DWIZ 882

Inanunsyo ng Light Rail Transit Authority (LRTA) na ang mga bakunadong pasahero ng LRT line 2 ay dapat magpakita ng dokumento bago makasakay sa tren.

Kabilang dito ang physical o digital copy ng vaccination card o vaccination certificate mula sa Department of Health (DOH).

Samantala, ang mga hindi sakop ng “No Vaccination, No Ride” Policy ng department of transportation ay kailangang magpakita ng mga sumusunod:

Medical certificate na pirmado at may contact number ng mga doctor at barangay health pass.

Matatandaang magsisimula ang pagpapatupad ng naturang polisiya sa Enero 17.—sa panulat ni Airiam Sancho

Aabot sa mahigit dalawang daan (234) ang market vendors na hindi pa bakunado.

Ito’y ayon sa lokal na pamahalaan ng Quezon na nagsagawa ng inspeksyon sa mga palengke upang alamin ang bilang ng mga hindi pa nababakunahang tindero.

Samantala, ang hakbang ay alinsunod sa ordinansa na ipinatupad ng nasabing lungsod kaugnay sa paglilimita ng mga gawain ng mga naturang indibidwal at pag-obliga sa mga ito na sumailalim sa RT-PCR test kada dalawang linggo.—sa panulat ni Airiam Sancho

Posibleng mas mataas pa ang aktwal na bilang kumpara sa naitatalang kaso ng COVID-19 sa bansa.

Ito ang sinabi ni Health Undersecretary Maria Rosario Vergeire kung saan hindi kabilang ang mga indibidwal na nagpopositibo gamit ang antigen tests sa tala ng arawang kaso ng COVID-19.

Sinabi rin niya na mayroon ding iilan na hindi nagpapasuri at sa halip ay pumupunta ng isolation facility.

Samantala, tinukoy ni Vergeire na ang pamantayan sa pagtukoy ng mga impeksyon sa COVID-19 ay sa pamamagitan ng RT-PCR tests.—sa panulat ni Airiam Sancho

Natitiyak na ang pagkapanalo ni presidential aspirant Ferdinand ‘Bongbong’ Marcos Jr., kung ngayon isasagawa ang halalan sa probinsya ng Cavite matapos na makakuha ng 62% sa internal survey.

Malayong pumapangalawa lamang si Ping Lacson na mayroong 16% habang nasa ikatlong pwesto si Leni Robredo na mayroong 9%, 6% naman ang nakuha ni Isko Moreno at si Manny Pacquiao na may 4% sa resulta ng survey.

Ayon sa facebook page ni Cavite Governor Jonvic Remulla, ito’y isinagawa noong Disyembre a-1 hanggang a-5 na nilahukan ng 1,600 na respondent.

Sinabi pa ng Gobernador na naniniwala siyang mananalo sa pagkapangulo sa Halalan 2022 si Marcos.

Samantala, batay sa pinakahuling tala ng COMELEC noong 2019, ang Cavite ang pangalawa sa itinuturing na vote-rich province sa buong bansa na may mahigit dalawang milyong botante, pangalawa ang Cebu na mayroong mahigit tatlong milyong botante.

Matatandaang patuloy na nangunguna sa lahat ng survey ng mga respetadong kumpanya si Marcos at kaniyang ka-tandem na si Davao Mayor Inday Sara.

Nasa ‘blueprint’ na ng BBM-Sara Uniteam ang planong modernisasyon ng Pasig River Ferry System bilang isa sa alternatibong paraan upang maibsan ang mabigat na daloy ng trapiko sa Metro Manila.

Ayon kay Partido Federal ng Pilipinas (PFP) standard bearer Ferdinand ‘Bongbong’ Marcos Jr., kikilos sila ni Mayor Sara Duterte matapos silang manalo sa halalan ngayong darating na Mayo at bibigyang prayoridad nito ang pagpapaunlad sa transportasyong pang-lantsa sa Ilog Pasig na na-uugnay sa Laguna De Bay hanggang Manila Bay.

Batay sa pag-aaral na isinagawa ng Japan International Cooperation Agency (JICA) noong Pebrero 2018, mahigit tatlong bilyong piso (P3.5) ang nawawalang potensyal na kita kada araw ng bansa dahil sa matinding trapiko sa Metro Manila.

Dahil dito, layunin din ng BBM-Sara uniteam na pabilisin ang pag-apruba sa isinusulong na Pasig River Ferry Convergence Program ng Duterte administration.

