DWIZ 882

Ipinaiimbestigahan na sa Kamara ni House Senior Deputy Minority Leader at Mamamayang Liberal Party-list Rep. Leila de Lima ang umano’y ilegal na pagtatapon ng mga bangkay ng mga aso at pusa sa San Jose del Monte, Bulacan at iba pang lugar.

Batay sa House Resolution 1576 na inihain ni De Lima, layon nitong matukoy at mapanagot ang mga responsable at nasa likod nito, at maisulong ang mas mahigpit na regulasyon, nararapat na lehislasyon at reporma sa mga pet aftercare facilities, gayundin ang kapakanan ng mga alagang hayop.

Para kay De Lima, isang “napakasahol na scam” ang ginawang pagtatapon ng mga aso at pusa at dapat tugisin ang mga walang pusong gumawa sa mga fur babies ng mga fur parents na gumagastos para sa marangal na paglilibing at pamamaalam sa kanilang mga alaga.

Aniya, kailangan ng agarang hustisya para sa lahat ng inosenteng hayop na basta na lang itinapon sa isang dumpsite.

Aniya, hindi biro ang halagang inilaan ng mga pet lover parents para mabigyan ng maayos na himlayan ang kanilang mga alagang hayop.

Matatandaang nadiskubre sa San Jose del Monte ang nasa 29 na bangkay ng mga aso at pusa na iniuugnay sa AHJAY PAWS Aftercare Pet Crematorium sa Bacoor, Cavite.

Samantala, isinusulong din ni De Lima ang mga panukalang magtatatag ng Animal Welfare Desks sa mga police station at magtatakda ng minimum standards sa pagtrato sa mga hayop. | Sa panulat ni Geli Mendez

Hinamon ni House Prosecution Adviser at Trial Spokesperson Robert Ace Barbers si Vice President Sara Duterte na maglabas ng mga dokumentong magpapatunay na tuluyan na niyang isinuko ang kaniyang mga interes at posisyon sa mga negosyo matapos maupo sa puwesto noong 2022.

Ayon kay Barbers, dapat sagutin ng Bise Presidente ang mga pagkakaiba sa kaniyang Statements of Assets, Liabilities and Net Worth o SALN, mga dokumentong inihain sa Securities and Exchange Commission o SEC, at mga rekord sa buwis.

Aniya, hindi sapat ang paliwanag lamang at kailangang suportahan ito ng mga opisyal na dokumento gaya ng deed of sale, tax clearance, at patunay ng pagbibitiw sa mga board of directors ng mga kumpanya.

Iginiit ni Barbers na kung walang itinatago ang Bise Presidente, madali lamang para rito na sagutin ang mga tanong kaugnay ng umano’y kwestiyunableng pagyaman nito.

Kinuwestiyon din ni Barbers kung bakit nakalista ang Gencorp Industries sa SALN ni VP Sara ngunit wala ang kaniyang pangalan sa mga rekord ng SEC.

Kabilang din sa kaniyang pinuna ang patuloy na pagkakatalaga sa Bise Presidente bilang direktor ng Metro City Chow Foods Corp. at ang pagpapatuloy ng kaniyang professional taxpayer registration sa ilalim ng legal activities.

Binanggit din ni Barbers ang Cale88 Foods Corp. na iniulat na naibenta na sa ibang kumpanya, ngunit wala umanong rekord ang BIR ng tax clearance para sa naturang transaksiyon.

Iginiit ni Barbers na dapat magharap ang Bise Presidente ng mga resibo at opisyal na dokumento.

Sa ilalim ng Article VII, Section 13 ng Konstitusyon, ipinagbabawal ang paghawak ng ibang propesyon, pakikilahok sa negosyo, at pagkakaroon ng pinansyal na interes sa mga kontrata ng pamahalaan ang Bise Presidente habang siya ay nanunungkulan.

