Bistado ang limang pakete ng shabu na itinago sa mga saging na ipupuslit sana sa Davao City Jail.
Ayon sa mga Otoridad, pasado alas-3 ng hapon nang madiskubre ang mga iligal na droga sa pag-iinspeksyon ng mga Jail Guard.
Nagkakahalaga ng P45K ang narekober na shabu na tumitimbang ng 3 gramo.
Inaalam pa kung sino ang nag-iwan ng mga droga at saging sa kulungan at kung sino ang pagbibigyan sana nito. —sa panulat ni Mara Valle
Patay ang isang kawani ng Philippine Coast Guard (PCG) makaraang barilin sa Sual, Pangasinan.
Kinilala ang biktima na si PCG Apprentice Seaman Angelo Martinez, 23-anyos.
Ayon sa Coast Guard, nag-usap pa si Martinez at ang salarin, bago barilin si Martinez sa bibig at bumulagta sa kanyang motorsiklo.
Narekober sa Crime Scene ang dalawang basyo ng Cal.9 mm pistol.
Sinubukan pang dalhin sa pagamutan si Martinez pero agad din itong binawian ng buhay. —sa panulat ni Mara Valle
Sugatan ang tatlong residente ng Maragondon, Cavite matapos pagbabarilin ng mga pulis sa kalagitnaan ng demolisyon sa Patungan Cove, Barangay Sta. Mercedes.
Ayon kay Charm Maranan, Tagapagsalita ng Defend Southern Tagalog, tinamaan sa bandang tiyan ang mga hindi pinangalanang biktima dahil sa pagpigil sa demolisyon sa kanilang mga bahay sa tabing-dagat.
Iginiit naman ng Cavite Provincial Police na sumusunod lamang sila sa utos upang ma-kontrol ang sitwasyon.
Ang nasabing lugar ay planong pagtayuan ng hotel at resort ng Manila Southcoast Development Corporation, na pag-aari ni yumaong Business Tycoon Henry Sy. —sa panulat ni Mara Valle
Natiklo ang isang babae matapos mahuling nagbebenta ng mga pekeng Vaccination card sa Santiago City, Isabela.
Kinilala ang suspek na si Joan Dariano, 31- anyos.
Ayon sa pulisya, mayroon umanong pekeng pirma ng mga lokal na opisyal ang card na ibinibenta ng P100 kada isa sa loob ng palengke.
Bagaman itinanggi ni Dariano ang paratang, nahaharap pa rin siya sa kasong paglabag sa Article 170 ng Revised Penal Code o Falsification of Public Document. —sa panulat ni Mara Valle
Tinatayang P680K halaga ng shabu ang nasabat mula sa dalawang naarestong indibidwal sa Quezon City.
Kinilala ang mga suspek na sina Michael Bryan Ortiz at Josephine Dela Cruz na kapwa nasa drug watchlist.
Narekober sa buybust operation ang 6 na plastic sachet na naglalamang ng 100 grams ng shabu at marked money.
Nasa kustodiya na ng otoridad ang mga suspek na kapwa nahaharap sa kasong paglabag sa Comprehensive Dangerous Drug Act of 2002. —sa panulat ni Mara Valle
Inihayag ni Lakas-CMD vice presidential bet at Davao City Mayor Inday Sara Duterte na hindi magkakaroon ng Isko-Sara Tandem
Binigyang diin ni Mayor Sara na buo ang kanyang tiwala at loyalty sa kanyang Ka-tandem na si presidential aspirant Ferdinand ‘Bongbong’ Marcos, Jr.
Aniya, nirerespeto niya ang kagustuhan ng ilan na maging Ka-tandem niya si Manila Mayor Isko Moreno ngunit aniya’y hindi niya
Ang naturang pahayag ni Duterte ay bilang tugon sa plano ng kampo ni Moreno na maka-tandem siya sa darating na 2022 polls.
Aniya, sa kabila ng mga pagsubok at limitasyon, ang preparasyon niya sa kandidatura bilang vice-president ni Marcos ay nananatili aniyang maayos sa tulong ng mga volunteers at tagasuporta sa iba’ti bang panig ng bansa.
Ito aniya ang nagbibigay sa kanya ng lakas, katatagan at inspirasyon.
