DWIZ 882

Hinikayat ng Malakanyang ang lahat ng ahensya ng pamahalaan na iwasan ang mga marangyang pagdiriwang ngayong pasko.

Ayon kay Executive Sec. Lucas Bersamin, alinsunod sa panawagan ni Pangulong Ferdinand Marcos Jr., na bilang pakikiisa sa milyun-milyong Pilipino ang patuloy na nagdadalamhati dahil sa mga buhay, tahanan, at kabuhayang nawala bunsod ng pitong bagyong nanalasa sa bansa.

Hindi na kailangang magpalabas ng opisyal na direktiba sapagka’t naniniwala aniya sila sa kabutihang-loob ng mga kapwa nila kawani ng gobyerno at kumpiyansa itong kusang magpapatupad ang mga ito ng pagtitipid sa kanilang mga pagdiriwang.

Dagdag pa ng palace official, na nais din ng palasyo na ang anumang matitipid mula sa mas payak na pagdiriwang ay i-donate para sa mga kababayang naapektuhan ng kalamidad. –  Sa ulat ni Gilbert Perdez (Patrol 13)

Iginiit ni Pangulong Ferdinand Marcos jr., na malaki ang naitulong ng Enhanced Defense Cooperation Agreement (EDCA) sites sa bansa, partikular sa panahon ng kalamidad.

Sa kanilang pagpupulong ni U.S. Defense Sec. Lloyd Austin sa Malacañang, binigyang diin ng pangulo na mas nagawa ng pamahalaan ng pilipinas ang kanilang trabaho sa tulong ng EDCA sites at ng mga tropa ng amerika.

Ayon pa kay PBBM, nagsisilbi ring staging area ang EDCA sites para sa pre-positioning ng assets, mga kagamitan at relief supplies.

Maliban dito, sa EDCA sites din aniya nanggagaling ang mga air asset na ginagamit para sa pagdadala ng relief goods at pagtaya sa pinsalang iniwan ng mga nagdaang bagyo.

Dagdag pa ni PBBM, maraming mga kalsada ang sarado at hindi madaanan dahil sa mga pagbaha at landslides, kaya’t tanging mga helicopter lamang mula sa EDCA sites ang nakakarating sa mga isolated na barangay.

Kinumpirma ng Commission on Elections na hindi na kailangan pang iparehistro ang mga social media accounts ng mga tagasuporta ng mga kakakandidato para sa 2025 Midterm Elections.

Sa pag-amyenda sa Comelec resolution #11064, tanging ang mga kandidato na lamang ang obligadong magparehistro ng kanilang opisyal na social media account  sa poll body.

Bahagi pa rin ang nasabing insiyatiba ng pagsisiguro ng COMELEC na hindi maaabuso ang internet sa pangangampanya at maiwasan ang pagpapakalat ng pekeng impormasyon.

Nagpaalala naman muli ang komisyon na hanggang Disyembre 13 na lamang maaaring magparehistro ng social media accounts ang mga kakandidato.

Mariing pinabulaanan ng House Committee on Good Government and Public Accountability ang pahayag ni Vice President Sara Duterte, kaugnay sa imbestigasyon ng confidential fund.

Ayon kay Manila Third District Rep. Joel Chua, Chairman ng komite, hindi totoo na isang beses lang inimbitahan ang bise presidente para dumalo sa pagdinig ng kamara hinggil sa imbestigasyon sa kuwestiyonableng paggastos ng Office of the Vice President sa milyong pisong halaga ng confidential fund.

Binigyang diin ni Cong. Chua, na nagsumikap ang komite upang masiguro na maibibigay sa bise presidente ang imbitasyon para sa pagdinig.

Ilang beses na anya silang nagpadala ng imbitasyon kay VP Sara, ngunit tumanggi itong magpakita sa ikatlo, ika-apat, at ika-limang pagdinig.

Matatandaang sa nakaraang Quad Committee hearing na dinaluhan ng ama ng bise presidente na si dating pangulong Rodrigo Duterte, personal na ibinigay kay VP Sara ang imbitasyon para sa ika-anim na pagdinig ng house committee on Good Government and Public Accountability. – Sa panulat ni Kat Gonzales

Ipinasisilip ng kamara ang mga kasong kriminal at administratibo na isinampa laban sa mga pulis na sumunod sa pagpapatupad ng war on drugs campaign ni dating pangulong Rodrigo Duterte.

Interesado si Congressman Dan Fernandez, Co-Chairman ng Quadcomm, na malaman kung ano ang sinapit ng mga pulis, lalo na ang may mabababa ng ranggo na sumunod lamang sa utos ng dating pangulo.

Suportado naman ni Quadcomm Overall Lead Chairman Robert Ace Barbers ang pahayag ni Cong. Fernandez at sinabing maraming pulis ang may problema sa pinansyal dahil sa gastos sa kaso batay narin sa datos na ibinigay ni PNP Chief Rommel Marbil kung saan, mayroon pang mga pulis na napipilitang mangutang para mabayaran lang ang kanilang legal fees.

Giit naman ni House Committee on Human Rights Chairman  Bienvenido Abante jr., na layon ng imbestigasyon na matulungan ang mga pulis at hindi habulin ang mga ito sa kanilang maling aksyon.

Matatandaang sa  pagdinig ng Quad Comm, sinabi ng dating pangulo na hindi niya alam na may mga pulis na nakasuhan at nasibak sa puwesto dahil sa pagsunod sa mga utos kaugnay ng war on drugs campaign.- Sa panulat ni Kat Gonzales

Inihahanda na ng Department of Agriculture ang paglalagay ng mga Kadiwa sites sa mga lugar na naapektuhan ng super typhoon Pepito.

Ito ayon sa DA, upang maging accessible sa mga biktima ng bagyo ang murang agricultural commodities.

Sinabi naman ni Agriculture Spokesman at Assistant Secretary Arnel De Mesa, na nakikipag-ugnayan na sila sa regional field offices upang ipaabot ang tulong sa mga lugar at lagyan na ng kadiwa satellites.

Gayunman, mananatili pa rin anyang mataas ang ilang presyo ng gulay partikular na ang low-land vegetables dahil sa patuloy na pagpasok ng bagyo sa bansa.  – Sa panulat ni Alyssa Quevedo