Gilbert Perdez

Muling nilinaw ng Civil Service Commission (CSC) na saklaw ng expanded maternity leave law maging ang mga babaeng empleyadong may isang araw pa lamang nagtatrabaho sa gobyerno.

Paliwanag ni CSC Commissioner Aileen Lizada, dati ay kailangang nakadalawang taon muna serbisyo ang isang benepisyaryo ngunit nabago aniya ito bunsod ng inilabas na resolusyon ng ahensya para makasunod sa Republic Act 11210 o ang 105-Day Expanded Maternity Leave law.

Batay sa nilagdaang batas ni Pangulong Rodrigo Duterte noong 2019, bibigyan ng 105-day full pay maternity leave ang mga babaeng nanganak ng normal delivery o caesarian section habang 60-day full pay para sa ibang kaso tulad ng miscarriage o emergency termination.

Kasabay nito, nanawagan sa publiko si Lizada na bisitahin ang website ng CSC para sa karagdagang impormasyon ukol sa nasabing batas.

Hindi papatayin ang mga lokal na magbababoy sa pagbaba ng taripa sa inaangkat na baboy at pagtatakda ng suggested retail price o SRP dito.

Paliwanag ni Department of Agriculture (DA) spokesperson Noel Reyes, magkakaroon ng kakulangan sa supply ng karne kung hindi nila gagawin ang nasabing hakbang.

Bukod dito, wala rin aniyang maibigay na solusyon ang local hog industry para mapunan ang tatlong milyong populasyon ng baboy na nawala bunsod ng pagkalat ng African swine fever (ASF).

Sinabi ni Reyes na ang pagtatakda ng SRP at pagpapababa ng taripa ay paraan lang ng ahensya para mapababa rin ang presyo ng baboy sa merkado at matulungan ang mga konsumer sa gitna ng krisis.

Samantala, sang-ayon ang Philippine Amalgamated Supermarkets Association o PAGASA sa pagtanggal ng price cap sa lokal na baboy at manok at paglagay ngayon ng SRP sa imported pork na anila’y maituturing na emergency measures dahil pandemya at ASF.

Pinanindigan ni National Intelligence Coordinating Agency (NICA) Director-General Alex Paul Monteagudo ang kanyang pahayag na konektado di-umano sa mga komunista ang unyon ng mga empleyado ng Senado.

Ayon kay Monteagudo, hindi ‘red-tagging’ ang kanyang ginawa nang sabihin niyang ‘affilliated’ ang SENADO o “Sandigan ng mga Empleyadong Nagkakaisa sa Adhikain ng Demokratikong Organisasyon” sa labor group na COURAGE o Confederation for Unity, Recognition and Advancement of Government Employees.

Pinaratangan din ni Monteagudo ang COURAGE na ‘front’ umano ng Communist Party of the Philippines-New People’s Army-National Democratic Front o CPP-NPA-NDF.

Ibinabala pa ng opisyal na sa pamamagitan ng COURAGE ay posibleng magkaroon ng ‘access’ at magka-impluwensiya ang CPP-NPA sa SENADO sa pamamagitan ng pagsasagawa ng mga lecture at indoctrination.

Kinailangang limitahan ang mga public engagements ni Pangulong Rodrigo Duterte bunsod ng pagtaas ng COVID-19 cases sa bansa at pagpapatupad ng enhanced community quarantine (ECQ) sa NCR Plus.

Ito ang paliwanag ni Presidential Spokesperson Harry Roque matapos mabigo ang Presidente na makadalo sa paggunita ng Araw ng Kagitingan (Day of Valor) na ginanap sa Mr. Samat National Shrine sa Pilar, Bataan kahapon.

Matatandaang huling nakita ng publiko si Pangulong Duterte noong Marso 29 sa isang public address, gayundin sa pagdating ng isang milyong Covid-19 vaccine doses mula sa Sinovac Biotech ng China.

Hindi rin natuloy ang lingguhang ‘talk to the nation’ ng Pangulo noong Miyerkules makaraang tamaan ng coronavirus ang maraming miyembro ng Presidential Security Group (PSG).