DWIZ 882

Mananatili ang Metro Manila kabilang ang iba pang lugar sa alert level 3 mula January 16 hanggang January 31.

Sa ilalim ng alert level 3, bukas ang ilang establisyimento sa 30% indoor capacity para sa mga fully vaccinated na indibidwal at 50% para sa outdoor capacity.

Bawal din sa ilalim ng nasabing alert level ang in-person classes, contact sports, funfairs o perya at casino.

Samantala, sa huling tala ng Philippine National Police (PNP), nasa higit tatlong daang (372) mga lugar sa bansa ang nasa ilalim ng granular lockdown.  —sa panulat ni Airiam Sancho

Inihayag ng Department of Trade and Industry na 94.24% sa mga business establishments sa NCR ang sumusunod sa Minimum Public Health Standards (MPHS) na itinakda ng gobyerno upang mabawasan ang pagdami ng kaso ng COVID-19 sa bansa noong nakaraang taon.

Ayon sa DTI-Fair Trade Enforcement Bureau (DTI-FTEB), sa mahigit limang libong (5,267) kumpanyang ininspeksyon noong 2021, mahigit apat na libo rito (4,121) ang nag-obserba at sumunod sa health standards.

Nasa mahigit isang libo (1,146) naman na non-compliant business establishments ang inisyuhan ng request for corrective action o rcas kung saan halos anim na raan (590) dito ang sumunod sa itinakdang oras at halos tatlong daan (292) ang inendorso sa mga lokal na pamahalaan (LGUs) para sa karagdagang aksyon at imbestigasyon.

Samantala, sinabi ni DTI Consumer Protection Group Undersecretary Ruth Castelo na dapat na mahigpit na sundin ng mga negosyante ang health protocols para sa mas ligtas na operasyon sa gitna ng pandemya. —sa panulat ni Airiam Sancho

Nagpahayag ng suporta ang Philippine Airlines (PAL) at Air Asia Philippines sa patakaran ng Department Of Transportation na nagbabawal sa mga hindi bakunadong indibidwal na sumakay sa pampublikong transportasyon sa National Capital Region habang nasa ilalim ng alert level 3.

Ayon kay PAL President and Chief Operating Officer Gilbert Santa Maria, pinupuri nila ang inisyatiba ng DOTr na tulungan ang publiko na magkaroon lamang ng essential travels sa gitna ng pandemya.

Samantala, tiniyak ni santa maria sa publiko na mahigpit nilang susundin ang health and safety protocols sa kanilang operasyon. —sa panulat ni Airiam Sancho

Sinuspinde ng Department of Education- Calabarzon ang mga klase sa lahat ng grade level mula January 17 hanggang January 29 sa gitna ng pagtaas ng kaso ng COVID-19 sa rehiyon.

Kabilang dito ang Cavite, Laguna, Batangas at Quezon.

Ayon sa Deped-Calabarzon, ang pagsuspindi ay bahagi ng inisyatiba ng rehiyon para sa ligtas na operasyon at kapakanan ng mga nasasakupan.

Kasama rito ang lahat ng aktibidad sa paaralan, pisikal man o online na kinabibilangan ng mga guro, mga mag-aaral at mga magulang.

Mananatili naman sa January 31 hanggang February 5 ang midyear break sa kabila ng pagpapaliban ng mga klase.

Samantala, hinikayat ng deped-calabarzon ang schools division offices na magsagawa ng curriculum adjustments pagkatapos ng nasabing suspensyon. —sa panulat ni Airiam Sancho

Tuloy ang selebrasyon ng panagbenga festival sa kabila ng pagdami ng kaso ng COVID-19 sa bansa.

Ayon kay Baguio City Mayor Benjamin Magalong, idadaos ng Flower Festival Foundation ang kapistahan ngunit hindi nila ipatutupad ang crowd-drawing event tulad ng street and float parade na dinarayo ng karamihan bilang pag-iingat sa pandemya.

Samantala, nakasalalay pa rin aniya ito sa sitwasyon ng COVID  sa naturang siyudad kung ikakasa sa Pebrero o iuurong sa Marso. —sa panulat ni Airiam Sancho

Arestado ang dalawang babae at isang lalaki matapos ang ikinasang buy-bust operation ng otoridad sa Barangay North Bay Boulevard, Navotas.

Batay sa imbestigasyon, nakumpiska sa mga suspek ang mahigit isang daang gramo (158g) ng hinihinalang shabu na tinatayang nagkakahalaga ng mahigit isang milyong piso.

Nahaharap naman ang mga ito sa kasong paglabag sa ra 9165 o comprehensive dangerous drugs act of 2002. —sa panulat ni Airiam Sancho

Nilinaw ni Department Of Transportation Undersecretary Reinier Paul Yebra na ang fully vaccinated persons lamang ang maaaring makasakay o makapasok sa mga pampublikong sasakyan sa pagpapatupad ng “No Vaccination, No Ride” policy sa Metro Manila na magsisimula sa Lunes, January 17.

Sa panayam ng DWIZ, sinabi ni Yebra na naglabas din ng guidelines sa road sector ang LTFRB at lto kaugnay sa nasabing department order.

Matatandaang sa nasabing polisiya ay may exemptions din para sa may mga medical conditions na hindi makakapagpabakuna, sinabi ni Yebra na kailangan lamang aniyang magpakita ng medical certificate na nakalagay ang pangalan at contact number ng doctor at quarantine o barangay health pass para sa paglabas at pagbili ng mga pangunahing pangangailangan. —sa panulat ni Airiam Sancho

Nilinaw ni National Task Force Special Adviser Ted Herbosa na pinag-uusapan pa ng IATF kung kailan ipatutupad ang pinaiksing quarantine at isolation period para sa mga fully vaccinated na indibidwal.

Sa panayam ng DWIZ, sinabi ni Herbosa na ito ay na-implementa pa lamang sa mga healthcare worker.

Samantala, muling hinikayat ni Herbosa ang publiko na magpabakuna kontra COVID-19.   —sa panulat ni Airiam Sanch