Drew Nacino

Pinirmahan na ni Pangulong Rodrigo Duterte ang Executive Order 165 na layuning i-update ang mga panuntunan hinggil non-mobile advertising signs and billboards.

Saklaw ng nilagdaang EO noong March 21 ang lahat ng “non-mobile advertising signs at billboards, kabilang ang support structures nito.

Nakasaad sa kautusan na ang unregulated advertising signs at billboards ay nagdudulot ng traffic distractions at panganib, banta sa public safety at nakapag-aambag sa environmental degradation bunsod ng kanilang hindi akmang lokasyon o sukat.

Sa ilalim ng EO, ang bagong itinayong billboard structures ay kailangang may limang metro na setback mula sa frontage property line habang kailangan ding pasado sa Philippine Electrical Code kung high tension wires ang gamit nito.

Ang mga electronic signs o led billboard display ay dapat base na rin sa EO 165 at mayroon lang na minimum display area na 55 square meters.

Samantala, makatutuwang ng local government unit sa pagpapatupad nito ang Department of the Interior and Local Government (DILG).

Nanindigan si COMELEC Commissioner George Garcia na walang sinuman sa kanilang mga empleyado ang sangkot sa umano’y security breach sa system ng kanilang technology provider na Smartmatic.

Ayon kay Garcia, empleyado ng Smartmatic at hindi ng COMELEC ang sinasabing sangkot sa umano’y security breach na ngayo’y nasa kustodiya na ng National Bureau of Investigation (NBI).

Para anya makapag-hack ay kailangang magmula ang hacker sa loob ng COMELEC kung nasaan ang kanilang system.

Sa kabila nito, inihayag ng poll official na hindi na-kompromiso ang data o sistema ng poll body habang hinihintay pa ang ulat ng NBI kaugnay sa issue.

Samantala, tiniyak naman ni Garcia na mailalabas sa publiko ang impormasyon sa lalong madaling panahon.

Mananatili sa kustodiya ng Department of Social Welfare and Development (DSWD) ang siyam na buwang gulang na sanggol na nasagip matapos “ipaampon” ng ina kapalit ng pera.

Ibinigay ng mga otoridad ang pangangalaga sa sanggol sa DSWD matapos mabawi ng National Bureau of Investigation (NBI) ang bata sa isang mag-asawa sa Sta. Cruz, Laguna.

Ayon kay Atty. Janet Francisco, hepe ng NBI–Anti Human Trafficking Division, bagaman nangako ang ina na hindi na uulitin, may posibilidad pa ring ulitin nito ang ginawa.

Ang DSWD na anya ang magdedesisyon hinggil sa pangangalaga sa bata.

Nalulong umano sa online talpak at nalubog sa utang ang ginang kaya ipinaampon ang anak sa halagang 45,000 pesos.

Naaresto naman ang magka-live in na sina Imelda Maligiran at Maxwell Brine, na isang Nigerian.

Ibinabala ng PHIVOLCS na ang paggalaw kamakailan ng Leyte Island fault line ay isang paalala sa publiko na maghanda sa mas malakas na pagyanig.

Ang nabanggit na fault line ay bahagi ng Philippine Fault Zone, isang pangunahing tectonic feature sa buong kapuluan na may habang 1,200 kilometers o mula hilagang-kanluran ng Luzon hanggang timog-silangan ng Mindanao.

Ayon kay PHIVOLCS Director Renato Solidum, inaasahan na ang magnitude 5.3 na lindol sa Burauen, Leyte noong Lunes, March 21 matapos ang naganap na lindol sa lalawigan noong 2017.

Hulyo a–6 noong 2017 nang tamaan ng magnitude 6.5 na lindol ang Ormoc City at bayan ng Kananga, Leyte kung saan apat ang nasawi at higit 100 ang nasaktan.

Noon pa anyang 2018 nagbabala na ang PHIVOLCS ng posibleng malakas na lindol sa Central Leyte lalo’t ang Philippine Fault sa lalawigan ay hindi kailanman umuga sa loob ng mahigit 100 taon.

Target ng Department of Finance (DOF) na hugutin sa mga Government-Owned and Controlled Corporations (GOCC) ang pondo para sa mas malaking cash aid na ipamamahagi sa mga mahirap na pamilya.

