Drew Nacino

Suportado pa rin ng Partido Reporma ang kandidatura ni Senate President Vicente Sotto, III sa pagka-bise presidente.

Ito ang nilinaw ni Partido Reporma President at Davao Del Norte 1^st District Rep. Pantaleon “Bebot” Alvarez matapos mag-ober-da-bakod kay Vice President Leni Robredo mula kay Senator Panfilo Lacson sa presidential race.

Ayon kay Alvarez, solido ang kanilang suporta para kay Sotto dahil sa kanilang iisang layunin at pagiging matagal nang magkaibigan at magka-brod sa Mason.

Asahan na anyang ilalarga ng partido ang Le-Ti o Leni-Tito na tambalan nina Robredo at Sotto.

Umaasa naman ang kongresista na magwawagi si Sotto sa vice presidential race kahit pumapangalawa lamang ito kay Davao City Mayor Sara Duterte–Carpio sa pre-election surveypara sa vice presidential bets.

Binawi na ni Partido Reporma president at dating house speaker Pantaleon “Bebot” Alvarez ang kanyang suporta kay presidential candidate at Senador Panfilo Lacson.

Sa halip ay susuportahan ng kinatawan ng unang distrito ng Davao Del Norte si Vice President Leni Robredo sa May 9 elections.

Aminado si Alvarez na kahit may mga nasabisiyang masama noon laban sa bise presidente, naniniwala siya sa kakayahan ni Robredo upang maging susunod na pangulo dahil bitbit nito ang tunay na adhikain para sa mga Pinoy.

Nagpasalamat naman si Robredo at nilinaw na wala siyang sama ng loob sa kongresistana dating kakampi ni Pangulong Rodrigo Duterte.

Bukas anya ang kanilang kampo sa suporta ng Partido Reporma lalo’t iisa lamang ang kanilang hangarin na ayusin ang bansa. —sa ulat ni Cely Ortega-Bueno (Patrol 19)

Rerebyuhin na ng Commission on Elections (COMELEC) ang kontrata sa Smartmatic matapos ang umano’y security breach sa system ng service provider para sa Halalan 2022.

Ayon kay COMELEC Chairman Saidamen Balt Pangarungan, inatasan na ng En Banc ang kanilang law division na magsagawa ng review at magrekomenda ng nararapat na aksyon alinsunod sa batas.

Ipinag-utos din ni Pangarungan sa poll body na makipag-ugnayan sa National Bureau of Investigation (NBI) at kumuha ng kopya ng ulat nito sa hinihinalang security breach sa Smartmatic System.

Hiningi rin ng poll chief sa Smartmatic ang report nito sa sariling imbestigasyon sa issue.

Inabisuhan naman ni Pangarungan ang Department of Information and Communications Technology (DICT) na magtakda ng detalyadong plano upang maiwasan ang security breach at iba pang problema.

Una nang inihayag ni Senate President Tito Sotto na isang Smartmatic employee ang sangkot sa umano’y security breach at kasalukuyan nang nasa kustodiya ng NBI.

Kumalas na rin sa pwesto ang ilan pang opisyal ng Partido Reporma at ilang cavite-based official matapos ang pagbibitiw ni Presidential Candidate at Senator Panfilo Lacson sa partido.

Kabilang sa mga tumiwalag si Dating Magdalo Rep. Ashley Acedillo, dating tagapagsalita ng partido pero kanyang nilinaw na susuportahan pa rin niya ang kandidatura ni Lacson at magsisilbi nitong spokesman.

Nagbitiw din ang chairman ng Cavite chapter ng partido na si Atty. Rafael Rodriguez at tulad ni Acedillo ay susuportahan pa rin ang presidential bid ng senador bilang kapwa niya Caviteño.

Kahapon ay inanunsyo ni Lacson ang kanyang pagkalas sa partido reporma at nagpasyang maging independent candidate na lamang makaraang suportahan ni Dating House Speaker Pantaleon Alvarez, pangulo ng partido, ang kandidatura ni Vice President Leni Robredo.

845 kandidato ang itinuturing ng Commission on Elections (COMELEC) na ‘unopposed candidates’ o mga kandidatong walang makakalaban.

