DWIZ 882

Pansamantalang itinigil ng Department of Public Works and Highways (DPWH) ang kanilang clearing operations mula sa bahagi ng Tagaytay City sa Cavite hanggang sa bahagi ng Batangas.

Ito’y makaraang isara ang limang kalye sa paligid ng bulkang Taal bunsod ng ipinatupad na lockdown ng mga awtoridad na layong iligtas ang mga mamamayan duon mula sa peligrong dulot ng pag-aalburuto ng bulkan.

Kabilang sa mga isinarang kalsada ang Tanauan-Talisay-Tagaytay road; Talisay-Tagaytay section sa Talisay; Talisay-Laurel -Agoncillo road partikular na ang Talisay section at Agoncillo section sa Barangay Banyaga sa Agoncillo gayundin ang Lake Taal-Tagaytay road na pawang matatagpuan naman sa lalawigan ng Batangas.

Itinigil din ang clearing operations sa bahagi naman ng Tagaytay-Taal Lake road at Tagaytay-Talisay road na kapwa sakop naman ng Tagaytay City dahil pa rin sa lockdown.

Kasunod nito, inilagay muna sa standby mode ang mga tauhan at sasakyan ng DPWH at maghihintay ang mga ito ng abiso kung kailan sila muling magsisimula ng kanilang clearing at rescue – relief operations

Isinusulong ni Senate Pro-tempore Ralph Recto ang pagbuo ng isang komisyon o task force na tututok at titiyak sa pagpapatupad ng rehabilitasyon sa mga lugar at biktimang naapektuhan ng pag-aalburuto ng bulkang Taal.

Ayon kay Recto, ihahain niya at ng kanyang asawa na si Congresswoman Vilma Santos ang panukalang pagtatatag ng Taal Commission.

Sinabi ni Recto, itutulad niya ito sa Pinatubo Commission na naging malaking tulong para sa muling pagbangon ng mga biktima ng pagputok ng Mt. Pinatubo noong 1991.

Sa kabila nito, binigyang diin ni Recto na hindi nagkukulang ang national government sa pagbibigay ng ayuda sa mga biktima ng pag-aalburuto ng Taal volcano.

Aniya, nagpapasalamat siya kay Pangulong Rodrigo Duterte na binibigyan nito ang importansiya ang mga taga-Batangas.

Mayroon na tayong karanasan tungkol dyan, yong Pinatubo. Nagtayo tayo ng Pinatubo Commission nuong 1992. After Pinatubo nagkaroon ng funding para sa rehabilitation. Yon din ang pinag-aaralan ko ngayon, para yon ang gagawin natin. We will file a bill, probably creating a Taal Commission nang sa ganon ay matulungan natin ang mga kababayan natin hindi lamang sa Batangas kasama na siguro ang Cavite, mga naapektuhan din sa Cavite para magkaroon ng rehabilitation at recovery fund sa mga darating na taon dahil mahaba ang recovery at rehabilitation.—ani Recto sa panayam ng Usapang Senado.

Nagustuhan ni Pangulong Rodrigo Duterte ang pagiging tapat ni Philippine National Police (PNP) Chief Lt. General Archie Francisco Gamboa.

Ito ang inihayag ni Presidential Spokesperson Salvador Panelo na naging isang batayan ng pangulo sa pagtatalaga kay Gamboa bilang hepe ng PNP.

Ayon kay Panelo, katapatan at kakayahan sa trabaho ang dalawang pangunahing katangiang kabilang sa criteria ni Pangulong Duterte sa paghahanap ng bagong PNP Chief.

Gayunman, mas nangibabaw aniya ang katapatan dahil inaasahan na ang pagiging competent ng mga kabilang sa short list dahil bahagi ito ng kanilang trabaho.

Biyernes ng iaanunsyo ni Pangulong Duterte ang ganap na pagkakatalaga kay Gamboa bilang PNP Chief matapos tumayong Officer in Charge sa loob ng mahigit 3 buwan.

