DWIZ 882

Pinagbawalan muna ang pagdaraos ng mga aktibidad sa darating na Chinese New Year sa Maynila.

Ayon kay Manila City Mayor Isko Moreno, ipinagbabawal muna ang tradisyunal na mga parada, lion at dragon dance, pagsisindi ng mga paputok sa kalsada, street parties, stage shows, palaro, at iba pa na hahatak ng pulong ng mga tao.

Inatasan din ni Moreno si Manila Barangay Bureau Chief Romeo Bagay na mahigpit na ipatupad ang liquor ban sa Binondo upang maiwasan ang inuman sa mga bahay at kalsada.

Sinabi ni Moreno na kung hindi makakansela ang mga aktidibad, tiyak na magiging ‘super spreader’ ng virus ang naturang selebrasyon lalo na at kalat na ang Omicron variant sa lungsod.

Magugunita na ipagdiriwang ng mga Filipino-Chinese sa bansa ang Chinese New Year sa Pebrero a-1. —sa panulat ni Mara Valle

Matapos simulan ng gobyerno ang pagbibigay ng bakuna sa mga piling pharmacies sa Metro Manila, pinag-aaralan na ng Department of Labor and Employment (DOLE) ang pagbabakuna kontra COVID-19 sa mga opisina at iba pang lugar ng mga manggagawa.

Ayon kay Labor Undersecretary Benjo Santos Benavidez, mas mapapadali ang pagbabakuna sa mga empleyado kung gagawin ito sa lugar kung saan sila nagta-trabaho.

Aniya, nais nilang mas gawing accessible ang bakuna para sa mga manggagawa.

Samantala, una nang sinabi ni Labor Secretary Silvestre Bello, III na dapat ‘exempted’ ang mga manggagawa na wala pang bakuna sa ‘No Vaccine, No Ride’ policy ng gobyerno. —sa panulat ni Mara Valle

Dapat umanong bantayan ng pamahalaan ang kakulangan ng mga tauhan sa ilang mga ospital sa Metro Manila at iba pang lalawigan sa bansa.

Nararanasan kasi ngayon ng mga ospital sa bansa ang muling pagtaas ng kaso ng COVID-19 dahil sa mababang COVID-19 vaccination rate at kakaunting medical facilities.

Ayon kay University of the Philippines COVID-19 Pandemic Response Team Jomar Rabajante, mahalaga na mamonitor ang mga numero ng bawat rehiyon at hindi lang ang pangkalahatang bilang ng mga nagpopositibo sa bansa.

Sinabi ni Rabajante na dapat mabigyang pansin ang mga rehiyon na may mataas na bilang ng mga tinatamaan ng nakakahawang sakit.

Bukod pa dito, dapat din na paigtingin ang paghikayat sa mga pilipino na magpabakuna lalo na sa mga probinsyang mababa parin ang porsyento ng mga bakunado. —sa panulat ni Angelica Doctolero

Winasak ng mga otoridad ang aabot sa 90 milyong pisong halaga ng marijuana plants sa Tinglayan, Kalinga.

Sa tulong ng pinagsanib-pwersa ng mga tauhan ng Police Regional Office-Cordillera at Philippine Drug Enforcement Agency (PDEA) nadiskubre sa dalawang araw na big-time eradication ang anim na plantation sites sa Brgy. Loccong at Brgy.Butbut Proper sa Tinglayan.

Aabot sa 280, 000 na piraso ng fully grown marijuana plants (FGMP) ang binunot at sinunog na nagkakahalaga ng 56 million pesos.

Narekober din ang 150 kilos ng dried marijuana leaves na nagkakahalaga naman ng 18 million pesos.

Sa Barangay Butbut Proper, aabot naman sa 80, 000 na piraso ng FGMP ang nakuha na nagkakahalaga ng 16 million pesos.

Ayon kay kalinga Provincial Police Director Peter Tagtag, ang nasabing operasyon ay isa sa pinaka malaking marijuana plants na sinira ng kanilang ahensya sa unang buwan ng taong 2022. —sa panulat ni Angelica Doctolero

Magsasagawa ng 5-days mobile vaccination drive ang Department of Transportation (DOTr) katuwang ang Metropolitan Manila Development Authority (MMDA) sa Parañaque Integrated Terminal Exchange (PITx) sa darating na Lunes, Enero a-24 na tatagal hanggang Enero A-28.

Layunin ng programang “We Vax As One: Mobile Vaccination Drive” na mabakunahan ang mga unvaccinated passengers maging ang mga transport workers gamit ang Astrazeneca vaccine brand bilang first, second, o booster doses.

Target ng nasabing programa na makapagbigay ng 500 bakuna kada araw kung saan, prayoridad ang mga tatanggap ng booster shots.

Magsisimula ang limang araw na bakunahan mula alas-8:00 ng umaga hanggang alas-12:00 ng tanghali sa gate 4 ng ikalawang palapag ng PITX. —sa panulat ni Angelica Doctolero

Tinanggal sa kanilang serbisyo ang isang opisyal at limang jail guards sa Maximum Security Compound ng New Bilibid Prison makaraang makatakas ang apat na preso nito lamang Lunes, January 17.

Sa pahayag ni Bureau of Corrections (BuCor) Spokesperson Gabriel Chaclag, sinibak sa puwesto si Superintendent Arnold Guzman maging ang limang jail guards na posibleng kasabwat sa nangyaring jail break sa Muntinlupa City.

Kinilala ang mga presong tumakas na sina Pacifico Adlawan, Arwin Bio, Chris Ablas at Drakilou Falcon, na pawang may mga kaso ng robbery at pagpatay.

Matatandaang sa ikinasang operasyon ng mga otoridad, napatay sina Adlawan at Bio, makaraang manlaban habang patuloy pang pinaghahanap sina Ablas at Falcon. —sa panulat ni Angelica Doctolero