Nabatid sa ginawang pag-aaral ng Department of Transportation (DOTr) na ilan sa dahilan kung bakit nalulugi ang ferry system ay dahil sa hindi ito tinatangkilik ng karamihan sa mga kababayan.

Ngunit, ayon sa Uniteam, isa sa nakitang dahilan rito ay ang ‘informal settlers’ na malaking isyu sa seguridad, gayundin ang pagsulputan ng water lily at ang hindi magandang amoy na nalalanghap sa paligid ng Ilog Pasig.

Samantala, kumpiyansa ang Marcos-Duterde team na mapalakas ang nasabing ferry system para sa pagpapalakas ng ekonomiya.

Nagbabala si Pilipino Society and Development Advocates Commuter-Consumer (PASADA-CC) Spokesman Ric Rivera na posibleng sa mga colorum na sasakyan na lamang sumakay ang mga biyahero dahil sa ipinatupad na polisiyang “No Vaccination, No Ride” sa National Capital Region (NCR).

Aniya, ito’y dahil hindi sumusunod sa IATF protocols ang mga colorum vehicles na posibleng magdulot ng hawaan ng COVID-19 sa mga pasahero.

Samantala, sinabi ni rivera na nasa 12 libong colorum vehicles ang dumadaan sa mga lansangan.—sa panulat ni Airiam Sancho

Inihayag ni Pasang Masda President Obet Martin na malaki ang epekto ng “No Vaccination, No Ride” Policy sa hanay ng transportasyon.

Sa panayam ng DWIZ, sinabi ni Martin na bagama’t mayroon itong epekto, sinusuportahan nila ito upang maiwasan ang pagdami ng kaso ng COVID-19.

Aniya, isa rin ito sa paraan ng gobyerno kaugnay sa panghihikayat na magpabakuna na ang mga hindi pa bakunado dahil ito ang panlaban sa naturang sakit.

Samantala, sinabi ni Martin ang mga paraan kung paano nila ito ipatutupad sa kanilang hanay.  —sa panulat ni Airiam Sancho

Aabot sa 24 na sibilyan ang naaresto ngayong araw dahil sa paglabag sa pina-iiral na Election Gun Ban ng Commission on Elections (COMELEC).

Ito’y batay sa datos ng Philippine National Police (PNP) mula sa may 2,975 na mga inilatag na checkpoint sa iba’t ibang panig ng bansa.

Nanguna ang National Capital Region (NCR) sa nagtala ng pinakamaraming lumabag na may 8, sinundan naman ito ng Central Luzon, CALABARZON, Bicol, Western at Central Visayas.

Gayundin sa Zamboanga Peninsula, SOCCSKSARGEN at CARAGA sa bahagi naman ng Mindanao.

Sa ikinasang operasyon, 8 sa mga nakumpiska ang mga baril, 6 ang patalim at iba pang nakamamatay na bagay, 43 ang bala at 2 ang replica ng baril.

Dahil dito, aabot na sa 64 sa kabuuan ang bilang ng mga naaresto dahil sa paglabag sa gun ban buhat nang simulan itong ipatupad nuong Enero a-9. —sa ulat ni Jaymark Dagala (Patrol 9)

Itinalaga ni Philippine National Police (PNP) Chief P/Gen. Dionardo Carlos si PNP Public Information Office (PIO) Chief at Spokesperson P/Col. Roderick Alba bilang pangunahing tagapagsalita na may kinalaman sa media security ngayong panahon ng halalan.

Ito ang inihayag ni Carlos bilang pagtalima sa direktiba ni DILG Sec. Eduardo Año para tiyakin ang kaligtasan ng mga mamamahayag sa pagganap ng kanilang tungkulin ngayong nalalapit na eleksyon.

Ayon kay Carlos, si Alba ang hahawak sa pambansang lebel habang inatasan din nito ang mga Regional Chiefs, Public Information Office para siyang tumoka sa mga mangyayari sa rehiyon.

Gayundin ang mga Provincial, City at Municipal Public Information Officers ng PNP na siyang magiging focal persons sa kani-kanilang mga lokalidad.

Tiwala ang PNP Chief na dati ring naging tagapagsalita ng Pambansang Pulisya na sa pamamagitan ng magandang relasyon sa pagitan ng media at ng Pulisya, matitiyak din nila ang kaligtasan ng mamamayan. —sa ulat ni Jaymark Dagala (Patrol 9)