Gilbert Perdez

Nagpositibo sa COVID-19 si Cagayan vice-governor Melvin Vargas Jr.

Nabatid na bago sumalang sa coronavirus test, sinasabing dumalo si Vargas sa ilang public events.

Ngunit sa isang Facebook post, nilinaw niya na mild lamang ang kanyang kaso at wala siyang nararamdamang anumang sintomas.

Hinikayat naman ng opisyal ang mga nakasalamuha niya na mag-self isolate upang masiguro ang kaligtasan ng lahat.

Muling pinawi ng mga eksperto ang pangamba ng publiko laban sa negatibong epekto ng bakuna kontra Coronavirus Disease 2019 o COVID-19.

Sa panayam ng DWIZ, sinabi ni DOST Undersecretary Rowena Cristina Guevara na wala pang siyentipikong basehan ang mga kumalat na balita ukol sa mababang efficacy o bisa ng ilang vaccine brands.

Ayon kay Guevarra, hindi pa tapos ang masusing clinical trials ng mga bakuna laban sa coronavirus.

Ipinaliwanag naman ng opisyal ang isyu tungkol sa Sinovac na sinasabing limampung porsiyento lamang ang efficacy.

Kasabay nito, hinimok din ni Guevara ang publiko na magtiwala sa gobyerno at ipaubaya ang lahat sa Department of Health na siyang maglulunsad ng vaccination program.

Mas pinaigting pa ang pagpapatupad ng liquor ban o ang pagbabawal ng pagbebenta at pag-inom ng alak sa pista ng Sto. Niño sa Tondo at Pandacan sa Maynila.

Katunayan, sinabi sa DWIZ ni Manila Police District Director Brig. Gen. Leo Francisco na marami nang nahuhuling residente dahil sa iba’t ibang mga paglabag.

Giit ni Francisco, ipatutupad nila ang batas sa lahat at wala silang sisinuhin sa mga ginagawa nilang operasyon.

Hinikayat din ni Francisco ang mga deboto ng Sto. Niño na sumunod sa health protocols at panatilihin lagi ang physical distancing at pagsusuot ng facemask.

Samantala, sinabi naman ng opisyal na wala silang natatanggap na banta sa seguridad sa pista ng Sto. Niño.

Bagama’t kanselado na ang mga aktibidad sa Sinulog 2021 sa Cebu City, pinapayagan pa rin ang ilang mga deboto na pumasok sa Basilica Menor del Santo Niño kasabay ng ika-456 na kapistahan ng Señor Sto. Niño de Cebu.

Sa panayam ng DWIZ, sinabi ni Police Colonel Josefino Ligan, Chief of Police ng Cebu City Police Office o CCPO, mahigpit pa ring ipinatutupad ang health protocols para sa mga debotong pumapasok ng simbahan para magsindi ng kandila bilang pagpapakita ng debosyon kay Señor Sto. Niño.

Nakabantay din aniya ang mahigit isang daang pulis sa entrance at exit points ng pilgrim center.

Samantala, binalaan naman ni Ligan ang mga deboto at ilang residente na lumalabag sa curfew na hindi sila mangingiming ipatupad ang batas oras na mahuli ang mga ito.

Kasama na ang United Arab Emirates (UAE) at Hungary sa mga bansang sakop ng travel restrictions na ipinatutupad ng pamahalaan bilang pag-iingat sa bagong variant ng COVID-19.

Ayon naman kay Presidential Spokesperson Harry Roque, hindi ito maituturing na travel ban kundi travel restrictions lang dahil pinapayagan pa rin ang pagdating ng mga Pilipino.

Samantala, epektibo ang paghihigpit na ito mula ika-17 hanggang ika-31 ng Enero, taong kasalukuyan.