Drew Nacino

Inendorso na ni National Unity Party (NUP) President at Cavite 4^th District Rep. Elpidio Barzaga ang kandidatura sa pagka-pangulo ni Vice President Leni Robredo.

 Ito’y sa kabila ng suporta ng NUP Sa survey frontrunner na si presidential aspirant Ferdinand “Bongbong” Marcos Jr.

 Bukod kay Barzaga, suportado din ng asawa nitong si Dasmariñas City Mayor Jenny Barzaga ang pangalawang pangulo.

 Ayon sa kongresista, kung pagbabatayan ang track record, naniwala siyang si Robredo ang pinaka-kwalipikadong mahalal bilang susunod na pangulo.

 Samantala, nagpahayag din ng suporta si 3^rd District Rep. Alex Advincula ng Imus City kay Robredo.

 Ang Cavite ang ikalawang vote-rich province sa bansa na mayroong 2.3 million voters, kabilang ang Dasmariñas na mayroong 400,000 voters at Imus na mayroong 215,000 voters.

 Tinapos na ni Aksyon Demokratiko presidential candidate at Manila Mayor Francisko “Isko Moreno” Domagoso ang kanyang dalawang araw na paglilibot sa lalawigan ng Batangas.

 Ito’y sa gitna ng nag-a-alburotong bulkang Taal na maka-ilang beses sumabog habang nasa lalawigan ang team Isko.

 Isa pang grand rally para kay Domagoso ang inilunsad sa lungsod ng Sto. Tomas na dinaluhan ng mahigit 25,000 katao.

 Nitong Sabado naman isa pang motorcade ang isinagawa ng kampo ng alkalde sa mga bayan ng San Nicolas, Bauan at lungsod ng sto. Tomas bilang bahagi ng panliligaw ni Yorme sa boto ng mahigit isa punto pitong milyong Batangueño.

 Noon namang Biyernes ay nasa 65,000 katao ang dumalo at nagpahayag ng suporta sa standard bearer ng Aksyon Demokratiko kasabay ng Bagong Lipa Grand Proclamation Rally sa Lipa City.

 Sinupalpal ng kampo ni presidential aspirant Ferdinand “Bongbong” Marcos Jr. ang umano’y pahayag ng Aksyon Demokratiko sa issue ng sinasabing 203 billion peso tax liabilities ng pamilya Marcos.

 Ayon kay Atty. Vic Rodriguez, tagapagsalita ng dating senador, kasinungalingan lamang ang mga ipinupukol ng kampo ni Manila Mayor Isko Moreno at pawang pamumulitika lamang.

 Hindi naman anya nagkataon lamang na sabay-sabay nambabato ng mga issue ang mga karibal ni Marcos, lalo’t ilang linggo na lang ang nalalabi bago ang halalan.

 Iginiit ni Rodriguez na naka-tengga pa ang kaso sa korte at hindi pa na-i-se-settle ang ownership ng mga ari-arian.

Nalagasan pa ng ilang mahalagang opisyal ang Partido Reporma sa lalawigan ng Bohol makaraang manatili ang suporta ng mga ito sa ngayo’y Independent Presidential candidate na si Senador Panfilo Lacson.

 Ito’y bunsod ng paglipat ng suporta ng partido kay Vice President Leni Robredo, kamakailan.

 Kabilang sa mga kumalas sina Jagna Mayor Joseph Rañola at dating Provincial Police Chief Edgardo Ingking, na kapwa Co-Chairmen ng partido sa lalawigan.

 Nag-resign din sina Joseph Sevilla, Eduardo Aranay at Emmanuel Solomon Duites, coordinators para sa first, second at third districts.

 Pinili ng grupo nina Rañola na suportahan ang kandidatura ni Lacson dahil naniniwala silang kailangan ang mga leader na tulad ni Senator Ping na mayroong malinaw na “vision” para sa bansa at taumbayan.

 Marso 20 kwatro nang magbitiw si Lacson sa Partido Reporma matapos magpasya ang ilan sa mga opisyal nito na i-endorso si Robredo.

 Kasalukuyang naka-himpil sa Pilipinas ang isa sa pinaka-malaking nuclear – powered aircraft carrier ng US Navy.

Ito’y bilang bahagi ng ugnayan ng Amerika at Pilipinas maging ng iba pang kaalyado sa indo-pacific region at upang magsagawa ng serye ng military training exercises kasama ang Armed Forces of the Philippines (AFP).

Biyernes nang dumaong sa Lungsod ng Maynila ang Nimitz Class – Aircraft Carrier USS Abraham Lincoln, na mayroong 5,000 crew, kabilang ang nasa 300 Filipino-American Sailors.

Ang nasabing barkong pandigma ay bahagi ng carrier strike group 3 na nasa ilalim ng US Naval Pacific Fleet.

Ayon kay Rear Admiral Jeffrey Anderson, Commander ng Strike Group 3, hindi nagbabago ang kanilang “commitment” sa mga ka-alyado at ka-partner sa Indo-Pacific Region.

Wala pang detalyeng ibinibigay ang AFP Kung hanggang kailan mananatili sa bansa ang US warship.

Bahagyang bumaba sa 44,573 ang aktibong kaso ng COVID-19 sa bansa.

Sa datos ng Department of Health (DOH), umabot sa 442 additional COVID-19 cases ang naitala kahapon.

Dahil dito, sumampa na sa 3,675,821 ang kabuuang bilang ng kaso habang nasa 3,572,477 ang recoveries at nasa 58,771 ang death toll.

Ang datos ay nagmula sa COVID-19 tracker ng DOH website na ina-update kada linggo.

Ilalarga na ng Pinagkaisang Samahan ng mga Tsuper at Opereytor Nationwide (PISTON) ang kanilang transport strike sa Metro Manila kontra sa walang prenong oil price hike.

Muling nanawagan ang grupo sa gobyerno na suspendihin ang Fuel Excise Tax at ibasura na ang Oil Deregulation Law.

Sisimulan ng PISTON ang aktibidad mamayang alas dose ng tanghali hanggang alas dos ng hapon.

Ilulunsad ang rally sa ilang piling lugar gaya sa Litex Terminal, sa Commonwealth, Quezon City at Pedro Gil, Maynila.

Ito ang unang beses na maglulunsad ng strike ang PISTON ngayong taon.