Ito ang inihayag ni Finance Secretary Carlos Dominguez makaraang ipag-utos ni Pangulong Rodrigo Duterte na itaas sa 500 mula sa 200 pesos ang ayuda para sa mga pamilyang apektado ng walang prenong oil price hike.

Magmumula anya ang additional funding sa Value-Added Tax collections at additional dividends mula sa mga GOCC.

Hindi pa idinetalye ng kalihim ang magiging kabuuang halaga ng ipamumudmod na ayuda at kung kailan ito magsisimula.

Nilinaw ni Acting Presidential Spokesman Martin Andanar na hindi otomatikong endorsement ni Pangulong Rodrigo Duterte ang pag-endorso ng PDP-Laban–Cusi Wing sa presidential bid ni dating senator Ferdinand “Bongbong” Marcos, Junior.

Ayon kay Andanar, ang naturang endorsement ay desisyon ng partido pero hindi malinaw na ito ang gusto ng punong ehekutibo.

Dapat anyang hintayin na lamang ang magiging pasya ng pangulo.

Si Pangulong Duterte ang chairman ng PDP-Laban faction na pinangungunahan ni Energy Secretary Alfonso Cusi.

Inilabas na ng Department of Budget and Management (DBM) ang 7 billion peso budget para sa pinalawak na Service Contracting Program (SCP) ng mga public utility vehicle driver na apektado ng lingguhang oil price hike.

Ayon sa DBM, layunin ng SCP na magkaloob ng cash subsidies sa mga apektadong PUV driver at tiyaking episyente at ligtas ang public transport services sa gitna ng health at economic crises.

Sa ilalim ng programa, tatanggap ng one-time payment na 4,000 pesos ang operators at drivers na lalahok sa Free Ridership Program ng gobyerno at weekly payment base sa kada kilometro ng kanilang ibinyahe bawat linggo, mayroon o walang pasahero.

Kokontratahin ang mga PUV operator sa pamamagitan ng kasunduan base sa planong inihanda ng Land Transportation Franchising and Regulatory Board (LTFRB).

Una nang inihayag ni LTFRB Executive Director Maria Kristina Cassion na palalawakin ang coverage ng SCP makaraang itaas sa 7 billion mula sa 3 billion pesos upang maisama ang mga jeep, UV express at iba pang transportation mode.

Napilitan na ang ilang magsasaka sa Bongabon, Nueva Ecija na itapon na lang ang aning sibuyas o hayaang mabulok dahil hindi nila maibenta bunsod ng napakababang presyo.

Batay sa price monitoring ng Department of Agriculture (DA), trenta pesos ang kada kilo ng farm gate price ng sibuyas at maaaring ibenta sa mga palengke ng 60 pesos kada kilo, gaya sa Balintawak Market.

Ayon kay Regional Executive Director Crispulo Bautista ng DA– Region 3, maaaring kumita ng 100,000 pesos ang mga magsasaka kahit na ibenta sa 30 pesos per kilo ang kanilang anisa isang hektaryang lupain.

Sa isang hektaryang lupain umano ay maaaring makaani ng 10,000 kilong sibuyas at papatak ang presyo nito na 300,000 pesos at ibabawas naman ang 200,000 pesos na gastos sa pagtatanim.

Gayunman, hindi umano lahat ng ani ay binibili ng traders at hindi rin madala ng mga magsasaka ang mga produkto sa ibang maaaring pagbentahan dahil sa mahal na transportasyon.

Samantala, nakikipag-ugnayan na ang DA sa ibang mga direct buyer upang matulungan ang mga magsisibuyas.

Aminado si Senate President Pro-Tempore Ralph Recto na mayroon siyang mga ikinababahala sa ipinasang batas ng kongreso na nag-aamyenda sa 85 taon ng Public Service Act.

Ito, ayon kay Senator Recto, ang rason bakit siya bumoto ng “No” sa naturang batas na nilagdaan na ni Pangulong Rodrigo Duterte noong Lunes.

Iginiit ng senador na dapat manatiling kontrolado ng mga pilipino sa halip na mga dayuhan, ang mga kritikal na imprastraktura, gaya ng telecommunications.

Gayunman, sa ilalim ng naturang batas ay papayagan ang full foreign ownership sa mga negosyo sa mga piling industriya, tulad ng mga telco, airlines at railways. —sa ulat ni Cely Ortgea-Bueno