Gilbert Perdez

Pabor ang Department of Education (DepEd) sa panukalang mas higpitan pa ang paggamit ng Electronic Nicotine Delivery Systems o ENDS na mas kilala rin sa tawag na e-cigarettes o “vapes.”

Ginawa ni Education Secretary Leonor Magtolis Briones ang pahayag bilang suporta sa pagdinig ng Senado ukol sa ilang probisyon ng Vaporized Nicotine Products Regulation Bill na nakatuon sa age restriction, online trade, product flavors, at iba pa.

Giit ni Briones, hindi sapat ang edukasyon upang maiwasan ng mga estudyante ang vapes o E-cigarettes kundi mahalaga ang mahigpit na polisiya o regulasyon at batas na may kaugnayan dito.

Sa ilalim ng mga panukala na nakabinbin sa Senado, ibinaba sa 18 taong gulang ang ‘minimum age of restriction’ mula sa 21 taong gulang na nakapaloob sa Republic Act No. 11467 na nilagdaan ni Pangulong Rodrigo Duterte noong January 2020.

Magkakaroon ng panibagong bugso ng balasahan sa Philippine National Police (PNP) ngayong buwan bunsod ng nakaambang pagreretiro ng tatlong matataas na opisyal.

Nabatid na si PNP comptroller Maj. Gen. Emmanuel Licup ay magreretiro sa Ika-9 ng Abril habang sa ika-10 naman ng Abril ay sasapit din sa kanyang mandatory retirement age na 56 si PNP spokesperson Brig. Gen. Ildebrandi Usana sa ika-20 ng Abril.

Sa ika-24 naman ng Abril ay magreretiro rin si Lt. Gen. Cesar Hawthorne Binag, Deputy Chief for operations at hepe ng Joint Task Force Covid Shield.

Sinasabing sa ika-8 ng Mayo ngayong taon ay nakatakda rin ang pagreretiro ni PNP Chief Gen. Debold Sinas habang sa ika-13 naman ng Nobyembre si Deputy Chief for Administration Lt. Gen. Guillermo Eleazar.

Sina Eleazar, Sinas, Binag at Licup ay kapwa miyembro ng Philippine Military Academy Hinirang Class of 1987 habang si Usana naman ay kasapi ng PNP Academy Class of 1988.

May intensiyon ang China na sakupin ang iba pang parte ng West Philippine Sea.

Ito ang ibinabala ni Department of National Defense o DND Secretary Delfin Lorenzana bunsod ng aniya’y presensya ng maraming Chinese maritime militia ships sa nasabing teritoryo.

Matatandaang iginiit ng Chinese Embassy na kaya nananatili ang kanilang mga barko sa Julian Felipe Reef o Niu’e Jiao ay dahil bahagi ito ng inaangkin nilang Nansha Islands.

Binigyang diin naman ni Lorenzana na ang katulad na aksyon ay ginawa na rin ng China sa Panatag Shoal o Bajo de Masinloc at Panganiban Reef na aniya’y paglabag sa soberenya ng Pilipinas.

Inilabas na ng Department of Transportation (DOTr) ang mga patakaran na dapat sundin sa mga pampublikong transportasyon habang umiiral ang enhanced community quarantine (ECQ) sa Metro Manila, Bulacan, Cavite, Laguna, at Rizal o mas kilala bilang “NCR Plus” hanggang Abril 4.

Ayon sa DOTR, limitado pa rin sa 1,500 ang international inbound passenger capacity kada araw sa Ninoy Aquino International Airport (NAIA) habang limampung porsiyento lamang ang papayagan sa maritime sector.
Magpapatuloy din ang operasyon ng mga tren ng MRT, PNR, at LRT pero dalawampu hanggang tatlumpung porsiyento lamang ang kapasidad na papayagan kada tren.

Pinapayagan namang bumiyahe ang mga bus at dyip ng hanggang limampung porsiyento ng kapasidad ng mga ito, kung saan kasama sa bilang ang mga driver at konduktor. Mahalaga ring ipatupad ang ‘one seat apart rule’ at bawal ang sabit o nakatayong pasahero.

Puwede namang pumasok sa ‘NCR Plus’ ang mga provincial buses na may sakay na Authorized Persons Outside Residence o APOR pero dapat ay point-to-point trips ito.

Sa UV Express, taxi at TNVS, dalawang pasahero lamang kada ‘row’ ang pinapayagan at hindi ito dapat humigit sa limampung porsiyento ng kanilang kapasidad.

Mahigpit ding ipatutupad ang mahigpit na physical distancing o one-seat apart sa mga shuttle services habang isang pasahero lamang ang papayagang sumakay sa traysikel.

Papayagan din ang operasyon ng mga motorcycle taxis para sa mga APOR habang bawal ang illegal na motor taxi services o “habal-habal.”

Ayon sa DOTR, maaaring bumiyahe o gumamit ng non-motorized transport at iba pang personal mobility devices tulad ng bisikleta habang umiiral ang ECQ pero dapat nasusunod pa rin ang physical distancing measures.

At tandaan din ang 7 Commandments sa loob ng public transport:

(1) Magsuot ng face masks at face shield
(2) Bawal makipag-usap o tumawag sa telepono habang nasa biyahe
(3) Bawal kumain
(4) Dapat well-ventilated ang PUVs
(5) Gawing regular ang disinfection
(6) Bawal bumiyahe o sumakay ang mga may sintomas ng COVID-19
(7) At sumunod sa physical distancing rule

Binati ni Vice President Leni Robredo si Pangulong Rodrigo Duterte sa kanyang ika-76 na kaarawan.

Sa kanyang programa sa radyo, binanggit ni Robredo na lagi niyang dinadasal ang malusog na pangangatawan ng Punong Ehekutibo na kasalukuyang nasa Davao City.

Samantala, inulan din ng kaliwa’t kanang birthday greetings ang Pangulo mula sa mga Pinoy, government employees at officials, kabilang si Presidential spokesperson Harry Roque.