Gilbert Perdez

Inatasan ng Department of National Defense (DND) ang militar na imbestigahan ang panibagong pangha-harass sa mga mangingisdang Pinoy na may kasamang media sa West Philippine Sea.

Ito’y makaraang mapaulat na hinabol ng mga barko ng China na armado ng missile ang bangkang sinasakyan ng ABS-CBN News team sa pangunguna ng reporter na si Chiara Zambrano kahit na naglalayag ito sa rehiyon at nasa sa loob ng exclusive economic zone ng Pilipinas.

Ayon kay Defense spokesperson Arsenio Andolong, mahalagang malaman ang iba pang mga pangyayari sa likod ng insidente upang makagawa ng karampatang aksiyon ang NTF WPS o National Task Force for the West Philippine Sea, kasama ang iba pang kinauukulang ahensya.

Nabatid na lulan ng isang fishing boat at patungo sana sa Ayungin Shoal ang grupo ni Zambrano nang itaboy sila ng mga Tsino kaya’t napilitan silang bumalik at hindi pa nakuntento ay hinabol pa sila ng dalawa pang mabibilis na barko.

Kukuha ang Department of Labor and Employment (DOLE) ng 2,000 informal sector workers at maging ng mga apektado ng COVID-19 pandemic para sa emergency employment program ng gobyerno.

Ito’y dahil ayon kay Atty. Ma. Karina Trayvilla, direktor ng Bureau of Workers with Special Concerns (BWSC) ng DOLE, magiging 14,000 na ang mga iha-hire nilang benepisyaryo para sa TUPAD Program o Tulong Panghanapbuhay sa Ating Disadvantaged/Displaced Workers.

Maaari aniyang magtrabaho ang mga manggagawa ng hanggang 90 araw, depende sa request o pangangailangan ng ilang lokal na pamahalaan.

Inaasahang aarangkada na sa susunod na linggo ang programa kung saan sasahod ng 537 pesos kada araw ang bawat TUPAD workers.

Pinayagan nang mabakunahan ang mga Gobernador at Alkalde sa mga lugar na mataas ang kaso ng COVID-19 o high risk areas.

Ito ang kinumpirma ni National Task Force Against COVID-19 Deputy Chief Implementer Vince Dizon matapos aprubahan ng Inter-Agency Task Force (IATF) ang hirit ng League of Provinces of the Philippines na isama sa grupong A1 na priority list ang mga ito.

Sinasabing sa 1,700 governors at mayors sa buong Pilipinas, nasa 400 ang nasa high risk at critical areas o nasa National Capital Region at sa mga karatig-lalawigan nito.

Batay naman sa guidelines sa pagbabakuna, makakatanggap ng AstraZeneca vaccine ang mga senior citizens habang Sinovac kung may edad 18 hanggang 59.

Muling binalaan ng Department of Transportation (DOTr) ang mga operators ng mga kolorum na sasakyan na itigil na ang ginagawa nilang paglabag sa batas at quarantine guidelines.

Ito’y makaraang mahuli ang 12 colorum vehicles sa magkakahiwalay na operasyon sa ilang lugar sa Bicol region noong Semana Santa.

Ayon kay DOTr Secretary Arthur Tugade, iniulat ng Bicol Provincial Disaster Risk Reduction Management Office o PDRRMO na umabot sa 79 indibidwal ang pumasok sa rehiyon mula Metro Manila habang lulan ng mga kolorum na sasakyan at nagpositibo pa sa COVID-19.

Giit ni Tugade, sa gitna ng nararanasang krisis ng bansa, mahalagang isantabi muna ng mga operators ang kanilang pansariling interes para isalba ang buhay ng nakararami.

Dalawa pang pulis ang pumanaw dahil sa COVID-19.

Dahil dito, sinabi ni PNP Deputy for Administration Lt. Gen. Guillermo Eleazar na sumampa na sa 40 ang death toll sa kanilang hanay.

Ayon kay Eleazar, ang mga pinakahuling nasawi ay pawang Police non-commissioned officers na nakatalaga sa National Capital Region Police Office o NCRPO.

Sa kasalukuyan, mahigit 2,000 na ang total active cases sa PNP.

Isang mensahe ng pag-asa at muling pagbangon.

Ito ang ipinarating ni Pangulong Rodrigo Duterte sa mamamayang Pilipino sa gitna ng nagpapatuloy na COVID-19 pandemic.

Sa kanyang Easter Sunday message, binati ng Pangulo ang lahat ng mga Kristiyanong Pinoy sa loob at labas ng bansa sa Pasko ng Pagkabuhay.

Ayon sa Punong Ehekutibo, sa kabila ng krisis na nararanasan ng lahat ay nakakubli ang walang hanggang pag-asa na hatid sa atin, katulad ng muling pagkabuhay ng dakilang mananakop.