Gilbert Perdez

Muling nanawagan ang ilang eksperto sa mga Pilipino na magpabakuna kontra COVID-19 dahil ito lamang ang paraan upang mapigilan ang paglobo ng bilang ng mga nagkakasakit.

Lumalabas naman sa survey ng Pulse Asia na mas maraming Pinoy ang ayaw pa ring tumanggap ng bakuna.

Ngunit karamihan sa mga lumahok sa survey mula Pebrero 22 hanggang Marso 3 ay aware na sa mga bakuna mula sa ibang bansa.

Ayon sa Pulse Asia, mataas din ang public awareness ng Covid-19 vaccines ng US (99 %), Russia (97%), United Kingdom o UK (96%, at India (93%).

Binanggit din na karamihan sa mga respondents sa nasabing survey ay nagsabing mas gusto nila ang bakunang gawa ng Pfizer.

Sagad na ang kapasidad ng Pasay City General Hospital (PCGH).

Ito’y matapos i-anunsiyo ng PCGH na pansamantalang hindi muna ito tatanggap ng COVID-19 patients sa kanilang Emergency Room (ER), Intensive Care Unit (ICU), at COVID-19 ward dahil nauubusan na sila ng hospital beds.

Ayon kay PCGH Officer-In-Charge Dr. John Victor de Gracia, okupado na ang kanilang 28 regular beds para sa coronavirus patients at maging ang 60% o 12 sa 20 beds sa transition ward.

Samantala, sinabi ni De Gracia na ginagamot pa rin sa ospital ang kanilang mga empleyado na tinamaan ng COVID-19.

Pumalo na sa 10,189 ang mga healthcare workers o HCWs sa Pasig City na nabigyan ng bakuna kontra Coronavirus Disease 2019 o Covid-19.

Ayon kay Mayor Vico Sotto, kabilang sa mga HCWs na naturukan ng vaccine ay mula sa iba’t ibang ospital, referral centers, Centralized Quarantine Facility, at barangay health centers.

Maliban dito, sinimulan na rin ng Pasig LGU ang pagbabakuna sa mga

health professionals sa pribadong sektor, gayundin sa mga manggagawang nagtatrabaho sa mga pribadong medical at dental clinics.

Nanawagan sa mga mayayamang bansa at kompanya ang World Health Organization (WHO) na tumulong upang maabot ang 10 million doses ng coronavirus vaccines para sa mga pinaka-mahihirap na bansa sa mundo.

Ayon kay WHO Director-General Tedros Adhanom Ghebreyesus, target nilang maipamahagi ang mga bakuna sa loob ng isang daang araw.

Sinabi ng WHO na tinatayang 20 bansa ang wala pang maayos na supply ng bakuna at ito ang nais nilang pagkalooban sa lalong madaling panahon sa pamamagitan ng COVAX facility.

Isasailalim sa mas mahigpit na quarantine status ang Kalakhang Maynila at iba pang karatig-lalawigan ngayong Semana Santa.

Ito’y bunsod ng tumataas na bilang ng mga tinatamaan ng COVID-19 at paglaganap ng mga bagong variants sa bansa.

Ayon kay Presidential Spokesman Harry Roque, simula alas-12:01 ng madaling araw bukas, Marso 29, magiging epektibo ang Enhanced Community Quarantine sa National Capital Region (NCR), Bulacan, Cavite, Laguna, at Rizal na mas kilala rin bilang “NCR Plus.”

Inaprubahan po ng ating Presidente ang rekomendasyon ng IATF na ilagay muli sa Enhanced Community Quarantine o ECQ ang National Enhanced Community Quarantine, Bulacan, Cavite, Laguna at Rizal o ang tinawatag nating greater Manila area, ito po ay epektibo sa Lunes, 12:01 po ng umaga, March 29, tatagal hanggang a kwatro ng Abril, taong kasalukuyan,“pahayag ni Presidential Spokesperson Harry Roque.

