Gilbert Perdez

Daragdagan ng Department of Health (DOH) ang kapasidad ng One Hospital Command (OHC) hotline.

Ito’y makaraang ulanin ito ng mga tawag sa gitna ng pagtaas ng COVID-19 cases sa bansa.

Katunayan, ayon kay DOH Undersecretary Leopoldo Vega, nakakatanggap ang OHC hotline ng 280 hanggang 300 na tawag kada araw na mas mataas sa naitala noong buwan ng Pebrero.

Matatandaang inilunsad ng DOH ang COVID-19 emergency hotlines na 02-894-COVID (02-894-26843) at 1555 sa pakikipagtulungan sa National Emergency Hotline ng DILG, PLDT at Smart Communications Inc.

Ayon sa DOH, sa pamamagitan ng hotline ay maaaring magtanong o mag-request ng assistance ang publiko kung pakiramdam nila posibleng infected sila ng coronavirus.

Pinayagan na ng Commission on Higher Education (CHED) ang 24 higher education institutions o HEI’s na magsagawa ng limitadong “face-to-face classes” simula sa ikalawang semestre ng academic year 2020-2021.

Ayon kay CHED Chairman Prospero de Vera III, pasado na sa mahigpit na retrofitting at nakasunod sa mga panuntunan ng Department of Health at Inter-Agency Task Force (IATF) ang mga sumusunod na kolehiyo at unibersidad:

1. Mariano Marcos State University – Batac (Region I)
2. St. Louis University (Cordillera Administrative Region)
3. Our Lady of Fatima University – City of San Fernando (Region III)
4. Ateneo School of Medicine and Public Health (National Capital Region-NCR)
5. University of Santo Tomas (NCR)
6. University of East Ramon Magsaysay (NCR)
7. Our Lady of Fatima University – Quezon City (NCR)
8. Our Lady of Fatima University – Valenzuela City (NCR)
9. Manila Central University (NCR)
10. University of the Philippines-Manila (NCR)
11. Adventist University of the Philippines (Region IV)
12. De La Salle Health and Medical Science Institute (Region IV)
13. University of Perpetual Help – Don Jose (Region IV)
14. Our Lady of Fatima University – Sta. Rosa (Region IV)
15. Naga College Foundation (Region V)
16. West Visayas State University (Region VI)
17. Central Philippine University (Region VI)
18. Cebu Institute of Medicine (Region VII)
19. University of Cebu School of Medicine (Region VII)
20. Iloilo Doctors’ College of Medicine (Region VI)
21. University of Iloilo (Region VI)
22. Blancia Foundation College, Inc. (Region IX)
23. Xavier University (Region X)
24. Liceo de Cagayan University (Region X)

 Dahi dito, ayon kay de Vera, ang mga 3rd at 4th year students sa mga nasabing institusyon ay maaari nang isalang sa hands-on training at laboratory classes sa pamamagitan ng limitadong face-to-face system.

Sinasabing prayoridad nito ang mga kumukuha ng health-related degree programs gaya ng medicine, nursing, medical technology/medical laboratory science, physical therapy, midwifery, at public health.

Dumarami ang mga COVID-19 patients na isinusugod sa mga ospital sa Metro Manila.

Ito ang inihayag ng Department of Health (DOH) sa gitna ng pagtaas ng bilang ng mga dinadapuan ng impeksiyon sa bansa.

Ayon kay DOH Undersecretary Leopoldo Vega, kabilang sa mga lungsod na nakakaranas ng high utilization ng mga isolation beds, ward beds, at intensive care units (ICUs) ay ang Makati, Quezon, Taguig at Maynila.

Sinabi ni Vega na isa sa mga nakikita nilang posibleng dahilan nito ay ang pagtanggap ng mga ospital ng mga pasyente na nakakaranas lamang ng mild symptoms ng COVID-19.

Tatlo ang kumpirmadong patay habang dalawang iba pa ang nasagip matapos gumuho ang parte ng isang gusali na dine-demolish sa Ermita, Maynila.

Kinilala ang mga nasawi na sina Richard Bugarin, Joseph Lacsa, at Jomar Torillos habang isinugod sa Philippine Orthopedic Center naman sina Aron Eleutrio at Airold Sidro.

Ayon kay Lt. Col. Evangeline Cayaban, hepe ng Manila Police District Station 5, bigla na lamang gumuho ang basement at unang palapag ng PhilAm Life building sa lugar.

Samantala, nagbabala naman ang Homicide Section ng MPD na maaaring mapanagot ang contractor at subcontractor ng demolition team na hanggang ngayon ay walang inilalabas na pahayag ukol sa nasabing insidente.