DWIZ 882

 Posibleng tanggalan ng Philippine National Police ng gun permits si Vice President Sara Duterte.

Ayon kay PNP Spokesperson Brigadier General Jean Fajardo, hihintayin muna nila ang resulta ng imbestigasyon ng Criminal Investigation and Detection Group bago sila maglabas ng desisyon kaugnay dito.

Hindi naman sinabi ni PB Gen. Fajardo ang mga inisyu na lisensya kay VP Duterte.

Una nang nagsampa ng reklamo ang PNP laban sa Bise Presidente dahil sa direct assault; disobedience at grave coercion. –  Sa panulat ni Alyssa Quevedo

Ikinaalarma ni Pangulong Ferdinand Marcos Jr. ang napaulat na may nakitamg Russian attack submarine sa karagatan ng Pilipinas.

Ayon kay Pangulong Marcos, nakababahala ang anumang panghihimasok sa teritoryo ng bansa.

Tumanggi naman ang presidente na talakayin pa ang usapin at sa sa halip ay ipinaauubaya na aniya  sa militar ang usapin.

Batay sa ulat, kinumpirma ng ilang security sources ang paglutang ng sasakyang pandagat ng Russian Navy sa layong 148 kilometers kanluran ng Occidental Mindoro noong Nobyembre 28 at sinasabing galing ito ng Malaysia.  Sa panulat ni Kat Gonzales

Tatanggalin na ni President-Elect Donald Trump ang halos 15,000 transgender sa US Military.

Binigyang-diin ni US President Trump na wala siyang ititirang transgender sa kanyang pwersang militar kahit matagal na ito serbisyo, mataas man o mababa ang ranggo.

Batay sa inilabas na executive order epektibo ang nasabing kautusan sa January 20, 2025 sa araw ng kanyang pag-upo sa pwesto sa White House.

Matatandaang una na itong ipinatupad ni Trump sa kanyang unang termino noong 2019 subalit binago ang naturang patakaran ng pumalit sa kanya si dating president Joe Biden.

Nakatakda rin ang malawakang hakbang sa immigration o pagpapa-deport sa lahat ng mga iligal na naninirahan sa Estados Unidos. –  Sa panulat ni Jeraline Doinog

Naalarma ang grupo ng mga negosyante sa nangyayaring bangayan sa politika sa bansa.

Ayon sa mga negosyante, nararapat na maging mahinahon ang mga lider ng bansa upang hindi na ito makaapekto sa pamumuhunan.

Nanawagan ang 13 business organization na pumirma sa joint statement,  bigyang dignidad ang kanilang mga posisyon upang hindi maka-apekto sa pamumuhunan sa Pilipinas.

Kabilang sa mga pumirma sa joint statement ang justice reform initiative; Ateneo De Manila Law Alumni Association; Energy Layers Association of the Philippines; Filipina CEO Circle. – Sa panulat ni Jeraline Doinog

Hindi na ipipilit pa ng kampo ni Kingdom of Jesus Christ Founder Pastor Apollo Quiboloy, na ibalik ang nasabing Pastor sa Kampo Crame.

Ayon kay Atty. Israelito Torreon, bagama’t pakiramdam nilang ligtas ang Religious Leader sa Crame, sa tingin nila ay pagsasayang na lang ng oras kung ipagpipilitan pa ito.

Malabo na anyang pumabor pa sakanila ang desisyon ng korte dahil na rin sa away-pulitika sa bansa.

Matatandaang inilipat kamakailan ang nasabing Pastor sa Pasig City Jail. –  Sa panulat ni Kat Gonzales

Muling itinutulak ng Philippine Rice Research Institute (PhilRice)  ang pagpapatupad ng “half-rice” sa mga kainan sa bansa.

Ayon sa pag-aaral ng DOST, kabilang ang kanin sa mga pangunahing nasasayang na pagkain taon-taon sa bansa.

Nabatid na kahit mayroon nang mga ordinansa para rito, marami pa rin ang hindi nagpapatupad nito.

Matatandaang nakaraaang taon lamang nang muling binatikos ng mga mambabatas ang bisa nito upang mabawasan ang nasasayang na pagkain sa mga establisimyento sa bansa.  Sa panulat ni Jeraline Doinog

Pinatutsadahan ni House Assistant Majority Leader at Taguig City 2nd District Rep. Pammy Zamora ang naging pahayag ni Vice President Sara Duterte na kanya na sana ang 2022 presidential election.

Ayon kay Congresswoman Zamora, isang tadhana o destiny ang maging pangulo ng bansa at kung tiyak anya siya na mananalo, bakit hindi nalang ito tumakbo sa pagkapangulo.

Kinuwestiyun din ng mambabatas, kung bakit ngayon lang nito inihayag ang sinasabing panghihinayang ng Bise Presidente.

Pinasinungalingan din ng kongresista ang mga paratang na “gaslighting” at “terrorizing” na ginagawa ng kamara sa Office of the Vice President at mga tauhan nito sa kanilang ginagawang imbestigasyon.

Inaasahan na ng kampo ni Vice President Sara Duterte ang paghahain ng impeachment complaint laban dito.

Ayon kay dating presidential legal counsel Salvador Panelo na layunin ng impeachment laban kay VP Sara na ma-disqualify ito sa pagtakbo sa 2028 elections.

Sakaling mapatalsik sa pwesto si VP Sara pang-habambuhay na itong hindi makakapagsilbi pa sa gobyerno.

Sa tingin din ni Panelo na tila pabalat bunga lamang ni Pangulong Ferdinand Marcos Jr. na pag-aaksaya lamang ng ng oras ang pagsusulong ng impeachment case kay VP Sara para hindi ito pagsuspetsahan na siya talaga ang may gustong patalsikin ang Bise Presidente.

Nabatid na ilang grupo na ang naghain ng  impeachment complaint laban sa Bise Presidente labilang na ang civil society group; dating mga opisyal ng gobyerno; religious personalities at sectoral representatives. –  Sa panulat ni Jeraline Doinog

Pormal nang inendorso ng Akbayan Party-List sa Kamara ang impeachment complaint laban kay Vice President Sara Duterte.

Nagsanib puwersa ang iba’t ibang grupo para sa paghahain ng impeachment kabilang na ang mga civil society organizations, religious leaders, sectoral representatives, at drug war victims.

Ayon kay Akbayan Partylist Representative Perci Cendaña, inakusahan ng mga complainant si VP Sara ng katiwalian, betrayal of public trust, at iba pang “high crimes.”

Inendorso anila ito dahil karapatan ng taumbayan na magkaroon ng bise-presidenteng may kakayahan, pananagutan, at nakatuon sa serbisyo publiko.

Iginiit pa ng kongresista na hindi na dapat pang hayaan na magpatuloy ang legasiya ng pamilya Duterte na puro korapsyon lamang naman at mass murder.

Ito ang kauna-unahang inihaing impeachment complaint  laban sa pangalawang pangulo.

Kaugnay nito, pormal na ring natanggap ni House Secretary General Reginald Velasco ang reklamo para patalsikin sa pwesto si VP Sara. –  Sa panulat ni Laica Cuevas mula sa ulat ni Geli Mendez (Patrol 30)