga rebelde sa mga pangunahing linya ng kuryente noong 2015.
Suportado ni Vice President Leni Robredo ang ilang panukalang batas na naglalayong bigyan ng bagong prangkisa ang ABS-CBN.
Kabilang sa mga nagsusulong nito sina Senate President Vicente Sotto III at Batangas 6th District Rep. Vilma Santos-Recto.
Naniniwala naman ang bise-presidente na dapat dinggin ulit ng lower house ang franchise bill.
Samantala, inilarawan ni Robredo ang itinutulak na charter change hearings sa Kongreso na “wrong timing” bunsod ng nagpapatuloy na COVID-19 pandemic.