Paliwanag ni Roque, bahagi ito ng mga hakbang ng pamahalaan upang mapigilan ang pagkalat ng Covid-19.

Nangangahulugan ito na tanging ang mga ‘authorized persons outside residence’ o APORs lamang ang papayagang bumiyahe palabas at papasok sa mga nasabing lugar, kabilang ang mga essential travels tulad ng manggagawa, deliveries at maging ang mga maghahatid ng humanitarian aid.

Homeliners po tayo ulit sa bahay po tayo except kung tayo ay magtatrabaho sa mga bukas na industriya, kung tayo po ay APOR at kung para kumuha ng mga necessities gaya ng pagkain at gamot. Tuloy-tuloy pa rin po ang paghatid ng food and essential services at my tighten presence ng uniform personnel para ipatupad ang quarantine protocols,“ani  Roque.

Sa ilalim ng ECQ 2.0 na inaprubahan ni Pangulong Rodrigo Duterte matapos ang rekomendasyon ng IATF o Inter-Agency Task Force, ipatutupad din ang curfew mula alas-6:00 ng gabi hanggang alas-5:00 ng umaga habang bawala na rin ang indoor dining sa mga restoran.

Dahil dito, asahan na ang mga ilalatag na checkpoints ng mga sundalo at pulis, partikular sa mga borders ng Metro Manila.

Bagamat nandyan po muli ang mga checkpoints para nga po masiguro na tayo ay homeliners,nananatili sa bahay,  unless kinakailangan pong lumabas. Pakiusap po sa mga checkpoints ‘wag nating haharangin ang mga cargos lalong-lalo na po ang mga may dalang pagkain, dahil kapag hindi nakapasok sa greater Manila area ang ating mga pagkain ay baka tayo magutom,“wika ng ni Roque.

Nagbabala sa publiko ang Department of Health (DOH) at Food and Drug Administration (FDA) laban sa pagbili at paggamit ng Ivermectin veterinary products bilang gamot kontra COVID-19.

Sa isang joint announcement, nilinaw ng dalawang ahensya na wala pa silang natanggap na anumang aplikasyon para sa paggamit ng nasabing produkto laban sa virus sa ilalim ng Compassionate Special Permit.

Nilinaw din ng DOH at FDA na batay sa inaprubahan nilang permit para sa mga Ivermectin veterinary products, ang mga ito ay ginagamit lamang na panlunas laban sa internal at external parasites sa ilang hayop o animal species.

Umusad na sa Kongreso ang panukalang batas na layong pagkalooban ng night shift differential pay ang mga empleyado ng pamahalaan, kabilang ang mga government-owned or-controlled corporations o GOCCs.

Ito’y makaraang lumusot sa House Committee on Appropriations ang House Bill 5727 na magdaragdag ng differential pay na hindi hihigit sa 20 porsiyento ng basic rate kada oras ng isang kawani.

Sa ilalim ng bill, nilinaw na hindi lahat makikinabang dito dahil para lamang ito sa mga empleyado ng gobyerno na nagtatrabaho sa gabi.

Isasalang pa rin sa mandatory quarantine ang mga overseas Filipino workers kahit pa nabakunahan na ang mga ito.

Ayon kay OWWA administrator Hans Leo Cacdac, batay kasi sa polisiya ng Inter-Agency Task Force (IATF) ay obligado rin ang mga returning Filipino workers na sumailalim sa swab test bago payagang makauwi sa kanilang mga probinsya.

Paliwanag ni Cacdac, may mga pagkakataon din na may nahawaan ng virus kahit naturukan na ang mga ito ng COVID-19 vaccine.

Samantala, iniulat ng opisyal na may tinatayang pitong libong OFWs ang kasalukuyang tumutuloy sa mahigit isang daang hotel sa iba’t ibang lugar.

Sa oras aniyang mag-negatibo sa virus, papayagan na ang mga ito na umuwi ng kani-kanilang mga lalawigan.