Gilbert Perdez

Muling nanawagan ang Armed Forces of the Philippines (AFP) sa Kongreso na baguhin ang procurement process upang mapadali na ang pagbili ng mga bagong kagamitan sa ilalim ng modernization program.

Ito’y matapos aminin ni AFP Chief of Staff Gen. Cirilito Sobejana na kulang ang kanilang mga barko para epektibong mabantayan ang Exclusive Economic zone ng bansa sa West Philippine Sea.

Paliwanag ni Sobejana, sa sobrang lawak ng kanilang kailangang i-patrolya, aabutin aniya ng tatlong buwan ang isang barko para malibot lang ang buong karagatan ng bansa.

Sa ngayon aniya ay may sampung barko na ang Philippine Navy na naka-deploy sa West Philippine Sea at malaking tulong ang karagdagang mga barko ng Philippine Coast Guard, Bureau of Fisheries and Aquatic Resources at patrol vessels ng PNP Maritime Group.

Gayunman, kulang pa rin aniya ang mga nasabing barko.

Giit ni Sobejana, gusto man aniya nilang makabili ng mas maraming bagong barko, napakatagal ng proseso nito dahil masyadong istrikto ang Republic Act 9184 o Government Procurement Reform Act.

Kasabay nito, nanawagan din si Sobejana sa mga mambabatas na dagdagan na rin ang pondo para sa AFP modernization program.

Hindi na kailangan o unnecessary ang panukalang obligahin ang publiko na magsumite ng police clearance sa pakikipag-transaksiyon sa Department of Labor and Employment (DOLE).

Ginawa ni Department of Justice Secretary Menardo Guevarra ang paglilinaw matapos manawagan sa DOLE si PNP chief Gen. Debold Sinas na isama ang nasabing requirement bilang suporta na rin sa National Police Clearance System (NPCS).

Paliwanag ni Guevarra, bagama’t hindi naman illegal ang mungkahi ni Sinas, maaaring makadagdag lang aniya ito sa pasanin ng publiko at magpapalala sa posibleng red tape sa gobyerno.

Hindi umano sinisisi ni Pangulong Rodrigo Duterte ang mga Arab countries sa hinihinalang iregularidad sa implementasyon ng Kafala system.

Ito ang nilinaw ni Presidential Assistant on Foreign Affairs Undersecretary Robert Borje ilang araw matapos manawagan si Duterte sa ilang bansa sa Gitnang Silangan na buwagin ang nasabing sistema.

Ayon kay Borje, nais lamang ng Presidente na matiyak na ang lahat ng mga Pilipinong manggagawa sa ibayong dagat ay napoprotektahan laban sa anumang uri ng pang-aabuso at exploitation o pananamantala.

Batay sa kafala system, kailangang may sponsor muna ang manggagawang Pinoy sa pupuntahang bansa bago iisyuhan ng visa at worker’s permit.

Kabilang sa mga nagpapatupad ng nabanggit na patakaran ay ang Bahrain, Kuwait, Lebanon, Qatar, Oman, Saudi Arabia, at United Arab Emirates (UAE).

Samantala, sinabi ni Borje na malaki ang tsansang mabubuwag nang tuluyan ang naturang labor system.

Nanawagan ang isang mambabatas sa Department of Health (DOH) at Department of Science and Technology (DOST) na bilisan ang pagsasagawa ng clinical trials sa paggamit ng ivermectin bilang gamot kontra coronavirus disease 2019 (COVID-19).

Ayon kay Anakalusugan Party-list Rep. Mike Defensor, tanging ang nasabing anti-parasitic drug lamang ang nakikita nilang alternatibong gamot para sa mga mahihirap na may COVID-19.

Giit ni Defensor, hindi maabot ng mga mahihirap na Pinoy ang halaga ng Remdesivir at Tocilizumab na karaniwang inirerekomenda para sa mga malubhang kaso ng coronavirus.

Naglaan ang pamahalaan ng P1 trilyon para sa employment recovery action plan sa ilalim ng National Employment Recovery Strategy (NERS).

Ito ang ipinagmalaki ni Labor Assistant Secretary Dominique Tutay na aniya’y kasama sa alokasyon ng iba’t ibang ahensya na nakapaloob naman sa 2021 General Appropriations Act o GAA.

Ayon kay Tutay, itinutulak din nila ang karagdagang P24 bilyon para sa programa na pakikinabangan ng tinatayang 1.4 milyong Pilipino.

Gayunman, nilinaw ng opisyal na ang pondo ay hindi ibibigay bilang trabaho job opportunities kundi bilang wage subsidy at training programs para sa mga benepisyaryo.

Inaasahang bubuksan ngayong araw, Abril 24 ang isang malaking vaccination hub sa Muntinlupa City.

Ayon kay Public Information Office Chief Tez Navarro, ang pasilidad ay pasisinayaan sa Ayala Malls South Park (Alabang) sa pangunguna ni Mayor Jaime Fresnedi.

Nagpasalamat naman si Fresnedi sa pamunuan ng mall sa pagbibigay nito ng puwang para sa vaccination program ng lungsod.

Sinasabing kayang ma-accommodate ng vaccination hub ang tinatayang 500 residente mula sa mga barangay ng Alabang, Bayanan, at Putatan.

Magkakaroon din umano ng karagdagang vaccination hubs sa iba pang mall sa lungsod sa mga susunod na linggo.

Maliban dito, may libreng sakay din na handog ang Munti LGU para sa mga babakunahan.

Muling pinaalalahanan ni Interior Secretary Eduardo Año ang mga community pantry organizers na makipag-ugnayan sa mga opisyal ng barangay sa pamamahagi nila ng ayuda.

Ayon kay Año, ito’y upang matiyak na nasusunod ang health at safety protocols habang namimigay sila ng tulong sa mga nangangailangan.

Kung si Año naman ang tatanungin, dapat din aniyang imbestigahan ng Philippine National Police (PNP) ang pagkamatay ng isang taho vendor habang pumipila sa community pantry ng aktres na si Angel Locsin sa Barangay Holy Spirit, Quezon City.

Balak din umano ng mga opisyal ng barangay na maghain ng reklamo laban kay Locsin dahil sa sinasabing paglabag sa health protocols na ipinatutupad ng Inter-Agency Task Force (IATF).

Ikinalungkot ng Quezon City government ang pagkamatay ng isang 67-anyos na taho vendor matapos pumila sa community pantry na inorganisa ng aktres na si Angel Locsin.

Dahil dito, muling nagpaalala ang QC LGU sa mga organizer na makipag-ugnayan sa mga lokal na opisyal ukol sa kanilang aktibidad.

Magugunitang hinimatay umano ang biktimang si Rolando dela Cruz habang pumipila sa pantry ng aktres sa Barangay Holy Spirit kung saan idineklara itong dead on arrival sa ospital.

Agad namang nag-sorry si Locsin sa nangyari at aniya’y bahagi lang sana iyon ng pagdiriwang ng kanyang ika-36 na kaarawan.