Muling itinampok ng Marikina City ang iconic na World’s Largest Shoes matapos itong maibalik at maayos mula sa mga pinsalang dulot ng paglipas ng panahon at kalamidad.
Ayon sa lungsod, higit pa sa restoration project ang pagbuhay sa higanteng sapatos dahil simbolo rin ito ng mayamang kasaysayan ng industriya ng sapatos sa Marikina at ng katatagan ng mga Marikenyo sa harap ng mga hamon.
Sinabi ni Sen. Bam Aquino na maaaring umabot na sa 13 miyembro ang grupo ni Sen. Sherwin Gatchalian, na kinakailangan upang pormal na mahalal itong Senate President.
Ayon kay Aquino, may posibilidad na madagdagan pa ang kanilang hanay sa mga susunod na araw, bagama’t hindi niya pinangalanan kung sino ang senador na maaaring sumama sa kanilang bloc.
Patuloy ang hidwaan sa liderato ng Senado sa pagitan ng kampo nina Gatchalian at Sen. Alan Peter Cayetano matapos ang kontrobersyal na reorganisasyon noong Hunyo 3.
Kinumpirma ng National Task Force for the West Philippine Sea (NTF-WPS) ang pagkakaroon ng isang floating structure sa Bajo de Masinloc matapos itong mamataan sa isinagawang aerial at maritime monitoring.
Ayon sa NTF-WPS, ang istruktura ay may sukat na humigit-kumulang 6×6 metro at may nakikitang antenna, habang may mga tao ring namataan sa ibabaw nito. Kaugnay nito, nagsagawa na ng diplomatic action ang Department of Foreign Affairs laban sa ilegal na presensya ng naturang pasilidad.
Iginiit ng NTF-WPS na nananatiling bahagi ng Pilipinas ang Bajo de Masinloc at patuloy na ipagtatanggol ng pamahalaan ang soberanya at karapatan ng bansa sa West Philippine Sea.
Karaniwang ginagamit ng maraming Pilipino ang monosodium glutamate o M.S.G., na mas kilala bilang vetsin, na ginagawang pampalasa sa mga nilulutong pagkain.
Ayon sa World Health Organization at U.S. Food and Drug Administration, ligtas ang M.S.G. kapag ginagamit sa tamang dami.
Hindi rin anila ito itinuturing na sanhi ng kanser batay sa mga kasalukuyang pag-aaral.
Gayunman, maaaring makaranas ang ilang taong sensitibo sa vetsin ng pananakit ng ulo, pagkahilo, pamamanhid, o paninikip ng dibdib kapag naparami ang konsumo.
Kaya’t inirerekomenda ng mga eksperto ang paggamit ng natural na pampalasa tulad ng bawang, sibuyas, luya, at kamatis, upang mabawasan ang sobrang sodium sa pagkain.
Winalis ng Alas Pilipinas ang Kyrgyzstan Women’s National Volleyball Team sa 2026 AVC Women’s Volleyball Cup sa scores na 25-9, 25-11, 25-17.
Nasungkit ng Alas ang ikalawang panalo sa tatlong laro upang umangat sa 2-1 record sa Pool A, habang bumagsak ang Kyrgyzstan sa 0-3.
Pinamunuan nina Thea Gagate at Jovelyn Gonzaga ang opensa ng Pilipinas, kung saan kumamada si Gagate ng 11 points habang pumalo si Gonzaga ng 10 points.
Target ngayon ng Alas Pilipinas na mapalakas pa ang kampanya para sa semifinals sa pagsagupa sa South Korea Women’s National Volleyball Team, na kasalukuyang nangunguna sa Pool A na may malinis na 2-0 record.
Tumaas sa 4.7% ang unemployment rate sa bansa noong April 2026.
Ayon sa Philippine Statistics Authority, katumbas ito ng 2.41 milyong Pilipinong walang trabaho, mas mataas kumpara sa 2.06 milyon noong Abril 2025.
