DWIZ 882

Iginiit ni House Committee on Good Government and Public Accountability Chairman at Manila 3rd District Representative Joel Chua na labag sa konstitusyon ang pag-akto ni Vice President Sara Duterte bilang abogado ng kanyang Chief of Staff na si Atty. Zuleika Lopez.

Nagpakilala si VP Duterte bilang legal counsel ni Lopez at tutulan na maipatupad ang utos ng komite na mailipat ito sa Correctional Institution for Women sa Mandaluyong City mula sa detention facility ng kamara.

Paliwanag ni Cong. Chua, pinagbabawalan ng  saligang-batas na pangulo, ikalawang pangulo at mga miyembro ng gabinete na i-practice ang kanilang profession habang sila ay nakaupo sa nabanggit na mga posisyon. –  Sa panulat ni Jeraline Doinog

Nilinaw ni Vice President Sara Duterte na hindi pagbabanta ang binitawan niyang pahayag laban kina Pangulong Ferdinand Marcos Jr.,  First Lady Liza Araneta Marcos at House Speaker Martin Romualdez.

Ayon kay VP Sara, ang mga binitiwan niyang pahayag ay bunga ng kaniyang pangamba sa kanyang buhay dahil may naririnig siyang banta sa kaniyang buhay kung saan siya ay pinag-iingat.

Wala aniya siyang dahilan para patayin ang mag-asawang Marcos dahil wala naman syang mapapala rito.

Matatandaang inanunsyo ng Malacañang na hindi nila ipinasawalang bahala ang pahayag ng bise presidente kaugnay sa pagkuha nito ng “assasin” para patayin ang pangulo kung sakaling mayroong pumatay sa kanya. –  Sa panulat ni Jeraline Doinog

Laman ng halos lahat ng telebisyon, dyaryo, at online news sa buong mundo ang banta ni Vice President Sara Duterte na pinapapatay nito sa isang “hitman” sina Pangulong Ferdinand Marcos Jr.,  Frist Lady Liza Araneta-Marcos, at House Speaker Martin Romualdez.

Inilabas ng mga TV at inilathala naman ng mga online news ang mga pahayag ni VP Sara sa isang press conference habang nasa loob ng opisina ng kanyang kapatid na si Cong. Paolo Duterte sa House of Representatives.

Nangako  naman na ang Armed Forces of the Philippines sa pamamagitan ng hepe nito na si Gen. Romeo Brawner na mananatili itong nasa gitna lang at patuloy nitong susundin ang civilian authority sa pangunguna ni Pangulong Marcos Jr. bilang commander-in-chief nila. – Sa panulat ni Jeraline Doinog

Itinaas na ng Presidential Security Command ang security protocol nito kina pangulong ferdinand marcos jr., First Lady Liza Araneta-Marcos at House Speaker Martin Romualdez.

Kasunod ito ng banta ni Vice President Sara Duterte na nag-utos na siya ng isang tao na papatay sa pangulo, at sa first lady at kay house speaker.

Ayon sa PSC, nakikipag-ugnayan na sila sa mga law enforcement agency para matukoy, maagapan, at depensahan ang anumang banta sa buhay ng first family at ng house speaker

Ang anumang banta sa buhay ng pangulo, anuman ang pinagmulan nito, ay seseryosohin ng pamahalaan lalo kung ipinahayag sa publiko.

Kasabay nito, naglabas na rin ng kautusan si Executive Secretary Lucas Bersamin laban sa death threat sa first couple. –  Sa panulat ni Jeraline Doinog

Itinuturing ng National Security Council na seryoso ang lahat ng banta laban sa pangulo ng Pilipinas.

Sa pahayag ng Presidential Communications Office, sinabi ni National Security Adviser Secretary Eduardo Año na anumang banta sa buhay ng pangulo ay kailangang beripikahin at ituring bilang usapin ng pambansang seguridad.

Mahigpit aniya silang makikipag-ugnayan sa mga law enforcement at intelligence agencies upang imbestigahan ang naturang banta, mga posibleng perpetrators o may kagagawan nito, at ang kanilang mga layunin.

