Nasungkit ng Dallas Mavericks ang come-from-behind victory laban sa Los Angeles Lakers sa score na 108-93.
Naghabol ng 17 points ang Mavs sa unang bahagi ng laro.
Ngunit sa tulong ni Luka Doncic at iba pang pambato ng Dallas ay dahan-dahan silang nakabangon at nakuha pa ang panalo sa dulo ng laban.
Kumamada si Doncic ng 18 points at eight rebounds habang nagdagdag si Dwight Powell ng 25 points at nine rebounds.
Labis ang pasasalamat ng samahan ng mga gobernador ng Pilipinas sa isang grupo dahil sa mga ambulansya na ibinigay nito sa bawat probinsya.
Pahayag ni Gov. Presbitero Velasco, Pangulo ng League of Provinces of the Philippine (LPP), kailangang-kailangan ng mga karagdagang ambulansya para magamit ng mga ospital sa mga lalawigan.
Sinabi ni Velasco na isang text lang ang ginawa nila sa Pitmaster Foundation at ipinadala agad ang mga ambulansya.
Sinasabing 81 o bawat lalawigan ang binigyan ng ambulansya ng nasabing foundation.
Ayon naman kay Pitmaster Foundation chairman Charlie “Atong” Ang, walo na ang nai-deliver sa mga lalawigan pero natigil lamang ang paghahatid sa mga nasabing medical transportation dahil sa modified enhanced community quarantine (MECQ).
Sinabi ni Ang na nais lamang nilang makatulong sa gobyerno sa laban nito kontra COVID-19.
Niyanig ng magnitude 4.9 na lindol ang Davao Occidental.
Ayon sa Phivolcs, naitala ang pagyanig sa layong 96 kilometro sa timog silangan ng bayan ng Sarangani.
Sinasabing ‘tectonic’ ang pinagmulan ng nabanggit na lindol.
Kasabay nito, nagkaroon din ng magnitude 4.8 na lindol sa lalawigan ng Zambales.
Wala namang naitatalang pinsala at inaasahang aftershocks sa mga nasabing pagyanig.
Nasawi ang 13 COVID-19 patients sa sumiklab na sunog sa isang ospital sa Mumbai, India.
Ayon sa ulat, nag-umpisa ang sunog sa Intensive Care Unit o ICU ng Sharda Hospital sa Greater Noida city.
Sa labimpitong pasyente na nasa loob ay apat lamang ang nakaligtas na agad na inilipat sa mga katabing ospital.
Nabatid na sa loob lamang ng isang araw ay nakapagtala ang India ng higit tatlong daang libong COVID-19 infections.
Hindi bababa sa 240 grams ng hinihinalang shabu na nagkakahalaga ng mahigit P1.6 million ang naharang ng mga awtoridad sa isang warehouse sa Pasay City.
Ayon sa Bureau of Customs (BOC), katuwang ang Philippine Drug Enforcement Agency (PDEA) at NAIA Inter-Agency Drug Interdiction Task Group (NAIA-IADITG) ay napigilan nila ang bulto-bultong droga na tinangkang ipasok sa bansa at nakasilid sa mga pakete ng tsaa.
Sinasabing mula Malaysia, ipinadala ng isang “Yong Lee Chei” sa isang consignee naman sa Caloocan ang nasabing kargamento na idineklara umanong “assorted” na pagkain.
Mariing itinanggi ng Malacañang na nagkaroon ng fishing agreement sa pagitan nina Pangulong Rodrigo Duterte at Chinese President Xi Jinping.
Ang pahayag ay ginawa ni Presidential Spokesperson Harry Roque matapos isiwalat ni dating Supreme Court Associate Justice Antonio Carpio na kaya nananatili sa West Philippine Sea ang mga barko ng China ay dahil sa umano’y verbal deal.
Ayon kay Roque, walang basehan ang nasabing statement ni Carpio at ito aniya’y haka-haka lamang.
Matatandaang sinabi ni Carpio na batay sa batas, ang isang fishing agreement ay maaari lamang umanong pasukin ng Pangulo sa pamamagitan ng isang treaty o tratado.
Patay ang isang lalaki habang dalawang iba pa ang nawawala matapos sumiklab ang sunog sa 3rd Avenue sa lungsod ng Caloocan kagabi.
