Drew Nacino

Sinimulan nang ipatupad ng gobyerno ang drug price caps sa pamamagitan ng Executive Order 155 na nilagdaan ni President Rodrigo Duterte.

Inanunsyo ni Health Secretary Francisco Duque, III na nagsimula ang full implementation ng price cap noong Miyerkules, March 23.

Ang mga gamot na saklaw ng kautusan ay tumutugon sa mga nangungunang sakit sa bansa tulad ng hypertension, diabetes, mataas na kolesterol, hika, obstructive pulmonary at colorectal diseases, sakit sa baga at mga cancer sa suso.

Kabilang din ang lahat ng mga piling gamot na inirerekomenda ng mga grupo ng pasyente at mga medical societies para sa mga may malalang sakit sa bato, organ transplantation, thalassemia, psoriasis, rheumatoid arthritis at lupus.

Ipinaliwanag ng kagawaran na ang maximum drug retail price  ay ang pinakamataas na halaga na maaaring singilin ng retailer sa isang mamimili para sa isang gamot na isinailalim sa price regulation.

Pasok ang Pilipinas sa ika-animnapung pwesto ng 2022 World Happines Report.

Umakyat ang Pilipinas sa 60^th place matapos umani ng 5.880 points ang bansa ngayong taon mula sa 61^st place kung saan nakakuha ng 6.006 points noong 2020.

Pumangalawa naman ang bansa sa pinaka-masayahin sa South East Asia, kasunod ng Singapore.

Samantala, nanguna sa world ranking ng Happines Report ang Finland, na sinundan ng kapwa Scandinavian Nation na Denmark, Switzerland;

Iceland, Netherlands, Norway, Sweden, Luxembourg, New Zealand at Austria.

Kung si Pangulong Rodrigo Duterte ang tatangunin, nais niyang kausapin ang sinumang susunod na presidente at talakayin ang issue ng illegal drugs.

Reaksyon ito ng pangulo sa pagkakasabat ng mga otoridad sa mahigit 11 bilyong pisong halaga ng shabu sa Quezon Province.

Inamin ni Pangulong Duterte sa kanyang Talk to the People na nais niyang ipagpatuloy ng mananalong presidente ang sinimulang war on drugs ng kanyang administrasyon.

Ayon sa punong ehekutibo, mas maraming filipino ang maaapektuhan kung makararating sa street level ang iligal na droga.

Tatlong magkakahiwalay na reklamo ang inihain laban kay National Task Force to End Local Communist Armed Conflict (NTF-ELCAC) Spokesperson Lorraine Badoy, sa Office of the Ombudsman.

Hiniling ng mga complainant na binubuo ng 26 na rights activists, teachers, youth leaders at concerned citizens sa pangunguna ng kanilang abogadong sina Antonio La Viña at Rico Domingo, na suspendihin si Badoy.

Ito’y dahil sa pag-uugnay ng Presidential Communications Operations Office Undersecretary kay presidential candidate at Vice President Leni Robredo sa komunistang grupo.

Iginiit ng mga complainant na nakagawa ang tagapagsalita ng NTF-ELCAC ng samu’t saring paglabag sa anti-graft and corrupt practices act and ethical standards of public officials and employees sa pag-red-tagg sa bise presidente.

Nag-ugat ang reklamo sa serye ng social media post ni Badoy na naghahayag na inendorso umano si Robredo ng Communist Party of the Philippines (CPP) maging ng New People’s Army (NPA) at National Democratic Front (NDF).

Inakusahan din ni Badoy ang pangalawang pangulo na nakikipag-alyansa sa Communist Movement sa bansa bagay na itinanggi ng presidentiable.

Tukoy na ng mga otoridad ang sanhi ng kamatayan ng 18 anyos na hazing victim na si Raymark “RR” Rabutazo na sumailalim sa initiation rites ng Tau Gamma Phi Fraternity sa Kalayaan, Laguna.

Batay sa medico legal report, binawian ng buhay ang grade 12 student na si Rabutazo dahil sa subdural hemorrhage secondary to blunt head trauma, indikasyon na pinalo ito ng matigas na bagay.

Nagtapos ang initiation rites alas-9 noong Linggo ng umaga pero bumagsak ang biktima at sinubukan pang tumayo ng kalahating oras habang tinangka siyang i-revive ng mga miyembro subalit binawian ng buhay makalipas ang ilang oras.

Ayon kay Kalayaan Municipal Police Chief, Lt. Erico Bestid Junior, palaisipan kung bakit isinagawa ang initiation sa Barangay San Juan gayong pawang mga taga-Barangay Longos sina RR at iba pang neophytes.

Nangangahulugan anya ito na tinangkang itago ng mga opisyal ng tau gamma ang kanilang aktibidad.

Samantala, tatlong suspek na ang hawak ng mga otoridad na kinilalang sina Kevin Perez, 22 anyos, isa sa mga opisyal ng fraternity, Reyvince Espaldon at Venzon Benedict Lacaocao habang anim na iba pa ang at large.

Nagbitiw na sa pwesto bilang provincial board member ng Negros Oriental si Kurt Matthew Teves matapos makunan ng video na nambugbog ng security guard sa BF Homes, Parañaque City.

Humingi na ng paumanhin si Teves at inaming mali ang kanyang ginawa.

Gayunman, itutuloy pa rin ng guwardya maging ng homeowners association ng BF homes ang kaso laban sa bokal.

Si Teves na ex-officio member ng provincial board ng Negros Oriental ay anak ni Arnulfo Teves na kinatawan ng ikatlong distrito ng lalawigan.

Naniniwala ang Department of Information and Communications Technology (DICT) na hindi banta sa National Security ang pagpasa ng batas na nagkakaloob ng 100% foreign ownership, gaya ng telecommunications.

Ito’y sa kabila ng pangamba ng ilang mambabatas tulad ni Senador Ralph Recto na iginiit na dapat manatiling kontrolado ng mga pilipino sa halip na mga dayuhan, ang mga kritikal na imprastraktura, tulad ng mga telco.

Ayon kay DICT Acting Secretary Emmanuel “Manny” Caintic, wala naman silang nakikitang magiging problema sa foreign ownership ng mga telco dahil saklaw pa rin naman sila ng existing laws.

Titiyakin naman anya ng kagawaran na may regular na cybersecurity checks at susunod pa rin sa mga alituntunin ang mga telco companies.

Ang telecommunications at iba pang public services gaya ng railways, airlines, at logistical facilities ay classified bilang public utilities at sa ilalim ng 1987 Constitution, ang mga dayuhan ay maaari lamang mag-may-ari ng 40% ng public utilities.

Gayunman, sa ilalim ng inamyendahang Commonwealth Act 146 o Public Service Act na nilagdaan ni Pangulong Rodrigo Duterte, nagpapahintulot ito sa mga dayuhan na tuluyan o ganap na magmay-ari ng mga negosyo sa bansa, kabilang ang telecommunications, airlines at railways.