Drew Nacino

Aabot na sa mahigit walo punto isang milyon ang nakatanggap ng Philippine Identification Cards o National ID sa buong bansa.

Inihayag ni Philippine Statistics Authority (PSA) Assistant Secretary Rosalinda Bautista ang nasabing bilang ay 24.2% ng nakatakdang delivery target ng PhilSys  ID ngayong taon na 33.8 million.

Katuwang ang Philippine Postal Corporation at Bangko Sentral ng Pilipinas, tiniyak ni Bautista na ginagawa nila ang kanilang makakaya upang i-accommodate ang milyun-milyong Filipino na nagparehistro sa PhilSys step 1 at 2.

Pina-alalahanan naman ng PSA ang mga registrantna nakatanggap ng ID at papel na naglalaman ng kanilang PhilSys number na iwasang i-post ito sa social media upang maprotektahan ang personal nilang impormasyon.

Samantala, hinikayat ang mga naghihintay ng kanilang PhilSys ID na itago ang transaction slip at maghanda ng valid ID na i-pepresenta sa Philippine Postal Corporation personnel na mag-dedeliver ng National ID.

Isang Overseas Filipino Worker (OFW) ang natagpuang patay sa Kuwait.

Kinumpirma ng Department of Foreign Affairs (DFA) na nadiskubre ang pinay sa kanyang kwarto sa Al – Salam area noong March 14.

Natuklasan ang bangkay ng OFW nang tumawag ng pulis ang mga kapit-bahay nito matapos mapansing maghapon siyang hindi lumabas ng bahay.

Batay sa paunang imbestigasyon, nag-suicide ang hindi pa pina-pangalanang pinay pero hinihintay pa ang resulta ng forensic examination.

Tiniyak naman ng DFA na mino-monitor na ng Philippine Embassy ang kaso.

Aminado ang Department of the Interior and Local Government (DILG) na masyado pang maaga upang sabihin kung palalawigin ang oras ng botohan sa Mayo a–9.

Ayon kay Interior Undersecretary Epimaco Densing, ang anumang extension sa botohan ay nakadepende sa Commission on Elections (COMELEC) at sitwasyon ng bansa sa gitna ng COVID-19 pandemic.

Kung magkakaroon anya ng pagtaas ng covid cases, maaaring magrekomenda ang IATF o DILG sa COMELEC na palawigin ang oras o araw ng pagboto.

Inihayag naman ni COMELEC Spokesman James Jimenez na maaaring palawigin ang voting hours kung mayroon pang mga tao sa loob ng polling precinct na hindi pa naka-boboto.

Nakatakdang buksan ang mga presinto eksakto ala sais ng umaga hanggang ala singko ng hapon.

Kinumpirma ng Department of Health (DOH) na nag-apply ito para sa emergency use authorization sa pagtuturok ng ika-apat na dose ng COVID-19 vaccine sa mga senior citizen at immunocompromised.

Ayon kay Health Undersecretary Maria Rosario Vergeire, nagsumite sila ng aplikasyon sa Food and Drug Administration (FDA) matapos ang rekomendasyon ng Vaccine Experts Panel (VEP).

Hinihintay pa anya nila ang desisyon ng FDA at matapos nito ay tatalakayin nila ang posibleng implementasyon.

Magugunitang inihayag ni VEP Member, Dr. Rontgene Solante na maaari lamang kailanganin ang fourth dose o second booster shot para sa mga nakatatanda at may sakit.

Nilinaw ng Department of Health (DOH) na wala silang nakitang pagtaas ng COVID-19 positivity rate.

Taliwas ito sa ulat ng OCTA Research Group na bahagyang tumaas ang positivity rate sa bansa.

Ayon kay Health Undersecretary Maria Rosario Vergeire, mino-monitor nila ang positivity rate at linggu-linggong sinusukat.

Hindi anya ito maaaring sukatin bawat araw dahil maraming factors ang maaaring makaapekto sa pag-compute ng daily positivity rate.

Idinagdag pa ni Vergeire na sa halip na pagtaas, pagbaba sa positivity rate ang nakikita ng DOH kung saan bumaba sa 2.7% mula sa 3.2% noong nakalipas na linggo.