Binigyang-diin pa ng kalihim na gagawin ng NSC ang lahat para ipagtanggol ang mga demokratikong institusyon ng bansa at proseso na kinakatawan ni Pangulong Ferdinand Marcos Jr. –  Sa ulat ni Gilbert Perdez (Patrol 13)

Kinuwestiyon ni House Blue Ribbon Committee Chairman Joel Chua ang biglaang pag-representa ni Vice President Sara Duterte, bilang legal counsel ng Chief of Staff ng Office of the Vice President na si Atty. Zuleika Lopez.

Ayon kay Representative Chua, hindi pinahihintulutan ng saligang batas ang presidente, bise presidente, at mga miyembro ng gabinete na gamitin ang kanilang mga propesyon.

Dahil dito, hindi aniya maintindihan kung paano mag-aaabogado si VP Sara para sa Chief of Staff nito.

Mababatid na sinubukang harangin ng bise presidente ang at iprinisenta ang sarili bilang abogado ni Lopez nang isilbi ang atas ng komite na ilipat ng pasilidad ang OVP official. - sa panulat ni John Riz Calata

Inakusahan ni Vice President Sara Duterte si First Lady Liza Araneta Marcos na siyang nasa likod ng mga sobreng may lamang pera na ipinamahagi sa mga tauhan ng Department of Education.

Matatandaang kamakailan lamang nang lumutang ang mga usapin na nakatanggap ang ilang dati at kasalukuyang opisyal ng DepEd ng sobre na may libu-libong pera sa ilalim ng pamumuno ni VP Sara bilang DepEd Secretary.

Iginiit ng bise-presidente na sa pamamagitan ng video call at written note, ang unang ginang ang nagbigay ng instruction sa kanya kung saan kukuhanin ang milyun-milyong piso, na hindi naman sinabi kung para saan.

Pinupulitika rin aniya ng pamilya Marcos ang Office of the Vice President matapos siyang magbitiw bilang gabinete ng administrasyon.

Nag-ugat ang maaanghang na pahayag ng pangalawang pangulo laban sa mga Marcos matapos ipag-utos ng Kamara ang paglilipat sa Chief of Staff nito na si Atty. Zuleika Lopez sa Women’s Correctional mula sa detention center sa Batasang Pambansa.

Pina-contempt ng mababang kapulungan si Lopez matapos tumangging sumagot sa imbestigasyon nito sa sinasabing kwestyunableng paggamit ng pondo ng OVP at DepEd.

Samantala, inakusahan din ni VP Sara si Pangulong Ferdinand Marcos Jr. at First Lady Liza Araneta Marcos na nagnakaw ng campaign funds na sinabi naman aniya sa kanya ni House Speaker Martin Romualdez.

Naka-alerto na ang Presidential Security Command kasunod ng banta ni Vice President Sara Duterte laban kina Pangulong Ferdinand Marcos Jr. at First Lady Liza Araneta-Marcos.

Ayon sa Presidential Communications Office, isang seryosong banta ang sinabi ni VP Sara na kumontrata siya ng assassin para patayin ang pangulo at ang unang ginang, maging si House Speaker Martin Romualdez, sakaling magtagumpay ang masamang plano ng mga ito laban sa kanya.

Sa isang video conference, inamin ni VP Sara na nagbilin siya sa assassin na sakaling mapatay siya, huwag itong tumigil hangga’t hindi rin napapatay si Pangulong Marcos, First Lady Liza at Speaker Romualdez.

Ginawa ng bise-presidente ang pahayag kasunod ng utos ng Kamara na ilipat ang Chief of staff ng OVP na si Atty. Zuleika Lopez sa Correctional Institute for Women mula sa house detention facility.

Inisyu ng House Committee on Good Government ang transfer order kay Lopez matapos hindi sumunod ang bise presidente sa utos nito na umalis sa pasilidad sa kabila ng paulit-ulit na apela.

Pina-contempt ng mababang kapulungan si Lopez dahil sa hindi pagsagot sa imbestigasyon nito sa sinasabing kwestyunableng paggamit ng pondo ng Office of the vice president at Department of Education. - sa panulat ni Laica Cuevas