DWIZ 882

Iginiit ni PNP Chief General Rommel Francisco Marbil na hindi pamumulitika ang mga isinampang reklamo ng kanilang hanay laban kay Vice President Sara Duterte, ngunit pagtupad lamang sa kanilang mandato sa konstitusyon.

 Ayon kay General Marbil, ang paghahain ng kaso sa sinumang indibidwal, anuman ang estado nito o katayuan sa pulitika ay salamin ng pagtalima ng PNP sa kanilang tungkulin sa bansa at sa sambayanang Pilipino.

 Binigyang-diin din ng opisyal na ang pagkilos ng pulisya ay pagpapakita ng pangil ng batas, na hindi ito natatakot sa sinumang akusado dahil walang pinipili ang hustisya.

 Ipinunto pa ng PNP Chief na hindi nila hahayaang maulit ang kasaysayan kasunod ng inabot na pambabatikos ng ahensya matapos ang kontrobersyal na drug war campaign ng nakaraang administrasyon.

Nagbabala ang pagasa sa publiko na may posibilidad na pumasok ang ilang bagyo sa bansa ngayong holiday season.

Ayon sa PAGASA, maaaring pumasok sa Philippine Area of Responsibility ang nasa isa hanggang dalawang tropical cyclones ngayong Disyembre.

Mataas din anila ang tsansa na mag-landfall ito o magkaroon ng epekto sa kalupaan.

Gayunman nilinaw ng State Weather Bureau na wala pa silang namo-monitor na Low-Pressure Area o tropical cyclone na makakaapekto sa bansa sa susunod na tatlo hanggang limang araw.

Pinayuhan naman ng pagasa ang publiko na manatiling handa at alerto sa lagay ng panahon. - Sa panulat ni Alyssa Quevedo

Malabo pang magkaayos sa ngayon ang alyansang UniTeam nina Pangulong Ferdinand Marcos Jr. at Vice President Sara Duterte.

Ito ang iginiit ni Political Analyst, dr. Froilan Calilung, sa kabila ng tila pagharang ni Pangulong Marcos sa umuugong na impeachment complaint laban kay VP Sara.

Ayon kay Professor Calilung, masyado nang malaki at malawak ang hidwaan ng dalawang pinakamataas na opisyal ng bansa para matapalan at maghilom sa maiksing panahon.

Posible naman aniyang pinigilan ng presidente ang anumang tangkang pagpapatalsik sa pangalawang pangulo, dahil maaaring mayroon itong impormasyon laban sa kanya.

Ipinunto pa ng UST Professor na kung matutuloy ang impeachment, magmumukhang desisyon lamang ito ng kamara, gayong sa katunayan naman ay kontrolado pa rin ito ng pangulo at kanyang mga tagasunod sa mababang kapulungan.  – Sa panulat ni Laica Cuevas

Mahigit tatlong daang libong flying voters ang naisyuhan ng barangay certification para mag parehistrong botante kahit hindi ito botante ng isang barangay.

 Ayon sa Commission on Election (COMELEC), nadiskubre ang masabing bilang  mula sa walong lugar sa bansa.

 Ibinunyag naman ni COMELEC Chairman George Garcia, isang Barangay Chairman sa Cagayan De Oro City  ang nag siyu ng walong libong certficate para sa mga magpaparehistro kahit hindi naman ito residente ng nasabing barangay.

 Nakakaalarma aniya ang ganitong akto dahil maaari nitong ilagay sa alanganin ang integridad ng 2025 elections at mga susunod na botoha.

 Dahil dito, nag sagawa na ng aksyon ang nasabing insidente para hindi na maulit ang ganitong pangangalap ng botante para sa isang barangay.

 Ang talamak na pagbibigay ng barangay certificates sa mga non-resident voters ay walang pinagkaiba sa dating gawi ng pagkakaroon ng “Flying voters” na nakarehistro sa mga lugar kung saan hindi sila legal na naninirahan dito.

Kinantiyawan ni dating senate president at ngayo’y Chief Presidential Legal Counsel Juan Ponce Enrile ang mga nagsusulong ng “people power” na bumili ng People Power kit at simulan ang kanilang laro.

Kasunod ito ng pagtitipon-tipon ng mga supporter ni Vice President Sara Duterte sa Edsa Shrine kamakailan lamang.

Tila hinamon pa ni Enrile ang mga nagtitipon-tipon sa Edsa kung kaya bang pangatawanan ng mga ito ang kanilang ginagawa.

Binigyang-diin pa ng Chief Presidential Legal Counsel na hindi biro ang maglunsad ng rebolusyon dahil kapag inumpisahan ito ay wala ng urungan, at maaring manalo o matalo.

