Gilbert Perdez

Sumampa na sa 11,142 ang bilang ng mga Pilipinong gumaling sa COVID-19 sa ibayong dagat.

Ayon sa Department of Foreign Affairs (DFA), ito’y bunsod ng 1,020 na bagong recoveries.

Sa kasalukuyan, nasa 5,884 ang aktibong kaso habang pumalo naman sa 1,115 ang death toll kasunod ng pagpanaw ng 47 pang Pinoy sa labas ng bansa.

Pinakarami ang mga naitalang recoveries sa Gitnang Silangan na sinundan ng Asia Pacific, Europa, at Amerika.

Nakauwi na sa bansa ang tatlong Pinay na nabiktima ng human trafficking sa Syria.

Ang hindi pinangalanang mga biktima ay sinalubong ng mga kinatawan ng

Department of Foreign Affairs, Overseas Workers Welfare Administration, Department of Social Welfare and Development, Inter-Agency Council Against Trafficking, Bureau of Immigration at Philippine Coast Guard.

Nabatid tutulungan din ng gobyerno ang mga ito sa pagsasampa ng mga kasong paglabag sa Anti-Human Trafficking in Persons Act at Migrant Workers Act laban sa kanilang mga recruiters.

Dalawa pang pulis ang iginupo ng COVID-19.

Dahil dito, ayon kay PNP deputy chief for administration Lt. Gen. Guillermo Eleazar, pumalo na sa 51 ang bilang ng mga nasawi sa Pambansang Pulisya.

Sumampa naman sa 16,204 ang recoveries sa PNP matapos gumaling ang

169 pang alagad ng batas.

Sinabi ni Eleazar na nakapagtala rin sila ng 125 na bagong COVID-19 cases kaya’t sumampa na sa 18,531 ang kabuuang bilang ng mga tinamaan ng virus sa kanilang organisasyon.

Itinutulak ng isang mambabatas na gawing mandatory ang pagkakaroon ng bank account ng bawat Pilipino.

Sa ganitong paraan, ayon kay Sen. Sherwin Gatchalian, ay mapapabilis at magiging episyente ang pamamahagi ng ayuda ng gobyerno sa hinaharap.

Giit ni Gatchalian, dahil sa national ID system ay dapat na ring ikonsidera bilang basic requirement sa lahat ng mga Pinoy ang pagbubukas ng bank account anuman ang katayuan nito sa lipunan.

Isinusulong sa Kongreso ang pagkakaloob ng tax benefits sa mga pribadong korporasyon at mayayamang indibidwal na mag-i-sponsor ng bakuna para sa 933,000 teachers at 23 million students sa mga pampublikong paaralan.

Batay sa House Bill 9200,  maaaring makabawi ang mga private entities ng 150% sa kanilang ginastos sa bakuna sa pamamagitan nang pagbabawas nito sa babayaran nilang buwis sa gobyerno.

Maliban dito, layon din ng panukala na maisama ang mga COVID-19 vaccines bilang donasyon sa ilalim ng Adopt-a-School Program.