DWIZ 882

Suportado ng BBM-Sara UniTeam ang inisyatibo ng pamahalaan at pribadong sektor kaugnay sa lokal na produksyon ng Molnupiravir bilang gamot sa COVID-19.

Ayon kay presidential aspirant Ferdinand ‘Bongbong’ Marcos Jr. at running-mate na si Davao City Mayor Inday Sara Duterte, naniniwala sila na malaki ang maitutulong ng nasabing gamot upang makarekober ang bansa sa biglaang pagdami ng kaso ng COVID-19.

Base sa isang Phase 3 clinical trial na isinagawa sa India, ang Molnupiravir ay nakakapagpababa ng viral load ng mga pasyente at mabilis ring nakakapagtala ng negatibong resulta sa RT-PCR tests.

Kaugnay nito, inanunsyo ng Philippine Board of Investments na inaprubahan nito kamakailan ang aplikasyon ng isang local pharmaceutical company na gumawa ng Molnupiravir sa bansa matapos na makakuha ng technology transfer agreement sa isang pharmaceutical company sa India.

Magsisimula naman ang produksyon ng naturang gamot sa isang pasilidad sa Bulacan kung saan inisyal na target ng gobyerno na makagawa ng isang milyong kapsula na may suggested retail price na 65 pesos kada tableta.

Samantala, sinabi ng BBM-Sara UniTeam na makabubuti ito sa pangmatagalang laban ng bansa kontra COVID-19 dahil mababa ang presyo nito at mas maraming Pilipino ang makabibili.

Nakapagtala ang Philippine National Police (PNP) ng 86 na naaresto dahil sa paglabag sa pinaiiral na COMELEC gun ban para sa Halalan 2022.

Ayon sa PNP, nagmula ito sa kabuuang 18,978 checkpoints na inilatag ng mga awtoridad sa iba’t ibang panig ng bansa buhat nang magsimula ang election period.

Nagmula ang mga naaresto sa NCR, Bicol, Davao, Ilocos, Central Luzon, Central Visayas, Cordillera, Western Visayas, at CALABARZON.

Maliban sa mga baril, nakumpiska rin ng mga awtoridad ang ilang deadly weapon, replica ng baril at samu’t saring mga bala.

Tumaas pa sa 372 ang mga lugar sa bansa na nakapailalim sa granular lockdown sa buong bansa.

Batay ito sa datos ng Philippine National Police o PNP mula sa 206 na lugar na naitala kahapon.

Nangunguna ang National Capital Region o NCR na may pinakamaraming lugar na naka-granular lockdown na may 103.

Sinundan naman ito ng mga rehiyon ng Cordillera, Ilocos, Cagayan, CALABARZON at MIMAROPA.

Mula sa nabanggit na bilang, aabot sa 1,308 indibidwal ang apektado ng granular lockdown Magkatuwang naman ang may 415 Pulis at 585 na mga Force Multipliers sa pagbabantay sa mga lockdown areas. —ulat mula kay Jaymark Dagala (Patrol 9)

Magsisilbing pilot area sa pagpapatupad ng No Vaccination, No Ride policy ang National Capital Region o NCR.

Ito ang paglilinaw ng Department of Transportation o DOTr kasunod ng nakatakdang pagpapatupad nito sa susunod na Lunes, Enero a-17.

Sa virtual Press Briefing ng DOTr, sinabi ni USec. Artemio Tuazon, tanging sa Metro Manila pa lang ipatutupad ang naturang polisya dahil dito nakapagtala ng pinakamataas na kaso ng COVID-19.

Gayunman, nilinaw ni USec. Reiner Yebra na maaari pa ring sumakay ng pampublikong transportasyon ang mga hindi bakunado basta’t may hawak silang katibayan na essential o mahalaga ang kanilang paglabas.

Nanindigan ang DOTr na hindi discriminatory ang No Vaxx, No Ride policy lalo’t ang layunin nito na pigilan ang mas lalong hawaaan ng virus dulot ng Omicron variant. —ulat mula kay Jaymark Dagala (Patrol 9)

Sinusuportahan ng bagong datos na gamitin ang bakunang AztraZeneca bilang 3rd dose o booster shot laban sa COVID-19.

Ayon sa pagsusuri, ang nasabing bakuna ay nagpapataas ng immune response o panlaban ng katawan sa Beta, Delta, Alpha at Gamma variants ng Sars-Coronavirus 2.

Lumabas din sa isang trial na tumaas ang tugon ng antibody laban sa Omicron variant matapos mabakunahan ng booster o 3rd dose ng AztraZeneca, kung saan ito ay naobserbahan sa mga indibidwal na nabakunahan ng primary dose ng Moderna at AztraZeneca.

Maliban dito, napataas din ng nabanggit na bakuna ang antibody ng mga nakatanggap ng una at 2nd dose ng Sinovac batay sa hiwalay na phase iv trial na nakalathala sa The Lancet.

Ang datos na ito ay mula sa patuloy na pag-aaral na sumusuporta sa pag-gamit ng bakunang AztraZeneca anuman ang brand na natanggap na primary dose.

Kaugnay nito, sinabi ni DOST Adult Infectious Disease Expert at Vaccine Expert Panel Dr. Rontgene Solante na may mga pag-aaral din na maganda ang proteksyon na maihahatid ng naturang bakuna kung kaya’y ito’y dapat ding gamitin.

Samantala, ang karagdagang datos na ito ay isinusumite sa mga kagawaran ng kalusugan sa buong mundo dahil sa agarang pangangailangan para sa 3rd dose o booster shot.

Pumalo na sa mahigit 45,000 ang kabuuang kaso ng COVID-19 sa hanay ng Philippine National Police (PNP).

Ito’y ayon sa PNP Health Service ay matapos madagdagan ng 548 na bagong kaso ngayong araw.

Dahil diyan ay umakyat na sa 3,766 ang bilang ng mga aktibong kaso sa hanay ng Pulisya.

May 44 na bagong gumaling sa sakit kaya’t umakyat na sa 41,137 ang total recoveries Habang walang naitalang bagong nasawi kaya’t nananatili naman sa 125 ang kanilang death toll. —ulat mula kay Jaymark Dagala (Patrol 9)

Sinabi ni Bangko Sentral ng Pilipinas Governor Benjamin Diokno na kumpiyansa siyang makakamit pa rin ng bansa ang growth target nito na 7-9% ngayong taon na paglago sa kabila ng mga muling pagtaas ng kaso ng COVID-19.

Tiniyak ni Diokno sa mga Top Business Executives na ang sistema ng Banking sa bansa ay nananatiling maayos at may kakayahang harapin ang mga hamon na dulot ng pandemya gayundin ang inflation at pagbabago ng International Monetary policies.

Aniya, ang bansa ay may sapat na Cash buffer para sa mga External Shocks, Manageable Bad Debt Levels, pagbagal ng inflation at pagtaas ng pautang sa bangko.  —sa panulat ni Mara Valle