Nag-ugat ang pagtitipon-tipon ng mga supporter ng Pangalawang Pangulo sa Edsa makaraang mag-react ang gobyerno sa pagbabanta ng Bise Presidente laban kina Pangulong Ferdinand Marcos Jr., First Lady Liza Araneta-Marcos at House Speaker Martin Romualdez na mamamatay ang mga ito kapag siya ang unang namatay. –  Sa panulat ni Jeraline Doinog

Hinimok ng International Criminal Court ang mga testigo na makipagtulungan sa kanila kung may alam sa kontrobersyal na war on drugs nang nakaraang administrasyon.

Kasabay nito, binuksan na ng ICC ang online portal para sa pagsusumite ng impormasyon sa nasabing war on drugs.

Ayon kay Atty. Kristina Conti, ICC Assistant to Counsel, pahihintulutan nila ang sinumang may kapanipaniwalang impormasyon sa usapin na direktang isumite sa tribunal kung saan ang impormasyon  ay pananatilihing confidential.

Tiniyak din ng ICC na dadaan sa masusing imbestigasyon ang anumang impormasyong isusumite ng mga testigo basta’t may matibay na ebidensya ang mga ito.

Bukod sa drug war campaign, iniimbestigahan din ng korte ang mga krimeng kinasasangkutan ng tinaguriang Davao Death Squad na sinasabing binuo ni dating pangulong Rodrigo Duterte nuong alkalde pa ito ng Davao City.   - Sa panulat ni Jeraline Doinog

Nasungkit ng Pilipinas ang apat na prestihiyosong titulo sa katatapos lamang na Grand Final Gala Ceremony para sa 2024 World Travel Awards na ginanap sa Madeira, Portugal.

Itinanghal ang Pilipinas bilang World’s Leading Dive Destination sa ika-anim na magkakasunod na taon, habang kinilala rin ang Maynila bilang World’s Leading City Destination sa ikalawang beses.

Hinirang naman na World’s Leading Luxury Island Destination ang Boracay dahil sa kagandahan nito at  high-end offerings sa isla.

Maliban dito, nakamit din ng Department of Tourism  sa unang pagkakataon ang titulo bilang World’s Leading Tourist Board, isang pagkilala sa kanilang tagumpay sa pagpapalaganap ng turismo ng bansa.

Ayon kay Tourism Secretary Christina Garcia Frasco, ito ay bunga ng sama-samang pagsisikap ng gobyerno at pribadong sektor sa ilalim ng administrasyong Marcos.

Ikinalungkot ni Senate Committee on Sustainable Development Goals, Innovation and Futures Thinking Chairperson Nancy Binay ang hidwaan sa pagitan nina Pangulong Ferdinand Marcos Jr. at Vice President Sara Duterte.

Sinabi ni Senador Binay sa DWIZ, sa loob ng mahabang panahon, ngayon lamang ulit naganap na naging magkaaway ang magkakamping Presidente at Bise Presidente noong halalan.

Hangad naman naman ng mababatas na tumigil na ang kaguluhan sa pulitika.

Samantala, Ayon kay Senador Binay, hindi siya nagulat sa ipinakitang asal ni VP Sara.

Naniniwala si Senate President Pro-Tempore Jinggoy Estrada na maaaring makaapekto sa ekonomiya ng bansa ang kaliwa’t kanang isyu sa pulitika.

Inihalimbawa ni Sen. Estrada, sa DWIZ, ang naganap na impeachment kay dating pangulong Joseph Estrada kung saan aniya bumaba ang ekonomiya ng bansa.

Dahil dito, hindi aniya advisable ang pagpapatalsik sa pwesto kay VP Sara. –  Sa panulat ni John Riz Calata

Pinahintulutan nang makalaya ng House Committee on Good Government and Public Accountability si Office of the Vice President Chief of Staff Atty. Zuleika Lopez.

Ito ay alinsunod sa inilabas na release order ng nasabing komite kung saan papayagan nang makalaya si Atty. Lopez matapos nitong isailalim sa medical examination.

Si Atty. Lopez ay kasalukuyang naka-admit sa Veterans Memorial Medical Center dahil sa nararamdaman nitong acute stress disorder.

Nabatid na noong Nobyembre 20 ay inaprubahan ng komite na makulong ang OVP official matapos nitong sumulat sa Commission on Audit na huwag makipagtulungan sa Kamara kaugnay ng imbestigasyon ng confidential fund na ginastos ng Bise Presidente. – Sa panulat ni John Riz Calata