Kasado na ang hard general community quarantine (HGCQ) sa Jones, Isabela bunsod ng dumaraming kaso ng COVID-19 sa lugar.
Nabatid na umabot na sa 358 ang kabuuang bilang ng mga tinamaan ng coronavirus sa nasabing bayan kung saan 134 ang aktibong kaso.
Ayon sa lokal na pamahalaan, epektibo ang HGCQ hanggang ika-30 ng Abril.
Aabot sa 81 ospital sa mga lalawigan ang makakatanggap ng mga ambulansya pagkatapos ng enhanced community quarantine (ECQ) sa Metro Manila at mga karatig-lalawigan.
Ayon kay Pitmaster Foundation Executive Director Atty. Caroline Cruz, nakatanggap na rin ng apat na ambulansya ang Culion Sanitarium sa Culion, Palawan; Batangas Provincial Hospital sa Batangas City; Bicol Regional Training and Teaching Hospital sa Legaspi City, Albay; at Eastern Samar Provincial Hospital sa Borongan, Eastern Samar.
Sinabi ni Cruz na nasa 78 ambulansya pa aniya ang nakatakdang ipamahagi ng foundation sa Southern Leyte Provincial Hospital, Ilocos Norte Provincial Hospital, Gov. Faustino Dy Sr. Memorial hospital, Marinduque Provincial Hospital, at iba pa.
Ayon kay Cruz, nais ng chairman ng foundation na si Charlie “Atong” Ang na makatulong sila para agarang mailipat ang mga pasyenteng may Covid-19 at magamot sa mga ospital sa mga nasabing lalawigan.
Patay ang limang indibidwal sa panibagong karahasan sa West Bengal, India.
Ayon sa pulisya, bukod sa mga nasawi, apat na iba pa ang sugatan sa pamamaril malapit sa isang polling station sa Cooch Behar district.
Matatandaang nagsimula ang halalan noong nakaraang buwan at matatapos ito sa Mayo kung saan isa sa mga may maraming botante ay ang West Bengal.
Patay ang tinatayang 125 katao habang sugatan naman ang 208 na iba pa sa panibagong karahasan sa Sudan.
Ayon sa ulat, nilusob ng mga armadong grupo ang mga ospital pero agad silang naitaboy ng mga pulis at sundalo sa Dafur region.
Sinasabing ito na ang pinakamatinding sagupaan na naganap mula nang mailatag ang peace agreement noong nakaraang taon.
Matatandaang nilisan ng United Nation peacekeepers ang Sudan matapos maisakatuparan ang usapang pangkapayapaan noong 2020.
Handang-handa na si IBF junior bantamweight champion Jerwin Ancajas sa kanyang laban kay Mexican banger Jonathan Javier Rodriguez bukas.
Ang bakbakan nina Ancajas at Rodriguez ay magaganap sa Mohegan Sun Casino Resort sa Uncasville sa Connecticut.
Kung papalarin laban kay Rodriquez, nais ni Ancajas na makasagupa sa ibabaw ng ring si dating pound-for-pound king Roman “Chocolatito” Gonzalez.
Naturukan na ng bakuna kontra Covid-19 si Alice Dixson sa Canada.
Sa isang post sa Instagram, ipinakita ng 51 taong gulang na aktres sa kanyang mga tagahanga ang isang band aid sa kanyang kanang braso na tanda na siya’y nabigyan na ng bakuna.
Ayon kay Dixson, sakaling magkaroon na sa Pilipinas ng vaccine ng Pfizer ay plano niyang dito na lamang i-avail ang isa pang shot ng bakuna dahil nasa biyahe na siya nang i-post ang nasabing larawan.
Pumanaw na ang mister ni Queen Elizabeth II na si Prince Philip.
Kasabay nito, kinumpirma ng Buckingham Palace sa London na biyuda na ang reyna kasunod ng payapang pagyao ng kanyang asawa sa edad na 99 sa Windsor Castle.
Sumailalim umano sa isang procedure ang prinsipe noong nakaraang buwan dahil sa kondisyon sa puso.
Matatandaang ikinasal si Prince Philip kay Princess Elizabeth noong 1947 o limang taon bago siya kinilalang Queen o reyna.
Ang mag-asawa ay nabiyayaan ng apat na anak, walong apo at sampung apo sa tuhod.
Ang kanilang unang anak ay si Prince Charles na ipinanganak noong 1948 at sinundan ito ng kapatid niyang si Princess Anne noong 1950.
Isinilang naman ang isa pa nilang supling na si Prince Andrew noong 1960 habang si Prince Edward na bunso ay ipinanganak noong 1964.
Samantala, nagpaabot ng pakikiramay si Pangulong Rodrigo Duterte sa pagkamatay ni Prince Philip.
Ayon kay presidential spokesperson Harry Roque, nakikiisa ang pilipinas sa mga bansa sa buong mundo sa pagluluksa sa pagkawala ng prinsipe ng Britanya.
Maglulunsad ng isang programa ang Philippine General Hospital (PGH) na tutulong sa mga pasyenteng may COVID-19.
Bukod dito, ayon kay PGH spokesman Dr. Jonas Del Rosario, magagabayan din nito ang mga pasyente kung paano haharapin ang sakit, kasama na rito kung kailan kinakailangang dalhin ito sa pagamutan.
Sa pamamagitan aniya ng “OPLAN: COVID-Gabay” ay malalaman ng mga may sakit o ng mga nag-aalaga sa kanila ang mga dapat gawin para maisalba ang buhay ng pasyente.
Kasalukuyan, sinasabing naghahanap pa ang PGH ng mga volunteer para sa nasabing programa.
Hinihinalang pumanaw dahil sa COVID-19 ang isang miyembro ng Manila Police District (MPD) kahit nabakunahan ito laban sa nasabing sakit.
Kinilala ang biktima na si Police Staff Sergeant Senen delos Santos Evangelista, nakatalaga sa MPD Traffic Enforcement Unit (MPD-TEU), na namatay noong Huwebes ng hapon.
Nabatid naman na nakatanggap ng Sinovac vaccine si Evangelista noong March 31, 2021.
Gayunman, noong Miyerkules ay isinugod ito sa Skyline Medical Center sa Bulacan dahil sa lagnat, ubo, at sipon kung saan binawian ito ng buhay makaraan ang ilang oras.
Batay naman sa datos ng MPD, nasa 817 na ang mga tinamaan ng impeksiyon sa kanilang hanay, 712 ang nakarekober at apat naman ang namatay, kabilang si Evangelista.
Hindi suportado ng datos o siyentipikong basehan ang sinasabing bisa ng anti-parasitic drug na Ivermectin.
To ang binigyang diin ni Dr. Edsel Salvana na isang infectious disease matapos pagkalooban ng compassionate use permit ng Food and Drug Administration (FDA) ang Ivermectin bilang lunas laban sa COVID-19 sa isang partikular na ospital.
Giit ni Salvana, kilala ang Ivermectin sa South America bilang gamot kontra bulate at iba pang parasitiko ngunit marami aniyang gumagamit dito laban sa coronavirus dahil sa pagiging desperado.
Paliwanag ng eksperto, kung ang pagbabasehan ay ang mga datos, lumalabas na hindi ito uubra sa COVID-19.
Bunga nito, muling ibinabala ni Salvana na maaaring magdulot ng side effects ang Ivermectin sa sinumang iinom o gagamit dito.