Sa kabila nito, umabot pa rin sa 48.89 milyon ang bilang ng mga Pilipinong may trabaho noong Abril.
Bukod dito, naitala din ang pagtaas ng bilang ng mga underemployed o mga manggagawang naghahanap pa ng dagdag na oras o mas maayos na trabaho, kung saan umabot ito sa 7.41 milyon, na may underemployment rate na 15.2%.
Ipinapakita sa datos ng PSA na mas maraming Pilipino ang naghahanap ng mas magandang oportunidad sa trabaho habang nananatiling hamon ang paghahanap ng sapat at de-kalidad na hanapbuhay sa bansa.—sa panulat ni Reabelle Medina
Nagpaabot ng simpatya at suporta ang ilang world leaders sa Pilipinas at nagpahayag ng kahandaang tumulong matapos ang magnitude 7.8 na lindol na tumama sa Mindanao.
Kabilang sa mga nag-alok ng tulong si Japanese Prime Minister Sanae Takaichi at Taiwanese President Lai Ching-te.
Nakiramay naman sina Indian Prime Minister Narendra Modi at Australian Ambassador to the Philippines Marc Innes-Brown, maging ang German at French embassies.
Sa panig ng U.S. Embassy, patuloy nitong minomonitor ang sitwasyon at nakikipag-ugnayan sa mga otoridad habang nakikipagtulungan na rin ang United Nations sa gobyerno ng Pilipinas upang i-assess ang epekto ng lindol.
Abiso mula sa Maynilad
Magkakaroon ng scheduled water service interruption sa ilang bahagi ng Caloocan City, Quezon City, Valenzuela City, at Obando, Bulacan simula alas-11 ng gabi ng June 10 hanggang June 11, 2026.
Ito ay dahil sa preventive maintenance at system improvement works sa La Mesa Pumping Stations ng Maynilad.
Pinapayuhan ang mga apektadong customer na mag-ipon ng sapat na tubig bago magsimula ang interruption. Magkakaiba ang oras ng pagbabalik ng serbisyo depende sa lugar.
Para sa kumpletong listahan ng mga apektadong lugar at interruption schedules, bisitahin ang Maynilad website at official Facebook page, o tumawag sa hotline 1626.—sa panulat ni Reabelle Medina
Kinumpirma ng Ateneo de Manila University ang pagpanaw ng kanilang dalawang manlalaro sa men’s basketball team na sina Rene Baterbonia at Divine Adili matapos malunod nitong Lunes, June 8.
Sa gitna ito ng kanilang team-building activity sa Dipaculao, Aurora na bahagi ng kanilang paghahanda para sa Filoil Preseason Cup at sa nalalapit na UAAP Season 89.
Si Baterbonia ay disi-nuwebe anyos na incoming rookie ng Ateneo Blue Eagles at dating Most Valuable Player ng Palarong Pambansa.
Samantala, si Adili naman ay bente uno anyos na naging bahagi ng kampanya ng Ateneo sa UAAP Season 88 bilang foreign student-athlete.
Taos-puso ang ating pakikiramay sa pamilya, kaibigan, at mga mahal sa buhay ng dalawang atleta.
Kinumpirma ni Acting Senate President at Senate Pro Tempore Sherwin Gatchalian na mayroong banta sa seguridad ng Senado.
Ito’y matapos nilang matanggap ang impormasyon mula sa mga otoridad ng National Bureau of Investigation.
Gayunman, sinabi ni Acting SP Gatchalian na hindi niya maaaring isiwalat ang detalye ng intelligence information na kanyang natanggap.
Samantala, tiniyak niya na magpapatupad sila ng mas mahigpit na seguridad sa institusyon.
Matatandaang simula nang magpalit ng liderato sa Senado noong May 11, maraming bilang ng otoridad ang naka-deploy sa paligid ng Senado, bunsod ng sunod-sunod na mga rally gaya ng mga supporter ng Duterte administration.—sa panulat ni Reabelle Medina