DWIZ 882

Inihayag ni Philippine College of Physicians Doctor Maricar Limpin na masyadong biglaan ang pagbaba ng alert level sa bansa na naging sanhi ng pagtaas ng mga impeksyon sa Covid-19.

Aniya, kahit na i-downgrade pa ang alert level, marami pa ring tao ang pinapayagang lumabas.

Idinagdad ni Limpin na mas maraming mga bata rin ang lumalabas sa gitna ng pagluwag ng restriksyon kahit na aniya hindi pa bakunado ang mga ito laban sa Covid-19.

Matatandaang, nagpasya ang gobyerno na isailalim ang bansa sa alert level 2 mula Enero 1 hanggang 15, 2022, ngunit simula bukas, Enero 3 hanggang 15 ay ilalagay sa mas mahigpit na alert level 3 ang Metro Manila. –Sa panulat ni Airiam Sancho

Handa na ang National Capital Region Police Office (NCRPO) na magbigay ng karagdagang seguridad sa mga hotel kung kinakailangan.

Ito ang sinabi ni NCRPO Chief Police Major General Vicente Danao Jr. matapos ang isang insidente kaugnay sa isang babae na ginamit umano ang ‘koneksyon’ upang i-waive ang limang araw na quarantine sa isang hotel sa Makati City.

Aniya, mayroon nang in-house security ang mga hotel para matiyak na nasusunod ang mga kinakailangan para sa Covid-19.

Samantala, hinimok naman ni Danao ang publiko na maging disiplinado sa pagsunod sa health and safety protocols. –Sa panulat ni Airiam Sancho

Iniimbestigahan na ng Philippine National Police  (PNP) ang pagkamatay ni Trece Martirez City Assistant City Prosecutor Edilbert Mendoza sa labas ng kanyang bahay.

Sa nakuhang CCTV footage, Biyernes ng Disyembre 31, nag-eehersisyo si Mendoza sa labas ng kanyang bahay sa isang subdibisyon sa barangay Cabuco Trece Martirez City nang lapitan ng isang gunman mula sakaniyang likuran atsaka siya binaril.

Matapos ang pamamaril ay agad na tumakas ang biktima sa hindi malamang direksiyon.

Matatandaang kabilang si Mendoza sa maraming abogado at miyembro ng hudikatura na pinatay sa nakalipas na limang taon.

Patuloy pang iniimbestigahan ng mga otoridad ang pangyayari. —sa panulat ni Angelica Doctolero

Nagsasagawa na ng malalimang imbestigasyon ang Criminal Investigation And Detection Group (CIDG) at Philippine National Police (PNP) kaugnay sa naging paglabag sa quarantine protocols ni Gwenyth Chua at ng isang hotel sa Makati City.

Matatandaang dumating sa bansa si Chua bago ang Pasko at dumiretso sa isang party kung saan, hindi umano ito nag-quarantine.

Matapos magpunta ni Chua sa isang party ay isinalang ito sa swab test at nagpositibo sa covid kung saan, nahawahan nito ang 15 sa kaniyang mga nakasalamuha.

Ayon sa mga otoridad, kanilang sisiguruhin na mananagot ang mga tauhan na sangkot sa paglabag ng babaeng nagpositibo sa COVID-19. —sa panulat ni Angelica Doctolero

Nagsorry sa publiko ang hotel na pinaglagian ng babaeng nagpositibo sa COVID-19 matapos lumabag sa quarantine protocols sa Makati City.

Aminado ang naturang hotel na bigo silang ipatupad ang quarantine protocols matapos pumuslit si Gwenyth Chua na galing umano sa ibang bansa at dumiretso sa isang party sa nabanggit na lungsod kung saan, nahawahan nito ang labing lima sa kaniyang mga nakasalamuha.

Dahil dito, nangako ang pamunuan ng hotel, na hindi na mauulit ang ganitong pangyayari. —sa panulat ni Angelica Doctolero