Bukas ang Malakanyang sa panukalang bumuo ng Taal Commission na mangangasiwa sa rehabilitasyon ng mga lugar na matinding naapektuhan ng pagputok ng bulkang Taal sa Batangas at Cavite.

Ayon kay Presidential Spokesperson Salvador Panelo, ikukunsidera at pag-aaralan ng pamahalaan ang lahat na inilalatag sa kanilang mga magagandang panukala.

Tiniyak din ni Panelo ang pagpapatupad nito lalu na para sa ikabubuti ng nakararaming Pilipino.

Gayunman, iginiit ni Panelo, nasa pagpapasiya na rin ni Pangulong Rodrigo Duterte kung sisertipikahan nito ang nabanggit na panukala oras na maihain na ito.

Dagdag ni Panelo, nakahanda rin ang tanggapan ng Pangulo na magpalabas ng mga karagdagang pondo para sa mga apektado ng bulkang Taal.

Nagpatupad ng window hour ang bayan ng Tanauan Batangas na isa sa mga kabilang sa mga isinailalim sa lockdown kasunod ng pagputok ng bulkang Taal.

Layunin nitong mabigyan ng pagkakataon ang mga residente sa mga apektadong barangay sa Tanauan na makakuha ng gamit at mapakain o masilip ang kanilang mga alagang hayop.

Isinagawa ang window hours kaninang 5:00 hanggang 8:00 ng umaga at muling ipinatupad kaninang 3:00 ng hapon hanggang 6:00 ng gabi.

Una rito, sinabi ng Phivolcs na bagama’t tila nanahimik ang bulkang Taal, nagpapatuloy pa rin ang paglalabas nito ng  mainit na singaw at pagkakaroon ng mahihinang pagsabog kung saan umaabot sa 500 hanggang 1,000 metro ang taas ng nabubuo nitong ash plumes.

Nagpalabas ang Philippine Postal Corporation (PHLPOST) ng mga bagong disenyo ng stamps at souvenir sheets para sa year of the rat.

Ito anila ay bilang pakikiisa sa pagdiriwang ng Chinese New Year.

Makikita sa disenyo ng stamps at souvenir sheets ang drawing o guhit ng isang cute na puting daga sa kulay dilaw o peach na background.

Gayundin, nagpalabas din ang Phlpost ng kanilang official first day cover kung saan makikita ang pula at gintong kulay na disenyo bilang pagkilala naman sa unang animal sign sa chinese zodiac.

Mabibili ang 2 disenyo ng year of the rat stamps sa halagang 40 pesos at 12 pesos habang 200 pesos naman ang isang souvenir sheet.

Lahat ng mga nabanggit na disenyo ay lika ng graphic artist na si Rodine Teodoro.

Tiniyak ng Department of Education (DepEd) na hindi maaapektuhan ng pag-aalburuto ng bulkang Taal ang pag-aaral ng mga estudyanteng bakwit sa kabila sa mga inilakas na residente.

Ayon kay DepEd Disaster Response Director in Charge Roni Co, may mga inilalatag nang plano ang DepEd region 4A para masigurong makapagpapatuloy ang pag-aaral ng mga estudyanteng bakwit sa Calabarzon.

Kabila na rin aniya ang mga estudyante sa mga paaralang pansamantalang ginagamit bilang evacuation centers.

Sinabi ni Co, may mga itinalaga nang mga guro para sa mga apektadong eskuwelahan.

Aniya ang mga nabanggit na teaching personnels ay posibleng mga apektado rin ng pag-aalburuto ng bulkang Taal pero handa nang magbalik sa pagtuturo o mga kukuning guro mula sa iba pang eskuwelahan sa Calabarzon.

Dagdag ni Co, agad na maipatutupad ang nabanggit na plano oras na matalakay na ito nina Education Secreatary Leoner Briones, mga undersecretaries at pinuno ng mga ekuwelahan o education division sa Calabarzon.

Batay sa tala ng DepEd, umaabot sa mahigit 30,000 mga estudyante at mahigit 1,000 education personnel mula sa 78 mga paaralan ang apektado ng pag-aalburuto ng bulkang Taal.