DWIZ 882

31 kahon ng imported na sigarilyong ipinuslit sa Indanan, Sulu ang nasabat ng mga otoridad.

Natagpuan ng mga pulis ang mga abandonadong kahon sa Sitio Laum Niyog, Barangay Kajatian.

Ayon kay Maj. Edwin Sapa, Hepe ng Indanan Police,  naglalaman ang mga kontrabando ng mga brand na Canon, Famous, B and R at stone.

Agad tumakas ang mga mag-de-deliver sana ng mga sigarilyo sa isang buyer nang mamataan ng mga pulis

Itinurn-over na sa Bureau of Customs sa Jolo ang nasabat na shipment habang inaalam pa ang halaga nito.   —sa panulat ni Drew Nacino

Kasado na bukas ang Big time oil price hike ngayong unang linggo ng taong 2022.

Maglalaro sa P1.90 sentimos hanggang P2.00 ang dagdag-presyo sa gasolina; P2.20 – P2.30 sentimos sa diesel habang P1.80 hanggang P1.90 sa kerosene.

Ayon sa mga Oil Industry Source, tumaas ang demand sa petrolyo noong nakaraang linggo sa kabila ng pagkalat ng COVID-19 Omicron variant.

Isa rin umano sa dahilan ang paghina ng palitan ng piso kontra dolyar.

Sa kabila nito, may tapyas naman sa presyo ng LPG na P2.55 centavos sa kada kilo ng tangke ng Solane, Petron Gasul at Phoenix Super LPG, simula kahapon.  —sa panulat ni Drew Nacino

Epektibo na simula Enero a–1 ang mas malaking buwis sa alak at sigarilyo.

Alinsunod sa Republic Act 11467 na nilagdaan ni Pangulong Rodrigo Duterte noong Enero 2021, aabot na ang excise taxes ng sigarilyo sa P55 kada pakete ngayong 2022 kumpara sa P50 kada pakete noong nakaraang taon.

Magtataas din ang buwis sa Heated Tobacco Products sa P30 ngayong taon kumpara sa P27.50¢ noong 2021 at P47 kada milliliter ng Salt Nicotine products mula sa P42 kada ml noong 2021.

Para naman sa alcohol products, ang buwis para sa distilled spirits ay aabot na sa P52 kada proof liter at P39 kada litro para sa beer products.

Para sa wine products, ipatutupad ang P50 excise tax kada litro simula ngayong taon at magtataas pa ng 6% kada taon simula 2021.

Ang naturang dagdag-buwis ay ginagamit upang pondohan ang Universal Health Care.   —sa panulat ni Drew Nacino

Kasabay ng pagpasok ng taong 2022, umakyat na sa 407  ang bilang ng nasawi sa pananalasa ng Super Typhoon Odette.

Sa datos ng National Disaster Risk Reduction and Management Council, 78 ang nawawala at halos 1.2K ang nasugatan.

Umabot naman sa 4.8-M katao ang naapektuhan ng bagyo kabilang na ang nasa 330K nasa evacuation centers.

Mayorya ng mga nasalanta ay mula sa MIMAROPA, Regions 5, 6, 7, 8, 9, 10, 11, Region 12, CARAGA at BARMM.  —sa panulat ni Drew Nacino

Hindi pa inirerekomenda ng Department of Health (DOH) ang pagpapatupad ng mas mahigpit na Alert Level 3 status sa iba pang rehiyon hangga’t hindi pa ito kinakailangan batay sa datos.

Binigyang-diin ni Health Secretary Francisco Duque na mayroong sinusunod na metrics o batayan sa pagpapatupad ng Alert Level kaya’t itinaas sa level 3 ang restriction sa Metro Manila.

Ipinunto ni Duque na ang mataas na 2-week growth rate at average daily attack rate sa National Capital Region ay datos na nasa ilalim na ng high-risk classification ang nasabing rehiyon.

Ang pagbabalik naman sa NCR sa Alert Level 3 ay kasunod ng pagkakaulat ng unang local transmissions ng Omicron variant sa bansa.  —sa panulat ni Drew Nacino

Inihirit ng kontra daya sa Commission on Elections ang pagbasura sa petisyon ng PDP-Laban na muling buksan ang paghahain ng Certificates of Candidacy (COC).

Iginiit ni Kontra Daya Convenor Danilo Arao na ginagawa umanong katatawanan ng PDP-Laban ang eleksyon.

Ito, anya, ay dahil binabaliwala na lamang ng naturang partido ang itinakdang rules ng poll body sa paghahain ng kandidatura, lalo’t matagal nang napaso ang deadline.

Magugunitang itinakda ng COMELEC noong oktubre a –1 hanggang a – 8 noong isang taon ang filing period ng COC.  —sa panulat ni Drew Nacino

Nasa 85% ng mga pasyente ng COVID-19 patients sa intensive care units na nangangailangan ng mechanical ventilators sa government hospitals sa Metro Manila ang hindi pa bakunado.

Ito ang inihayag ng Department of Health sa gitna ng panibagong serye ng pagtaas ng COVID-19 cases sa bansa, lalo sa Metro Manila.

Dahil dito, muling pinayuhan ng DOH ang publiko, partikular ang mga unvaccinated na samantalahin na ang libreng COVID-19 vaccination ng gobyerno dahil pa rin sa pinagsanib na banta ng Delta at Omicron variants.

Tiniyak din ng kagawaran na nananatiling epektibo at ligtas ang mga bakuna laban sa kritikal na COVID-19 virus at pagkamatay.   —sa panulat ni Drew Nacino

Ipinag-utos ng Department of Transportation (DOTr) ang pagpapatupad ng mga health protocols sa lahat ng transport sectors.

Ginawa ni DOTr Secretary Arthur Tugade ang hakbang sa harap na rin ng pagtaas ng COVID cases sa bansa na hinihinalang dulot ng omicron variant.

Binigyang diin ni Tugade na pinakamahalaga sa lahat ang kaligtasan ng mga mananakay kung kaya’t importanteng nasusunod at naipatutupad ang lahat ng mga patakarang pangkalusugan.