Ang biktima ay nakilala lamang sa pangalang “Ronald” na sinasabing na-trap sa nasunog nilang tahanan sa Barangay 118.
Batay sa imbestigasyon ng Bureau of Fire Protection o BFP, nagsimula ang sunog sa tatlong palapag na bahay sa lugar.
Dahil dikit-dikit ang mga bahay na gawa sa light materials ay mabilis na kumalat ang apoy sa mga katabing istraktura.
Umabot sa ikalawang alarma ang sunog at idineklara itong fire out bandang alas-9:52 na ng gabi.
Tinatayang aabot hanggang 30 bahay ang apektado habang inaalam pa ang kabuuang halaga ng mga ari-ariang napinsala sa nasabing sunog.
Muling pinanindigan ng Bureau of Corrections (BuCor) ang desisyon nitong isara ang access road na nasa tabi ng New Bilibid Prison (NBP) sa Muntinlupa City.
Ayon kay Justice Secretary Menardo Guevarra, matapos ang pagpupulong noong Abril 16 sa pagitan ng mga opisyal ng Department of Justice (DOJ), BuCor, at ilang local government officials ay napagkasunduan din na magkakaroon ng ocular inspection pagkatapos ng modified enhanced community quarantine o MECQ sa National Capital Region at iba pang lalawigan.
Paliwanag ni Guevarra, pinag-aaralan pa lamang nila ang legalidad ng paglalagay ng Bucor ng harang sa Insular Prison Road na ginagamit ng mga residente.
Matatandaang binigyang diin ni BuCor Director Gerald Bantag na bukod sa health concerns ay isinaalang-alang din nila sa pagsasara ng kalsada noong Marso 20 ang kaligtasan at seguridad ng mga nakatira sa NHA-Southville3 na sakop ng Barangay Poblacion.
Patuloy na tumataas ang bilang ng mga tinatamaan ng COVID-19 sa hanay ng Philippine National Police (PNP).
Ito’y ayon sa Administrative Support to COVID 19 Operations Task Force o ASCOTF matapos makuha ang datos mula sa PNP Health Service.
Nabatid na nasa 201 ang mga nadagdag sa bago nilang kaso dahilan para umabot sa 19,298 ang kabuuang bilang ng mga ito.
Sa nasabing bilang, 2,133 ang mga aktibong kaso matapos naman madagdagan ng 190 ang hanay ng bagong gumaling kaya’t umakyat na sa 17,113 ang total recoveries.
Samantala, kinumpirma naman ni ASCOTF Commander at Deputy Chief PNP for Administration Police Lt. Gen. Guillermo Eleazar na nadagdagan pa ng isa ang nasawi dahil sa COVID-19 sa PNP dahilan upang sumampa sa 52 ang death toll.
Ang nasawi aniya ay isang 50-anyos na police commissioned officer na nakatalaga sa Police Regional Office 3 o Central Luzon at nasawi noong Miyerkules, Abril 21. —ulat mula kay Jaymark Dagala (Patrol 9)
Tinatayang aabot sa 1.2 bilyong halaga ng iligal na droga ang nasabat ng National Capital Region Police Office (NCRPO) sa nakalipas na limang buwan.
Sinasabing ito’y sa gitna na rin ng mas pinaigting pang war on drugs ng Phil. National Police sa kasagsagan ng COVID-19 pandemic.
Pahayag ni NCRPO Director, Police Major Gen. Vicente Danao Jr., aabot sa 4,618 ang ikinasang anti-illegal drugs mula Nobyembre 11, 2020 hanggang Abril 15, 2021 kung saan ay nasa 7, 941 ang bilang ng mga naaresto.
Kabilang naman sa mga nasabat ang may 175 kilo ng hinihinalang shabu, 329 kilo ng marijuana, gayundin ang nasa 884 tableta at 300 ml ng liquid ecstacy.
Kasabay nito, pinapurihan ni Danao ang mga pulis na nasa likod ng mga nasabing operasyon kasabay ng pagtitiyak sa publiko na sa anumang panahon at pagkakataon ay may mga operasyon na isinasagawa ang Team NCRPO tungo sa tahimik, payapa at drug-free na Metro Manila. —ulat mula kay Jaymark Dagala (Patrol 9)