100 sanggol ang sabay-sabay na bininyagan sa Cebu City.
Naganap ang binyagan sa Our Lady of Guadalupe Archdiocesan Shrine sa pangunguna ni Archbishop Jose Palma, kasama ang iba pang mga obispo.
Kasabay ng kapistahan ng Divine Mercy, sinasabing ang event ay bahagi rin ng paggunita sa unang araw ng triduum o ang tatlong araw na paghahanda para sa ika-500 taon ng kauna-unahang binyag sa Cebu ng grupo ni Portuguese explorer Ferdinand Magellan.
Niragasa ng baha ang ilang bahagi ng rehiyon ng Davao ngayong weekend bunga ng easterlies o hangin mula sa Pasipiko na nagdulot ng halos walang tigil na pag-ulan.
Sa Barangay San Miguel, Santo Tomas, Davao del Norte ay lumubog sa baha ang mga kalsada.
Sinasabing mahigit 1,000 pamilya ang apektado ng malawakang baha sa nasabing rehiyon.
Isa na namang high-value target ang nasawi makaraang manlaban umano sa mga awtoridad sa isinagawang buy-bust operation sa Tagum City, Davao Del Norte.
Ayon sa Philippine Drug Enforcement Agency (PDEA), nakatunog si Alihul Kamsa na mga pulis ang kanyang ka-transaksiyon kaya’t napatay ito sa Barangay Magugpo West.
Sinasabing idineklarang dead on arrival sa ospital si Kamsa na nakuhanan ng tatlong gramo ng hinihinalang shabu at isang baril.
Kilala umanong tulak ng droga sa lugar ang napatay na suspek.
Pumalo na sa 1,083 ang bilang ng mga Pilipino sa labas ng bansa na nasawi dahil sa COVID-19.
Ito’y dahil ayon Department of Foreign Affairs, may labing-apat pang Pinoy na pumanaw sa Gitnang Silangan at nadagdag sa nasabing listahan.
Bunsod naman ng labimpito pang bagong kaso mula sa Middle East, umabot na sa 17,099 ang kabuuang bilang ng mga Pinoy abroad na tinamaan ng virus.
Nananatili naman sa 10,122 ang total recoveries sa hanay ng mga Pinoy sa ibayong dagat dahil walang nadagdag sa nasabing bilang.
Tutugisin ng Philippine National Police-Criminal Investigation and Detection Group (PNP-CIDG) ang mga hindi lisensyadong nagbebenta ng Ivermectin.
Ito’y bilang suporta umano sa crackdown ng Food and Drug Administration (FDA) laban sa mga unregistered sellers ng nasabing anti-parasite drug.
Ayon kay CIDG chief Maj. Gen. Albert Ignatius Ferro, nakatanggap sila ng impormasyon na may mga nagbebenta pa rin ng Ivermectin sa merkado kahit ito ay inaprubahan lamang ng FDA para sa mga hayop.
Nanawagan na rin aniya ang FDA sa mga lokal na pamahalaan na tiyaking hindi maibebenta ang ivermectin sa kanilang mga nasasakupan.
Tumaas ang bilang ng mga nahahatulan sa mga kasong may kaugnayan sa online sexual exploitation of children o OSEC noong 2020.
Ito ang ipinagmalaki ng Department of Justice (DOJ) matapos mapaulat na dumami ang bilang ng mga naitalang kaso ng pang-aabuso sa mga menor de edad noong nakaraang taon.
Ayon kay DOJ spokesperson Undersecretary Emmeline Aglipay-Villar, halos doble ang itinaas ng convictions o mga nabibilanggo sa mga kasong may kinalaman sa child abuse, child pornography, photo & video voyeurism, cybercrime, rape, acts of lasciviousness, at Article 201 ng Revised Penal Code o indecent shows/publications.
Karamihan aniya sa isang daang na-convict noong isang taon ay natamo bunsod ng plea bargaining kaya’t napabilis ang proseso ng pagbasura sa kaso.
Dalawa pang alagad ng batas ang nasawi dahil sa COVID-19.
Dahil dito, ayon sa Philippine National Police (PNP), umakyat na sa 44 ang death toll sa kanilang hanay.
Sa kasalukuyan, nasa 2,400 na ang active cases sa PNP dahil sa 233 na bagong impeksiyon habang sumirit na sa 17,194 ang kabuuang bilang ng mga kumpirmadong kaso sa pambansang pulisya.
Bunga naman ng 278 na bagong recoveries, pumalo na sa 14,751 ang total recoveries sa PNP.
Patay ang tatlong drug suspects habang nasabat naman ang P81 million na halaga ng hinihinalang shabu sa magkahiwalay na operasyon sa mga lungsod ng Parañaque at Pasay.
Sa West Service Road sa Barangay Sun Valley, Parañaque, kinilala ang nasawi na si Richard Gumande Abusama matapos manlaban sa mga awtoridad.
Narekober sa pinangyarihan ng insidente ang limang kilo ng umano’y shabu na tinatayang nagkakahalaga ng P34 milyon na nakasilid sa mga tea bags, kasama na rito ang marked money, isang short firearm, at isang Mitsubishi hatchback.
Sa Barangay 201 sa Pasay, napatay naman sina Sekan Lataban Unotan at Zuharto Lataban Sanday habang nakuha sa lugar ang pitong kilong shabu na nagkakahalaga ng P47.6 milyon na nakasilid sa mga tea bags, dalawang short firearms, at isang kulay brown na Mitsubishi AUV.
Ayon sa pulisya, ang mga nasawing suspek ay pawang mga kilalang supplier ng droga sa Metro Manila at mga karatig-lalawigan.
Hinamon ni Chief Presidential Legal Counsel Salvador Panelo ang ilang sendor na i-donate ang kanilang isang buwang sahod para pandagdag sa P1,000 ayuda sa mga apektado ng enhanced community quarantine (ECQ) sa NCR Plus.
Ginawa ni Panelo ang pahayag matapos batikusin nina Senators Nancy Binay, Risa Hontiveros, Imee Marcos, Joel Villanueva, at Panfilo “Ping” Lacson ang anila’y hindi sapat na cash aid program ng gobyerno.
Giit ni Panelo, kung talagang may malasakit ang mga senador sa taumbayan, dapat magmumula sa mga ito ang dagdag-ayuda para sa mga mahihirap na mamamayan.
Ipinanawagan ng pamahalaang panlalawigan ng Negros Occidental na i-akyat sa general community quarantine (GCQ) ang kanilang lugar mula sa kasalukuyang MGCQ.
Ayon sa mga lokal na opisyal, nagkakaroon ng “overwhelming spike” ng COVID-19 cases sa probinsya kaya dapat lamang itong aksiyunan ng Western Visayas Regional Inter-Agency Task Force (RIATF) at Regional Task Force (RTF) for Covid-19.
Sa kabuuang, sinasabing mayroon nang 2,939 active cases sa Western Visayas.
Batay naman sa panibagong quarantine status na inanunsiyo ni Presidential Spokesperson Harry Roque, nasa MGCQ pa rin ang Negros Occidental hanggang Abril 30.