Gilbert Perdez

Namemeligrong managot sa batas ang may-ari ng barko na umano’y nagpakawala ng wastewater o maruming tubig sa Manila Bay.

Ayon kay Manila Bay Coordinating Office Deputy Executive Director Jacob Meimban, sinasabing nakuhanan ng mga vlogger ang pagpapakawala ng barko na hinihinalang sanhi kaya’t nagkulay-kalawang ang malaking bahagi ng look sa tapat ng Baywalk.

Agad namang kumuha ng water sample ang Manila Bay Coordinating Office, Philippine Coast Guard at Metropolitan manila Development Authority upang matukoy kung may halong langis ang wastewater at kung ano ang magiging epekto nito sa mga lamang tubig.

 Depensa naman ng oiler ng sea vessel na si Escolastico Bunyi, matagal nang nakatengga sa lugar ang kanilang barko dahil nasiraan lamang ito.

Ngunit habang iniimbestigahan ang insidente ay naka-hold muna ang nabanggit na barko.

Wala sa lugar at iresponsable.

Ganyan inilarawan ni Vice President Leni Robredo ang ginagawa ng ilang opisyal ng gobyerno na umano’y sangkot sa ‘red-tagging’ sa mga organizer ng community pantries sa bansa, kabilang na si Ana Patricia Non.

Giit ni Robredo, nakalulungkot isipin na sa halip na magpasalamat at matuwa sa mga taong tumutulong sa kapwa ay hinahanapan pa ng mali at butas ng mga ito.

Matatandaang iginiit ni Secretary Hermogenes Esperon, Jr. na bawal nang magsalita ang mga opisyal at miyembro ng National Task Force to End Local Communist Armed Conflict (NTF-ELCAC) matapos itong magpalabas ng ‘gag order’ ukol sa nasabing usapin.

Mahigit kalahating milyong pisong halaga ng droga ang nakumpiska mula sa tatlong indibidwal sa ikinasang buy-bust operation sa Quiricada Street, Santa Cruz, Maynila.

Pahayag ni Lt. Col. John Guiagui, hepe ng Santa Cruz police station, kabilang sa mga naaresto ang isang “alyas Atong”, gayundin ang isang 28- anyos na saleslady at 40-anyos na driver.

Aabot sa 680,000 pesos na halaga ng hinihinalang shabu ang nasabat mula sa mga suspek na ngayo’y nahaharap sa kasong paglabag sa comprehensive dangerous drugs act of 2002.

Umabot na sa 30,000 ang bilang ng mga indibidwal na nabakunahan kontra COVID-19 sa Pasig City.

Ayon kay Mayor Vico Sotto, nabigyan na rin ng initial doses ang labing-apat na porsiyento ng mga senior citizens sa lungsod.

Ngunit sinasabing nauubusan na umano sila ng supply ng bakuna.

Dahil dito, sinabi ni Sotto na suspendido muna ang operasyon ng ilang vaccination sites sa siyudad at umaasa itong mabubuksan ito sa mga susunod na linggo.

Magpapatayo ng lima pang modular hospitals ang Department of Public Works and Highways (DPWH).

Ayon kay Undersecretary Emil Sadain, head ng DPWH Task Force to Facilitate Augmentation of Local & National Health Facilities, ang bawat ospital ay mayroong kabuuang 110-bed capacity.

Magugunitang nagpatayo na rin ng modular facilities ang DPWH sa Quezon Institute-Philippine Tuberculosis Society Inc, Dr. Jose N. Rodriguez Memorial Hospital and Sanitarium at Batangas Medical Center.

Direktang mapupunta sa mga lokal na pamahalaan ang P16.5 bilyon na budget para sa Barangay Development Program (BDP) ng National Task Force to End Local Communist Armed Conflict (NTF-ELCAC).

Ito ang nilinaw ni NTF-ELCAC Executive Director at National Commission on Indigenous Peoples Chair Allen Capuyan kasunod ng panawagan ng ilang mambabatas na tanggalan ng pondo ang task force.

Ayon kay Capuyan, kung ire-reallocate ang pondo para sa programa ng NTF-ELCAC ay para na ring kinukuwestiyon ang intensiyon ng mga lokal na opisyal at ng kanilang mga nasasakupan o constituents.

Dahil direkta aniyang napupunta sa mga local government units o LGUs ang pondo, magiging benepisyaryo din nito ang Indigenous Cultural Communities (ICC) at Indigenous Peoples (IPs).

Giit pa ni Capuyan, maliban sa mahigit walong daang barangay, makikinabang din dito ang tinatayang 350 ancestral domains sa buong bansa na matagal na aniyang napagkakaitan ng mga batayang serbisyo at kaunlaran.