DWIZ 882

Inihayag ng Food And Drug Administration (FDA) na posibleng magkaroon ng maling resulta ang mga gagamit ng home antigen test kits.

Ayon sa FDA Director General Oscar Gutierrez, posibleng magpanic ang isang pasyente kung magkakaroon ng false positive at negative results.

Sinabi ni Gutierrez na hindi lahat ng antigen test kit ay kayang ma-detect ang Omicron COVID-19 variant.

Samantala sa naging pahayag naman ni Biotechnology Consultant Paolo Cagalingan, importanteng tingnan kung maayos pa ang dessicant o ang maliit na pakete sa loob na may lamang silica gel at alamin din kung lisensyado mula sa FDA ang mga manufacturer maging ang mga tindahang nagbebenta ng medical supplies.

Sa ngayon ay pinoproseso pa ng FDA ang pag-apruba ng aplikasyon ng dalawang manufacturer ng home test kits. —sa panulat ni Angelica Doctolero

Muling naitala ang panibagong record high matapos umakyat sa 37,207 ang bagong kaso ng COVID-19 sa bansa na may kabuuang 3,129,512 ng mga tinamaan ng nakakahawang sakit.

Sa datos ng Department Of Health (DOH), umabot sa 265,509 ang aktibong kaso ng virus sa pilipinas kung saan, karamihan dito ay mga mild cases at asymptomatic.

Nasa 2,811,188 naman ang kabuuang bilang ng mga gumaling sa virus matapos na madagdagan ng 9,027.

Habang 52,815 naman ang kabuuang bilang ng mga nasawi sa COVID-19 matapos maitala ang 81 na panibagong mga nasawi sa virus. —sa panulat ni Angelica Doctolero

Nababahala ngayon ang Department Of Health-Bicol sa mabilis na pagtaas ng kaso ng COVID-19 matapos maitala ang 409 na bagong kaso sa lalawigan.

Ayon sa DOH-BICOL, kabilang kasi sa mga nagkakasakit ay mga medical health workers na isa sa mga tumutulong para puksain ang nakakahawang sakit.

Kabilang sa may pinaka mataas na kaso ng COVID-19 ay ang lalawigan ng Camarines Sur na mayroong 214 cases; kasunod ng albay  na mayroong 85 cases; Sorsogon na mayroong 83 cases; Camarines Norte na mayroong 61 cases; Catanduanes na mayroong 14 cases; at Masbate na may dalawang kaso ng COVID-19.

Nabatid na noong Enero 12, nasa 601 lamang ang naitalang kaso pero mabilis itong umakyat sa 2,240 cases nito lamang biyernes kung saan, karamihan sa mga nagpositibo ay may history of travel.

Dahil dito, nanawagan sa mga bicolano ang kagawaran ng kalusugan na makipagtulungan para mapigilan ang patuloy na pagsirit ng COVID-19 cases sa rehiyon. —sa panulat ni Angelica Doctolero

10

Magpapatupad sa Lunes, January 17, 2022 ang Department Of Transportation (DOTR) ng “no vaccination, no ride” policy sa mga pasaherong sasakay ng MRT-3.

Ito ay para maprotektahan ang mga pasahero sa lumalalang bilang ng kaso ng COVID-19 at omicron variant sa bansa.

Layunin nitong mapangalagaan ang kalusugan ng publiko at mailayo sa panganib ang mga manggagawa maging ang kanilang mga pamilya.

Sa ngayon, patuloy paring nagsasagawa ng random antigen testing ang MRT-3 management sa mga boluntaryong pasaherong magpapatest na ililibre ng sakay sakaling magnegatibo sa nakakahawang sakit habang hindi naman pasasakayin ang mga pasaherong positibo sa COVID-19. —sa panulat ni Angelica Doctolero

Sinuspinde ng Metro Manila Mayors ang pasok sa ilang lugar sa National Capital Region ngayong araw, January 15, 2022 bunsod ng patuloy na pagtaas ng kaso ng COVID-19 sa bansa.

Kabilang sa mga klaseng kinansela ay ang mga sumusunod na lugar:

• Valenzuela – college level, na tatagal hanggang january 22.
• Maynila – lahat ng antas
• San Juan – lahat ng antas at
• Pasay – lahat ng antas na magsisimula sa January 17, na tatagal hanggang January 22.
• Antipolo at
• Calabarzon na magsisimula sa January 17 hanggang January 29.

Nito lamang Biyernes, nakapagtala ng 37,207 ang bilang ng bagong kaso  ng COVID-19 sa Pilipinas kung saan, 47.3% ang naitalang positivity rate na pinakamataas mula nang magsimula ang pandemya. —sa panulat ni Angelica Doctolero

Nagpositibo sa COVID-19 ang isang balikbayan mula Australia na nagsumite ng pekeng RT-PCR test result para makalabas sa isang hotel sa Makati City.

Base sa nakuhang impormasyon, January 6 nang isailalim sa RT-PCR test sa naturang hotel ang lalaking balikbayan pero hindi na nito nahintay ang resulta na nakatakda sanang lumabas sa January 7.

Ayon sa manager ng hotel na pinaglagian ng lalaking balikbayan, nagpupumilit at agad itong lumabas matapos sunduin ng kaniyang mga kaibigan.

Nabatid na pinadala umano ng lalaki sa hotel management ang kaniyang negative test result sa pamamagitan ng email, pero nang kanila itong suriin ay pangalan ng isang babae ang lumabas.

Sinabi ng hotel mangement na nagpositibo din umano sa COVID-19 ang naturang balikbayan sa ikinasang RT-PCR test sa kaniya bago pa man mangayari ang insidente.

Sa ngayon, dinala na ng mga tauhan ng Bureau Of Quarantine sa quarantine facility ang nagpositibong balikbayan.

Pinuri naman ng Department Of Tourism (DOT) ang pamunuan ng hotel sa Makati dahil sa tamang hakbang na kanilang ginawa kabilang na ang pagrereport agad sa kinauukulan matapos magkaroon ng discrepancy sa qr code. —sa panulat ni Angelica Doctolero

Magiging maganda at maaraw ang panahon sa bahagi ng Luzon partikular na sa Western Section ng Luzon dahil sa hanging Amihan.

Makakaranas ng mahihinang pag-ulan ang Eastern part ng Luzon partikular na ang Cagayan Valley dahil parin sa hanging amihan kayat asahan ang malamig na panahon sa nasabing lugar.

Asahan naman ang magandang panahon na mararanasan ng Visayas at Mindanao area pero asahan ang mahihinang pag-ulan sa bahagi ng Zamboanga at malaking bahagi ng Mindanao kasama na ang Soccsksargen at BARMM bunsod ng shearline.

Agwat ng temperatura sa Metro Manila ay nasa 22 hanggang 29 degrees celsius habang sisikat naman ang haring araw mamayang 6:24 ng umaga at lulubog naman ito mamayang 5:46 ng hapon. —sa panulat ni Angelica Doctolero