Gilbert Perdez

Uuwi na sa bansa sa Abril 19 ang 10 pinalayang Pinoy na manlalayag na dinakip sa Gulf of Guinea.

Ayon sa Department of Foreign Affairs (DFA), pinakawalan noong Abril 11 ang mga Pinoy isang buwan matapos maiulat ang pagdukot sa mga ito.

Ang mga Pinoy bahagi ng labinlimang crew members ng chemical tanker na “Davide B” na inatake ng mga armadong lalaki at dinukot sa baybayin ng Benin sa nasabing gulpo.

Hindi naman kasama sa mga dinakip ang anim na iba pang Filipino crew kaya’t nakauwi ang mga ito noon pang Abril 3.

Nabatid na lalapag ang mga Pinoy sa Clark International Airport mula Amsterdam via Qatar Air.

Umabot na sa mahigit 30 milyong libreng face masks ang naipamahagi ng gobyerno.

Ayon kay Department of Trade and Industry (DTI) Secretary Ramon Lopez, ito’y upang matiyak na nasusunod ang health standards sa mga mahihirap na komunidad sa bansa.

Sa ilalim ng “Libreng Masks para sa Masa” project ng Office of the President, mahigit 16.24 million face masks pa ang ipamimigay nang libre ng pamahalaan sa mga susunod na linggo.

Gumaling na sa COVID-19 ang nasa 212 train workers mula sa apat na railway services sa Metro Manila.

Ayon sa Department of Transportation (DOTr), 739 ang active cases sa 8,277 na empleyado ng Light Rail Transit Line 1 (LRT-1), Light Rail Transit Line 2 (LRT-2), Metro Rail Transit Line 3 (MRT-3), at Philippine National Railways (PNR).

Sinasabing sumalang na sa COVID-19 test ang nasa 5,331 na ang mga empleyado ng LRT, MRT at PNR.

Naisagawa umano ang mass testing sa pamamagitan nang paglimita sa operasyon ng MRT-3 na nasa 15 tren, 22  tren sa LRT 1 at 2 at 10 hanggang 12 tren sa PNR.

Nabatid na pinaikli rin ang operasyon ng LRT-2 kung saan ginawa na itong 6 A.M. hanggang 6 P.M., mula Abril 17 hanggang 30.

Magsasagawa ng nationwide online job fair at job summit ang Department of Labor and Employment (DOLE) sa Mayo 1 o Labor Day.

Ayon kay Labor Assistant Secretary Dominique Tutay, katuwang nila sa mga nasabing aktibidad ang kanilang regional offices, Public Employment Service Offices (PESO) ng mga lokal na pamahalaan at maging ang pribadong sektor.

Sinabi ni Tutay na layon ng job summit na makabangon ang labor sector at matulungan ang mga nawalan ng trabaho sa gitna ng pandemya.

Para sa mga dagdag na detalye, maaari aniyang puntahan ng publiko ang Trabaho Negosyo Kabuhayan (TNK) web page sa ilalim ng Bureau of Local Employment (BLE) na ble.dole.gov.ph.

Samantala, muling nilinaw ng opisyal na lahat ng event sa araw ng panggawa ay gagawin online dahil ipinagbabawal pa rin ang mass gatherings bunsod ng mataas na bilang ng COVID-19 cases sa bansa.

Mahigit 250,000 manggagawa sa tourism sector ang nakatanggap na ng ayuda sa ilalim ng COVID-19 Adjustment Measures Program (CAMP) ng Department of Labor and Employment (DOLE).

Ayon kay Labor Assistant Secretary Dominique Tutay ng Employment and General Administration Cluster ng DOLE, kabilang ang mga nasabing tourism workers sa mga nakinabang sa pondo ng CAMP na nagkakahalaga ng P1.26 bilyon.

Ipinagmalaki ni Tutay na mayroon pang tinatayang P1 bilyong na pondo para sa turismo at kanila itong ilalaan sa mahigit 200,000  pang manggagawa sa nabanggit na sektor.

Sa ilalim ng CAMP, makakatanggap ng one-time cash assistance ang bawat benepisyaryo na nagkakahalaga ng P5,000.

Pinuri ni Presidential Communications Operations Office (PCOO) Secretary Martin Andanar ang Inter-Agency Task Force for the Management of Emerging Infectious Diseases (IATF-EID) matapos isama ang mga media workers sa A4 priority group para sa vaccination program ng gobyerno.

Ayon kay Andanar, patunay lamang ito na nais ng pamahalaan na matiyak ang kaligtasan at seguridad ng mga mamamahayag lalo na ngayong panahon ng pandemya.

“The media should truly be included in the A4 priority group, along with other individuals who play a significant part in our seamless and uninterrupted societal activities. We have seen firsthand the importance of their work in delivering news and information to every household, especially when the pandemic started to unfold and interrupted traditional work arrangements,” pahayag ni Andanar.

Matatandaang inirekomenda sa IATF nina Andanar Presidential Task Force on Media Security (PTFoMS) Executive Director Joel Sy Egco na gawing prayoridad sa pagbabakuna ang mga media workers.

Isa pang mega-vaccination hub ang binuksan sa Taguig City na sinasabing kayang maserbisyuhan ang isang libong residente kada araw.

Ayon sa Taguig LGU, matatagpuan ang kanilang ika-pitong pasilidad sa SM Aura sa Bonifacio Global City kung saan ininspeksiyon na rin ito ng mga opisyal ng National Task Force (NTF) Against COVID-19.

Samantala, nabakunahan na umano ang nasa 95 percent ng mga healthcare workers sa nasabing lungsod.

Dapat lumahok ang Pilipinas sa paglalayag o freedom of navigation patrols ng ibang bansa para ipakita na may karapatan ang mga Pilipino sa West Philippine Sea.

Bukod dito, ayon kay retired Supreme Court Associate Justice Antonio, mahalagang idulog muli ang usapin sa isang arbitral court, partikular ang napaulat na panibagong pangha-harass ng mga Tsino sa mga mangingisdang Pinoy sa rehiyon.

Ayon kay Carpio, nilabag ng mga barko ng China ang international law nang habulin nito ang isang Filipino boat na may sakay na mga mangingisda at news crew lalo pa’t nangyari ito sa mismong exclusive economic zone o EEZ ng bansa.

Isiniwalat din ng dating mahistrado na may nilagdaang agreement ang Pilipinas bago naupo si Pangulong Rodrigo Duterte na may kaugnayan sa ‘freedom of navigation patrols’ ngunit hindi umano ito naipatutupad ng kasalukuyang administrasyon laban sa China.