Bahagi ang mga usapin sa negosyo at buwis ng Article II ng impeachment case laban kay Duterte na may kaugnayan sa alegasyon ng unexplained wealth.

Nakatakdang simulan ng defense team ang paglalahad ng kanilang mga ebidensya sa Nobyembre 9, 2026. | Sa panulat ni Geli Mendez

Iimbestigahan ng Philippine National Police (PNP) ang mga indibidwal na tumulong upang makatakas si Senador Ronald “Bato” Dela Rosa.

Ayon kay PNP Deputy Chief for Administration, Lieutenant General Wilson Lopez, hiwalay pa ito sa isasagawa nitong manhunt operation sa puganteng senador, na pinaniniwalaang nasa Mindanao matapos itong tumakas mula sa bulwagan ng Senado noong Mayo sa tulong ni Senador Robin Padilla.

Nagbabala rin si Lopez sa mga indibidwal o grupong nagkakanlong kay Dela Rosa na posible rin silang sampahan ng reklamo, tulad ng obstruction of justice.

Nauna nang napaso ang ultimatum ng PNP kay Dela Rosa na sumuko, habang inanunsyo naman ni Interior Secretary Jonvic Remulla ang P50 million na pabuya para sa pagkakaaresto sa puganteng senador. | Sa panulat ni Anjo Riñon

Itinanggi ng kampo ni Vice President Sara Duterte ang pahayag ng isang lalaking nagpakilalang alias “Chris” na dalawang beses siyang naghatid ng maleta ng pera sa Bise Presidente.

Tinawag ni Attorney Salvador Paolo Panelo Jr., tagapagsalita ni VP Sara, na isa na namang “tanim-witness” ang naturang lalaki at sinabing sasagutin ng Bise Presidente ang mga paratang sa pamamagitan ng ebidensiya sa tamang panahon.

Nakarating si Chris sa Davao noong 2021 at 2022 bitbit ang 15 maleta, alinsunod sa utos ni dating House Speaker Lord Allan Velasco.

Pero aminado siya na hindi niya alam ang halaga ng perang nasa loob ng mga maleta at hindi rin niya nasaksihan ang pagtanggap ng Pangalawang Pangulo sa mga ito. | Sa panulat ni Anjo Riñon

Suspendido muna ang bentahan ng bigas sa halagang bente pesos kada kilo ngayong araw, Nobyembre 2, bilang paggunita sa All Souls’ Day.

Ayon sa Bureau of Plant Industry, magbabalik ang regular na operasyon sa Miyerkules, Nobyembre 4, kung saan prayoridad ang mga benepisyaryong may nakuhang appointment para sa Nobyembre 3.

Sa ilalim ng programang ‘Benteng Bigas, Meron Na!’, nakakabili ng murang bigas ang mga senior citizen, persons with disabilities, solo parents, minimum wage earners, public transport workers, mahihirap na pamilya, at mga rehistradong magsasaka at mangingisda.

Nagmumula ang bigas sa stocks ng National Food Authority o NFA na direktang binibili mula sa mga lokal na magsasaka, habang sinasagot ng gobyerno ang subsidy sa pamamagitan ng Food Terminal Incorporated.

Ayon sa Department of Agriculture, umabot na sa 961,346 ang mga benepisyaryo nitong Setyembre, ang pinakamataas na bilang sa isang buwan mula nang ilunsad ang nasabing programa. | Sa panulat ni Jordan Gutierrez

Nakapagpiyansa na at pinagkalooban ng provisional liberty si Peanut Gallery Media Network (PGMN) anchor Camille Jensen “CJ” Hirro matapos maglagak ng P336,000 cash bail kasunod ng paglalabas ng warrant of arrest ng Quezon City Regional Trial Court (QC RTC) kaugnay ng seven counts ng cyber libel na isinampa laban sa kaniya ni dating Quezon City Representative Marvin Rillo.

