DWIZ 882

Sinampahan ng kasong pagpatay ang 17 tauhan ng Philippine National Police-Criminal Investigation and Detection Group (PNP-CIDG) Region 4-A sa Batangas.

Kinilala ang mga mag-asawang biktima na sina Ariel Evangelista, 25-anyos at Si Anna Mariz Lemita-Evangelista, 30-anyos kapwa staff members ng isang community organization sa Nasugbu, Batangas.

Ayon kay Justice Undersecretary Adrian Sugay, natutulog sa kanilang tahanan ang mag-anak nang puwersahang pasukin ng mga operatiba ang bahay ng mag-asawa para isilbi ang search warrant ngunit pinaputukan ng mga suspek ang mga biktima dahilan ng kanilang agarang pagkamatay.

Dito na nakarinig ng putok ng baril ang mga kapitbahay na nagsilbing testigo sa pangyayari.

Nakapiit na at nahaharap ang mga suspek sa kasong murder. —sa panulat ni Kim Gomez

Inalis na ng Pilipinas ang pagbabawal sa pagpasok ng mga Filipino travelers mula sa mga bansang nasa red list mula Enero 10 hanggang Enero 31.

Ayon kay Acting Presidential Spokesperson at Cabinet Secretary Karlo Nograles, ang mga fully vaccinated at hindi pa bakunadong traveler mula sa nasabing listahan ay kinakailangang gawin ang mga sumusunod:

• Magpakita ng negatibong RT-PCR test 48 oras bago umalis;
• Sumailalim sa facility-based quarantine at sumailalim sa RT-PCR covid-19 test sa ikapitong araw habang 10 araw naman sa mga hindi pa nababakunahan at
• Kumpletuhin ang natitirang labing apat na araw na quarantine sa bahay kung sila ay negatibo sa RT-PCR covid-19 test;

Sinabi rin ni Nograles na inalis na ng gobyerno ang pagbabawal sa pagpasok ng mga dayuhan basta’t sila ay fully vacinated at napasailalim sa karagdagang mga protocol. —sa panulat ni Kim Gomez

Umaalma ang ilang mga drayber na hindi madali ang pagpapatupad ng “No Vaccination, No Ride” policy ng Department of Transportation (DOTr) simula sa Lunes, Enero 17.

Ayon sa ilang mga driver, na ang patakaran ay magdudulot ng abala sa mga pasahero at sa kanilang kita.

Samantala, sinabi ni DOTr Road Transport Sector Assistant Mark Steven Pastor na ang mga driver at operator ang maaaring maparusahan sa paglabag sa polisiya.

Ayon kay Pastor, aabot sa P1k hanggang P10K ang multa depende sa kung ilang beses nilabag ng mga driver at operator ang naturang patakaran.

Dagdag pa ni Pastor, maaaring masuspinde ang kanilang prangkisa depende sa bigat ng kasalanang nagawa.

Samantala, hindi naman maaaring parusahan ang mga pasahero sa paglabag sa public transport policy dahil wala sila sa saklaw ng department order no.2022-001 ng DOTr. —sa panulat ni Kim Gomez

Inihayag ng Philippine National Police (PNP) na ang lahat ng COVID-19 quarantine at isolation facility sa loob ng Camp Crame ay nasa full capacity na.

Ito ang kinumpirma ni Police Lieutenant General Joselito Vera Cruz, Deputy Chief for Administration at Chairman ng Administrative Support for Covid-19 Task Force (ASCOTF).

Ayon kay Vera Cruz, fully occupied na ang 287 kwarto sa Kiangan emergency treatment facility at iba pang pasilidad ngunit maaari pa ring i-accommodate sa pamamagitan ng room sharing lalo na sa mga pamilyang nahawaan ng COVID-19.

Sinabi rin ni Vera Cruz na hinihintay pa rin ng pnp ang pormal na patnubay mula sa Department Of Health (DOH) sa pinaikling isolation period para ma-decongest ang mga pasilidad.

Samantala, tiniyak naman ni Vera Cruz na hindi mahahadlangan ang operational capabilities at performance ng ahensya sa gitna ng tumataas na kaso ng COVID-19 sa mga kapulisan. —sa panulat ni Kim Gomez

Inaprubahan na ng pandemic task force na gawing isolation facility ang mga quarantine hotels para sa mga indibidwal na nagpositibo sa COVID-19.

Ayon kay acting presidential spokesperson at cabinet secretary Karlo Nograles, inaprubahan ng IATF ang rekomendasyong ito ng Department of Tourism (DOT).

Nabatid na ang mga sumasailalim sa quarantine hotel na nagpositibo sa COVID-19 ay agad inililipat sa magkakahiwalay na isolation facility upang maiwasan ang transmission.

Samantala, sinabi naman ni Nograles na patuloy na dinaragdagan ng gobyerno ang bilang ng mga accredited laboratoriesna hahawak para sa RT-PCR tests. —sa panulat ni Kim Gomez

Nagdagdag ang National Bureau of Investigation (NBI) ng mga ahente sa Cyber ​​Crime Division (CCD) para masolusyonan ang dumaraming reklamo at kaso ng cybercrimes.

Base sa kasunduan na nilagdaan ni Officer-In-Charge Eric B. Distor, ang isang special order sa pagtatalaga ng labing anim na ahente na nagmula sa batch 51 ng NBI academy na novus ilustrado na siyang hahawak sa mga reklamong inihain ng mga pribadong mamamayan tulad ng identity theft, online scam, phishing, cyber libel at iba pang mga paglabag na nasasaklaw ng Cyber ​​Crime Prevention Act of 2012.

Samantala, sinabi ni distor na sa tulong ng mga karagdagang ahente, inaasahang mas mabilis na maaksyunan ang nasabing mga reklamo. —sa panulat ni Kim Gomez

Pinasalamatan ng Department of Social Welfare and Development (DSWD) si Pangulong Rodrigo Duterte sa pagsasabatas ng anti-child marriage law sa bansa.

Binigyang diin ng ahensya ang kahalagahan ng lahat ng mga bata namabigyang proteksiyon at pag-unlad na kanilang kailangan.

Sa ilalim ng batas, pangungunahan ng DSWD ang pagpapatupad ng batas at tututukan ang paglikha ng mga angkop na programa na tutugon sa paglaganap ng child marriage.

Samantala, inatasan naman ng gobyerno ang naturang ahensya na makipagtulungan sa Council for the Welfare of Children (CWC) para sa pagpapalabas ng mga alituntunin at pagtatatag sa popularisasyon at lokalisasyon ng batas. —sa panulat ni Kim Gomez

Hinikayat ng Alliance of Concerned Teachers o (ACT) ang gobyerno na magkaroon ng mas mahusay at mas epektibong tugon upang matiyak na ligtas ang muling pagbubukas ng mga paaralan sa gitna ng pandemya.

Ayon kay Alliance of Concerned Teachers o ACT Secretary-General Raymond Basilio, layunin nitong iligtas ang pagkawala ng pagkatuto ng mga bata sa ilalim ng distance learning.

Nanawagan din si Basilio para sa mga hakbang sa pagbibigay ng proteksyon sa kalusugan at mga benepisyo sa mga guro at empleyado.

Dahil dito, hinimok din ng grupo ang gobyerno na palakasin ang test-trace-treat at pabilisin ang programa ng pagbabakuna lalo na sa mga rural areas.

Dagdag pa ng naturang grupo na ang epektibong pagtugon sa pandemya ay ang mas malaking solusyon upang maibsan ang krisis sa bansa. —sa panulat ni Kim Gomez