Ayon sa COMELEC, ang kabuuang bilang ng posisyon ay 18,023 para sa lokal sa buong bansaang paglalabanan sa May 9 elections.

Nasa 253 ang paglalabanan sa posisyon sa Kamara De Representantes kung saan 39 na kandidato ang walang makakalaban.

Sa 81 tumatakbo sa pagka-gobernador, siyam ang walang makakaharap habang mula rin sa 81 kumakandidato, 11 sa pagka-bise gobernador ang walang kalaban.

Sa 782 posisyon sa miyembro ng sangguniang panlalawigan, 45 rito ay walang katunggali sa halalan.

1,634 sa pagka-alkalde at bise-alkalde ang maglalaban pero 203 sa mga mayoralty bet at 254 sa mga vice mayoralty bet ang walang makakaharap.

Samantala, sa 13,558 bakanteng puwesto sa city o municipal councilors, 284 ang walang kalaban sa darating na local elections.

Sa gitna ng umiinit na panahon at patuloy na pagbaba ng water level sa Angat Dam, Bulacan, hindi muna magbabawas ng alokasyon ng tubig ang National Water Resources Board (NWRB).

Ayon kay NWRB Executive Director Sevillo David, Jr., hindi pa rin nawawala ang COVID-19 at batid nilang kailangan ang sapat na suplay ng tubig sa mga kabayahan upang mabawasan ang banta ng sakit.

Hanggang kahapon ng ala sais ng umaga, bumaba pa sa 192.43 meters ang lebel ng tubig sa angat kumpara sa 192.78 noong Miyerkules, pero malayo pa rin ito sa high water level na 210 meters.

Ang critical level ng nabanggit na water reservoir ay 160 meters habang ang normal operating level nito ay hanggang 180 meters.

Sa Angat Dam nagmumula ang 90% water supply sa Metro Manila at mga karatig lugar at pinagkukunan ng tubig sa mga sakahan sa Pampanga at Bulacan.

Samantala, tiniyak ni David na gumagawa na sila ng mga hakbang upang matulungan ang mga magsasaka sa posibleng epekto ng patuloy na pagbaba ng tubig sa dam.

Apat hanggang anim na Business Process Outsourcing (BPO) companies ang handang talikuran ang fiscal incentives o tax perks mula sa gobyerno kapalit ang work-from-home (WFH) arrangement.

Inihayag ni Alliance of Call Center Workers (ACCW) Co-Convenor Lara Melencio na mas pipiliin ng mga naturang kumpanyana mawala ang kanilang insentibo sa buwis sa halip na pilitin ang kanilang mga empleyado na magbalik-opisina.

Ayon kay Melencio, kahit mawala ang tax perks ay matatamasa pa rin naman ng mga BPO employee ang kaparehong sweldo at insentibo.

Una nang ipinag-utos ng gobyerno sa mga kompanya, lalo sa mga BPO firm na ibalik na ang kanilang operasyon sa economic zones at information technology parks kung saan nakarehistro ang kanilang mga negosyo.

Ito’y bilang bahagi ng pagbangon ng ekonomiya ng bansa sa gitna ng COVID-19 pandemic.

Inilarga na ng Metropolitan Manila Development Authority (MMDA) ang dalawang-linggong dry run para sa pagbabalik ng mga provincial bus sa Edsa.

Ito’y makaraang mapaso na ang Inter-Agency Task Force (IATF) Resolution 101 hinggil sa uniform travel protocols kahapon.

Ayon kay MMDA Chairman Romando Artes, nagbigay na ng go-signal ang Department of Transportation (DOTr) at Land Transportation Franchising and Regulatory Board (LTFRB) para sa pagbabalik ng provincial buses sa Edsa.

Gayunman, simula alas-10 ng gabi hanggang ala-5 lamang ng madaling araw maaaring bumiyahe ang mga provincial bus sa naturang kalsada.

Kabilang anya sa preparasyon para sa “new normal” ang mga panukalang bagong traffic plans, gaya ng pagbabalik ng provincial buses sa Edsa, pagpapalawak ng number coding scheme at re-implementation ng Truck Ban Policy.