Sinabi pa ni Inday Sara na naniniwala siya karanasan sa pamamahala, kahandaan at kakayahan ni BBM na pamunuan ang bansa.
”nang nagdesisyon akong tumakbo sa pagka-vice-president, pinili ko pong maging ka-tandem si BBM. Dahil dito, nabuo ang UniTeam BBM-Sara,” ani Duterte.
Binigyang-diin pa nito ang walang kapantay na loyalty sa kanya ng Lakas CMD, gayundin sa Partido Federal ng Pilipinas (PFP) na partido ni Marcos.
Nitong Sabado, isang grupo na nagpakilalang Is-Sa o Isko-Sara Unity Team ang naglunsad para ilaglag ang katandem ni Isko na si Dr. Willie Ong at hikayatin si Duterte na suportahan si Isko – bagay na tinanggihan ng running-mate ni Marcos.
Sa kabila ng mga pagtatangka para buwagin ang BBM-Sara UniTeam, patuloy ang panawagan ng tambalang Marcos-Duterte sa mamamayang pilipino ng pagkakaisa upang malampasan ang dinaranas na kahirapan ngayong may pandemya.
Magkakaroon ng bagong coach ang kuponang PLDT Home Fibr Power Hitters para sa Premier Volleyball League (PVL) Open Conference sa February 16.
Ito’y matapos na hindi magrenew ng kontrata ang dating coach na si Roger Gorayeb na siyang humawak sa kuponan sa loob ng walong taon.
Dahil dito, pamumunuan ni Mentor George Pascua ang nasabing team.
Maliban sa coaching staff ay may ilang bagong manlalaro rin ang papasok sa Power Hitters at isa na rito si Veteran Playmaker Rhea Dimaculangan.
Samantala, target ng nasabing grupo na malampasan ang Seventh Place Finish nito sa PVL Open Conference noong nakaraang taon. —sa panulat ni Airiam Sancho
Inihayag ng Food and Drug Administration (FDA) na hindi bababa sa dalawang kumpanya na gumagawa ng self-administered antigen COVID-19 test kit ang nag-apply para sa pag-apruba nito sa gitna ng pagdami ng bilang ng kaso ng COVID-19.
Sa Laging Handa Briefing tinukoy ni FDA Officer-In-Charge Director Oscar Gutierrez ang mga kumpanyang Clearbridge, Incorporated at M.O.H.S Analytics, Incorporated.
Aniya, ang Research Institute for Tropical Medicine (RITM) ang nagtakda ng mga requirements para sa nasabing aplikasyon kaya hindi niya alam kung hanggang kailan ito tatagal.
Sinabi pa ni Gutierrez na magpapasya sila kung magbibigay ng special certicification sa mga naturang aplikante kung makuha na ng FDA ang validation performance report mula sa RITM sa loob ng apat na put walong oras.
Matatandaang tumaas ang demand para sa self-administered antigen covid-19 test kit kasunod ng pagtaas ng positivity rate ng covid-19 sa bansa.
—sa panulat ni Airiam Sancho
Pansamantalang isinara ang karamihan sa vaccination sites sa lungsod ng Mandaluyong City.
Ayon sa Mandaluyong City Public Information Office, limitado muna ang bakunahan dahil nagkaroon ng COVID-19 ang ilan sa mga miyembro ng kanilang vaccination team at naka-quarantine naman ang mga close contacts nito.
Dahil dito, ang Unilab Bayanihan Vaccination site sa Barangay Highway Hills lamang ang bukas hanggang bukas, Enero 14.—sa panulat ni Airiam Sancho
Inihayag ng National Kidney and Transplant Institute (NKTI) na mananatili sa hindi bababa na pitong araw na quarantine ang kanilang healthcare workers na magpopositibo sa COVID-19.
Ayon kay NKTI Executive Director Doctor Rose Marie Rosete-Liquete, hindi nila sinunod ang pinaiksing quarantine period na inaprubahan ng gobyerno sa mga nasabing indibidwal para sa proteksyon ng kanilang mga immunocompromised na pasyente.
Samantala, sinabi ni liquete na mahigit limang daang (531) healthcare workers sa nkti ang nagpositibo sa COVID-19 simula nitong Enero.