DWIZ 882

Nahaharap sa kasong conspiracy to commit sedition si Senador Antonio Trillanes at syam na iba pa.

Ang kaso na isinampa ng Department of Justice (DOJ) sa Quezon City Metropolitan Trial Court ay nag-ugat sa pagkalat ng  video na “Ang Totoong Narcolist”.

Sa naturang video, inakusahan ni Peter Advincula alyas “Bikoy” ang pamilya ng Pangulong Rodrigo Duterte na sangkot di umano sa illegal drugs.

Batay sa isinampang kaso ng DOJ, nagsabwatan ang mga akusado para ipakalat ang mga malisyoso at walang basehang video recordings.

Kasama rin sa mga kinasuhan si Peter Advincula na syang lumabas sa video nang naka-hood; Jesuit priest Fr. Albert Aljejo na sya umanong umayos sa production sa Jesuit communication building sa Ateneo De Manila University; at Joel Sarcho na sya umanong narrator sa video.

Labag sa konstitusyon at maituturing na harassment sa media ang quo warranto petition na inihain ni Solicitor General Jose Calida laban sa ABS-CBN.

Ayon ito kay Congressman Rufus Rodriguez, isa sa mga may akda ng panukalang irenew ang prangkisa ng ABS-CBN.

Malinaw anya sa konstitusyon ang pagkakahati-hati ng kapangyarihan at hurisdiksyon ng executive, legislative at judiciary.

Nagpahayag ng pagasa si Rodriguez na igagalang ng Korte Suprema ang separation of powers at kilalanin ang hurisdiksyon at karapatan ng Kongreso na magkansela, magbigay at magrenew ng prangkisa.

Desperado na ang pamahalaan na patahimikin ang media sa bansa.

Reaksyon ito ng National Union of Journalists in the Philippines (NUJP) sa quo warranto petition na inihain ni Solicitor General Jose Calida laban sa ABS-CBN.

Ayon sa NUJP, malinaw na direktang pag-atake ito sa malayang pamamahayag at kalayaang makapagpahayag.

Malinaw naman na pulitika ang motibo ng Office Of The Solicitor General (OSG) at malinaw na gagawin nila ang lahat para maipasara ang ABS-CBN.

Dumistansya ang Malacañang sa paghahain ni Solicitor General Jose Calida ng quo warranto petiton laban sa ABS-CBN.

Ayon kay Presidential Spokesman Salvador Panelo, hindi nakikialam ang Pangulong Rodrigo Duterte sa trabaho ng mga ahensya ng pamahalaan.

Paniniwala anya ng pangulo, dapat hayaang gumulong ang proseso ng batas kung mayroong kuwestyonable sa ginagawa ng isang tao o kumpanya na tulad ng ABS-CBN.

Matatandaan na ilang beses nang nagbanta ang pangulo na ipasara ang ABS-CBN dahil sa di umano’y pagtanggi ng network na i-ere ang kanyang political ads noong 2016 elections.

Labing-isang libong (11,000) manggagawa ang mawawalan ng trabaho kapag nagtagumpay ang quo warranto petition na inihain ni Solicitor General Jose Calida.

Ibinabala ito ni Congresswoman Sol Aragones, dating reporter ng ABS-CBN at may akda ng panukalang batas para sa renewal ng prangkisa ng ABS-CBN.

Ayon kay Aragones, iginagalang niya ang paghahain ng petisyon ni Calida subalit umaasa pa rin sya na lulusot ang franchise bill para sa ABS-CBN na inakda ng 15 mambabatas.

Sa Marso nakatakdang magtapos ang prangkisa ng ABS-CBN subalit naniniwala si Aragones na kaya pa nila itong habulin dahil hanggang March 11 pa naman ang sesyon ng Kongreso.

Umabot na sa P4.30 ang nabawas sa presyo ng diesel mula noong January 14.

Kasama na dito ang rollback na epektibo bukas, Martes, ika-11 ng Pebrero.

P2.75 naman kada litro ang nabawas sa gasolina samantalang P4.75 sa kerosene.

Ito na ang ika-apat na pagkakataong nagrollback ang presyo ng produktong petrolyo mula noong January 14.

Bumaba na ang bilang ng mga bagong kaso ng 2019 novel coronavirus acute respiratory disease (2019 nCoV-ARD) sa Wuhan, China.

Matatandaan na sa Wuhan nagsimula ang bagong strain na ito ng coronavirus.

Ayon kay Department of Health (DOH) secretary Francisco Duque III, 20% ang ibinaba ng mga naitalang bago kaso mula nang ipatupad ang lockdown sa Wuhan.

Ang medyo gumagandang balita, ang new cases [ng nCoV] ay bumaba by 20%, so, ibig sabihin, mukhang nagiging epektibo ‘yung kanilang pagla-lockdown dahil bumaba ang reported new cases. I hope tuluy-tuloy na ‘yan,” ani Duque.

Sinabi ni Duque na batay sa pag-aaral ng World Health Organization (WHO), nasa 80% na mild lamang ang mga sintomas ng 2019 nCoV-ARD na kung tutuusin ay kayang labanan ng malakas na resistensya.

Gayunman, binigyang diin ni Duque na kailangan pa ring magpa-ospital ang isang positibo sa 2019 nCoV-ARD para maka-iwas sa mga komplikasyon.

Hindi rin natin masabi kasi kung biglang sumadsad ‘yung kanyang kaso, magkaroon ng acute respiratory distress syndrome –isa sa mga nakamamatay na komplikasyon pag napabayaan o huli na bago magpatingin sa doktor –pneumonia, ARDS, tapos kidney failure, tapos pwedeng mamatay,” ani Duque. —sa panayam ng Ratsada Balita