Ayon kay Hirro, nag-ugat ang kaso sa kaniyang mga ulat tungkol sa dating mambabatas. Aniya, kinilala bilang fair comment ang kaniyang pag-uulat hinggil sa P71-milyong proyekto ng gymnasium ng Carlos L. Albert High School dahil nakabatay ito sa mga opisyal na dokumento ng pamahalaan.

Sinabi rin niyang ibinasura ang bahagi ng reklamo na may kinalaman sa isang hiwalay na video na nagtatanong kung saan napunta ang pondo ng publiko, dahil ito ay lehitimong tumatalakay sa public interest. Dagdag pa niya, ibinasura rin ang mga reklamo laban sa mga opisyal ng PGMN, kabilang ang president at CEO nitong si Franco Mabanta.

Nakitaan ni Presiding Judge Maria Zoraida Zabat Tuazon ng QC RTC Branch 90 ng probable cause para maglabas ng warrant of arrest matapos suriin ang mga paratang sa mga kalakip na dokumento.

Samantala, nagpahayag si Rillo na handa niyang bawiin ang kaso laban kay Hirro kung hihingi ito ng paumanhin sa mga naging pahayag nito laban sa kaniya. Sinabi rin ng dating kongresista na matagal na niyang pinatawad ang mamamahayag at nagbabala na maaari pa siyang magsampa ng iba pang libel cases kung hindi ito ay magmamatigas.

Nakatakda naman ang kaniyang arraignment sa Nobyembre 13, 2026.

Lumobo na sa record-high na P19.66 trillion pesos ang pambansang utang noong Setyembre.

Ayon sa Bureau of the Treasury, mas mataas ito ng 0.27 percent sa naitalang P19.61-trillion sovereign debt noong Agosto.

Aabot sa 67.39 percent ng kabuuang utang ng bansa ang domestic debt, o utang mula sa loob ng Pilipinas.

Isa sa mga pangunahing dahilan ng muling pag-akyat ng utang ang mahinang halaga ng piso, kung saan umabot ito sa P62.60 kada dolyar noong katapusan ng Setyembre. | Sa panulat  ni Anjo Riñon

Kinumpirma ni Senador Panfilo Lacson ang sinabi ni dating Public Works Secretary Roberto Bernardo na siya lang ang katangi-tanging mambabatas na hindi tumanggap ng kickback sa anumang infrastructure project ng pamahalaan.

Buwelta ito ni Lacson sa kanyang mga kritiko na nagdududa sa kanyang track record, kabilang si Senate Minority Leader Alan Peter Cayetano, na inakusahan niyang may mga ghost project sa Taguig na balwarte nito.

Giit niya, wala siyang tinanggap na anumang uri ng suhol dahil iniingatan niya ang integridad ng kanyang karakter, na isa anyang pamana mula sa kanyang mga magulang na hindi makukuha ninuman.

Nauna nang nilinaw ni Lacson na lehitimong lumaki ang personal niyang yaman mula 2022 hanggang 2025, kung kailan isa siyang pribadong mamamayan at walang anumang katungkulan. | Sa panulat ni Anjo Riñon

Inaasahan ng Bangko Sentral ng Pilipinas na papalo sa walong porsyento ang inflation rate ngayong Oktubre.

Ayon sa BSP, posibleng umabot sa 7.1 hanggang 8.1 porsyento ang inflation rate ngayong Oktubre.

Ipinaliwanag ng BSP na inaasahang magdudulot ng dagdag-presyo sa mga bilihin ang mataas na singil sa langis, kuryente, at transportasyon.

Gayunman, sinabi ng central bank na posibleng makabawas sa inflation ang mababang presyo ng ilang pangunahing agricultural products gaya ng bigas, gulay, karne, at isda.

Nakatakdang ilabas ng Philippine Statistics Authority ang opisyal na bilang ng inflation sa Nobyembre 5. | S panulat ni Reianne Antiquina