DWIZ 882

Mariing kinondena ng Philippine National Police (PNP) ang nangyaring pamamaslang sa mamamahayag na si Jaynard Angeles sa Sultan Kudarat kahapon.

Ito ang dahilan ayon kay PNP Spokesman P/Col. Roderick Alba kaya’t kumikilos na sila para plantsahin ang mga dapat ayusin sa pagtatalaga ng focal person on media security.

Ang hakbang ay bilang tugon sa direktiba ni Department of the Interior and Local Government (DILG) Sec. Eduardo Año upang hindi na maulit pa ang pamamaslang o pangha-harass sa mga miyembro ng media.

Sinabi ni Alba na kinikilala ng liderato ng PNP sa pangunguna ni P/Gen. Dionardo Carlos ang kahalagahan ng Media sa paghahatid ng tamang impormasyon at balita sa publiko lalo na ngayong panahon ng Halalan.

Tiniyak ng PNP na magiging katuwang sila ng media sa mga panahong ito ng Halalan kung saan ay inaasahan ang mas malalaking hamon sa pagtupad ng kanilang tungkulin. —sa ulat ni Jaymark Dagala (Patrol 9)

Pumalo na sa 96 ang kabuuang bilang ng mga pasahero ng Metro Rail Transit (MRT) Line 3 ang boluntaryong sumailalim sa COVID-19 Antigen test buhat nang simulan ito noong Enero a-11.

Batay sa ulat ng pamunuan ng MRT 3, 10 ang nagpositibo sa COVID-19 antigen test na naitala kahapon habang nasa 86 naman ang nagnegatibo sa virus.

Isinasagawa ang voluntary at random antigen testing sa mga istasyon ng MRT sa North Avenue, Cubao, Shaw Boulevard at Taft Avenue.

Pinauuwi ang mga nagpopositibo sa COVID-19 para mag-quarantine at hihimuking makipag-ugnayan sa kanilang mga lokal na Pamahalaan para sumailalim sa RT-PCR test.

Habang binibigyan naman ng libreng sakay ang mga pasaherong nagnenegatibo sa test. —sa ulat ni Jaymark Dagala (Patrol 9)

Nanatiling mataas ang bilang ng mga tinatamaan ng COVID-19 sa hanay ng Philippine National Police (PNP) ngayong araw.

Batay sa datos ng PNP Health Service ay pumalo na sa 44,635 ang kabuuang bilang ng mga tinamaan ng virus matapos madagdagan ito ng 450 bagong kaso.

Mula sa naturang bilang ay muling sumipa sa 3,262 ang bilang ng aktibong kaso kumpara sa mahigit 2,800 na naitala kahapon.

Nasa 31 naman ang mga bagong gumaling sa sakit kaya’t umakyat na sa 41,248 ang kanilang total recoveries habang nakapako pa rin sa 125 ang kanilang death toll.

Ayon kay PNP Chief P/Gen. Dionardo Carlos na nagpositibo rin sa COVID-19, lahat ng mga naitatalang kaso ay mayruon lamang mild symptoms dahil halos karamihan sa mga ito ay bakunado na at ang iba’y may booster shots pa.

Muling tiniyak ni Carlos na hindi maaapektuhan nito ang kanilang operasyon lalo’t kabi-kabilaan na rin ang mga nakalatag na COMELEC Checkpoint sa iba’t ibang panig ng bansa. —sa ulat ni Jaymark Dagala (Patrol 9)

Tinupok ang isang Residential Area sa kanto ng Recto Avenue at Benavides Street sa Sta. Cruz, Maynila.

Ayon sa Bureau of Fire Protection, dakong alas 3: 32 ng hapon nang magsimula ang sunog na umabot sa ikalawang alarma.

Dakong alas-4:30 nang ideklara itong under control.

Wala namang nasawi o nasaktan habang patuloy na iniimbestigahan ang sanhi ng pagkalat ng apoy.   —sa panulat ni Mara Valle

Suportado ng kampo ni presidential aspirant Ferdinand “Bongbong” Marcos Jr. ang “No Vaccination, No Ride” policy ng Department of Transportation.

Ayon kay Atty.  Vic Rodriguez, tagapagsalita ni Marcos, mainam na ipatupad ang naturang polisiya ngayong tumataas ang mga kaso ng COVID-19.

Gayunman, sinabi ni Rodriguez na kailangan pa ring paigtingin ng pamahalaan ang Vaccination program nito.

Aniya, kailangan ng mga tao na makapagtrabaho upang mapunan ang pangangailangan ng kanilang mga pamilya ngunit kinikilala rin aniya nila ang ginagawang hakbang ng pamahalaan upang balansehin ang problemang pangkalusugan at ekonomiya sa harap ng COVID-19 pandemic.