DWIZ 882

Niyanig ng magkakasunod ng lindol ang probinsya ng Batangas ngayong Linggo ng gabi, Enero 19.

Pinakamalakas na naitala ng Phivolcs ay ang magnitude 4.6 na lindol na yumanig sa Mabini, Batangas dakong 8:59 p.m.

Naramdaman sa mga sumusunod na lugar ang lindol:

• Intensity V- Mabini at Bauan, Batangas
• Intensity IV- Batangas City at Santo Tomas, Batangas
• Intensity III- Malvar, Cuenca, Tanauan, San Pascual and Calatagan, Batangas; Puerto Galera, Oriental Mindoro, at San Pablo, Laguna
• Intensity II- Alfonso, Cavite; San Teodoro, Oriental Mindoro.

Naramdaman din ang Instrumental Intensity I sa Tagaytay City, Cavite.

Samantala, ilang oras ang makalipas ay sinundan naman ito ng magnitude 4.0 na lindol sa kaparehong lugar dakong 10:02 p.m.

Bukod sa mga nabanggit, mayroon pang 6 na pagyanig ang naitala ng Phivolcs ngayong gabi sa Mabini, Batangas na may lakas na naglalaro sa magnitude 1.6 hanggang magnitude 3.3.

Ito na ang ika-1 linggo magmula nang makaranas ng mga pagyanig ang probinsya ng Batangas at Cavite dahil sa pagaalburoto ng bulkang Taal noong Enero 12.

Inikot nila Defense Secretary Delfin Lorenzana at NDRRMC Executive Director Usec. Ricardo Jalad ang mga lugar na matinding apektado ng pag-aalburuto ng bulkang Taal.

Unang nagsagawa ng aerial inspection ang kalihim sa Basilio Fernando Airbase sa Lipa City at saka sinundan naman ito ng pagpupulong kasama si Batangas Gov. Hermilando Mandanas at mga opisyal ng Disaster Risk Reduction and Management Cluster ng rehiyon.

Bumisita rin si Lorenzana sa mga evacuation center sa Bauan Batangas upang personal na tingnan ang sitwasyon ng mga evacuees sa lugar.

Ayon naman kay Joint Task Group Taal Commander B/Gen. Marcelino Teofilo, inatasan ni Lorenzana ang AFP Engineering Unit na gumawa ng mga portable shower at toilet sa mga evacuation centers.

Nagbigay siya ng instructions sa mga Engineers na mag-construct ng kahit mga temporary toilets and shower places para sa ganon yong hygiene at komportable naman kahit papaano ang ating mga kababayan sa evacuation centers.—ani Gen. Teofilo sa panayam ng Balitang 882.

Tiwala ang Malakaniyang na good choice si Police Lt/Gen. Archie Francisco Gamboa para pamunuan ang hanay ng pambansang pulisya.

Ito ang inihayag ni Presidential Communications Sec. Martin Andanar makaraang italaga ni Pangulong Rodrigo Duterte si Gamboa na pamunuan ang PNP kapalit ng nagretiro nang si P/Gen. Oscar Albayalde.

Ayon kay Andanar, naniniwala siya sa ipinakitang sinseridad ni Gamboa na linisin ang hanay ng pulisya mula sa mga scalawags at pursigido itong itayong muli ang imahe ng PNP sa publiko.

Magugunitang nabahiran ang pangalan ng PNP matapos masangkot sa isyu ng mga ninja cops si Albayalde dahil sa maanomalyang operasyon ng mga dati nitong tauhan sa Pampanga nuong 2013.

Of course kung sino po ang pinili ni Presidente, sa Phil. National Police as PNP Chief ay siya po ang karapat-dapat na maglingkod. To serve and protect, para malinis at linisin po ang imahe ng PNP—ani Sec. Andanar sa panayam ng Oh IZ sa DWIZ.

Dumalo sa kauna-unahang pagkakataon mula nang maupo sa puwesto si Pangulong Rodrigo Duterte sa taunang Sinulog festival sa Cebu kasabay ng pista ng senyor Sto. Niño.

Personal na sinaksihan ng Pangulo ang Sinulog ritual showdown sa Cebu City Sports Complex at inaasahan siyang magbibigay ng talumpati.

Kasama ang mga opisyal ng pamahalaan ng Cebu at 15,000 manonood, panonoorin din ng Pangulo ang pagtatanghal ng Sinulog dancing contingents.

Matapos nito, pangungunahan din ng Pangulo ang unveiling ng marker sa Terminal 1 ng Mactan-Cebu International Airport sa Lapu-Lapu City.

Kasama ng Pangulo sina Cabinet Secretary Karlo Alexi Nograles, Senador Christopher Lawrence Bong Go at Presidential Communications Office Sec. Martin Andanar.

Nagpadala ng aabot sa 40 bote ng tig-100ml na pasteurized human milk ang Quezon City human milk bank sa mga nagpapasusong nanay sa evacuation centers.

Ayon kay Dr. Josephine Sabando, Direktor ng Quezon City General Hospital, layon nitong tiyakin na may sapat na nutrisyon ang mga sanggol na inilikas bunsod ng pag-aalburuto ng bulkang Taal.

Kasunod nito, nagsagawa ng milk letting acitivities sa mga komunidad upang maka-ipon ng gatas ng ina kung saan, may 200 bote pa ng human milk ang handang ipamahagi sakaling kailanganin.

Una rito, nagpadala na rin ang Quezon City Local Government unit ng mga kumot, kutson, tents at mobile showers para sa mga nagsilikas na residente ng Cavite at Batangas.

Nadagdagan pa lalo ang halaga ng mga napinsalang produkto bunsod ng patuloy na pag-aalburuto ng bulkang Taal.

Batay sa datos ng Department of Agriculture, aabot na sa kabuuang P3.17B ang naitala nilang pinsala sa sektor ng agrikultura.

Aabot naman sa mahigit 15,700 ektarya ng taniman ang apektado ng abong ibinuga ng bulkan partikular na sa Batangas, Cavite at Laguna.

Kaugnay nito, naglaan na rin ng isang mobile clinic at gamot para sa mga naapektuhang hayop ang Phil. Carabao Center.

Bukod pa ito sa 2 1/2 toneladang mga pakain para sa baka, kalabaw, tupa at kambing gayundin ang isang toneladang mais at 1 1/2 toneladang tangkay ng palay.