Drew Nacino

Aabot na sa 9,000 residente ang nagsilikas makaraang muling sumabog ang Taal volcano sa Batangas.

 Kabilang sa mga lumikas ang nasa 1,000 residente sa mga high-risk barangay ng Banyaga at Bilibinwang sa bayan ng Agoncillo at mahigit walong libo sa Boso-Boso, Gulod at Bugaan East sa bayan ng Laurel.

 Ayon sa PHIVOLCS, maaaring na-expose ang mga residente sa posibleng “pyroclastic density currents” o mga natuyo at tumigas na lava pieces, volcanic ash at hot gases sakaling magkaroon ng mas malakas na pagsabog.

 Umapela naman si Agoncillo Mayor Daniel Reyes ng karagdagang tulong sa national government, kagaya ng food packs.

Umabot na sa mahigit 1,100 sibilyan ang nasawi sa nagpapatuloy na digmaan sa pagitan ng Ukraine at Russia.

Kinumpirma ng United Nations Human Rights Office na halos isanlibo walundaan naman ang nasugatan simula nang maglunsad ng pag-atake ang Russian Armed Forces.

Karamihan sa mga namatay at nasugatang sibilyan ay binagsakan ng mga bomba, missile o naipit sa barilan ng mga sundalong Ukrainian at Russo, partikular sa mga lungsod ng Mariupol at Kharkiv.

Gayunman, aminado ang naturang UN Body na maaaring mas mataas pa ang aktuwal na bilang lalo’t hindi pa kumpleto ang datos hinggil sa bilang ng casualties.

Samantala, tinatayang tatlo punto walong milyong katao na ang nagsilikas at tumawid sa mga karatig bansa simula pa noong Pebrero 24.

Namemeligrong matulad sa Korea o mahati sa dalawa ang Ukraine sa gitna ng nagpapatuloy na pag-atake ng Russia.

 Ito’y ayon kay Ukrainian Defence Intelligence Chief Kyrylo Budanov, ay dahil sa kabiguan ni Russian President Vladimir Putin na sakupin ang kabisera na Kyiv at pabagsakin ang gobyerno.

 Maaari anyang tangkain ni Putin na magtayo ng mga military boundary sa mga okupadong bahagi ng Ukraine, tulad ng demilitarized zone sa Korean Peninsula.

 Nasa giyera pa rin ang North at South Korea simula pa noong 1953 makaraang mauwi sa armistisyo ang korean war sa halip na peace treaty, kaya’t kapwa nagtayo ang dalawang bansa ng demilitarized zones.

Ikinalugod ng European Union (EU) Delegation ang suporta ng Pilipinas sa United Nations Resolution na naggigiit sa agarang pagpapatigil ng kaguluhan sa ukraine, partikular ang pag-atake sa mga sibilyan.

 Ang reaksyon ng EU ay bunsod ng inadopt na resolusyon ng UN General Assembly na nananawagan ng pansin upang tutukan ang humanitarian situation sa Ukraine.

 Binalangkas ito ng France at Mexico na inisponsoran ng mahigit siyamnapung bansa at inaprubahan ng isandaan apatnapung UN Member-Nations, kabilang ang Pilipinas.

 Tiniyak naman ng EU Delegation na tulad ng Pilipinas, magpapatuloy ang kanilang suporta sa mga mamamayan ng Ukraine.

Plano ng Commission on Elections (COMELEC) na paikliin ang proseso sa pagkuha ng gun ban exemptions para sa mga indibidwal na mga nakatatanggap ng banta, tulad ng mga miyembro ng hudikatura at iba.

 Ayon kay COMELEC Commissioner George Garcia, rerebisahin nila ang kasalukuyang polisiya sa gun ban exemption at security application guidelines upang mapadali ang proseso.

 Kabilang sa mga makikinabang sa “system overhaul” ang mga miyembro ng hudikatura, Prosecutorial Service, Public Attorney’s Office, government personnel na mayroong sensitibong mga tungkulin at COMELEC field personnel.

 Sasaklawin din ng recalibrated gun ban exemption policy ang mga negosyante, security agencies at indibidwal na may natatanggap na mga banta.

 Dahil anya sa bumubuting COVID-19 situation sa bansa at nalalapit na halalan sa Mayo a–nwebe, maaaring i-adopt ng poll body ang decentralization upang mapabilis ang proseso.

 Dedesisyunan na ng Department of Trade and Industry (DTI) sa loob ng dalawa hanggang tatlong linggo ang hiling ng mga manufacturer na magtaas ng presyo ng ilang basic goods.

 Bunsod ito ng walang prenong pagsirit ng presyo ng mga produktong petrolyo na pinalala ng digmaan sa pagitan ng Russia at Ukraine.

 Ayon kay Trade Secretary Ramon Lopez, hawak na nila ang request ng mga manufacturer para sa price increase ng 33 Basic Necessities and Prime Commodities (BNPC)

 Nagsasagawa na anya ang DTI Ng pag-aaral at konsultasyon sa stakeholders.

 Kabilang sa mga humihirit ng dagdag-presyo ang mga manufacturer ng de latang sardinas, de latang karne at gatas.

 Ipinunto naman ni Lopez na hindi maaaring i–adjust ang suggested retail prices ng mga BNPC Nang walang approval ng kagawaran.

 Sa harap ng napipintong panibagong oil price increase bukas, ilan pang Public Utility Vehicle (PUV) Drivers ang hindi pa rin nakatatanggap ng fuel subsidy.

 Ibinunyag ng Alliance of Transport Operators and Drivers Association of the Philippines (ALTODAP) na nakatanggap sila ng mga ulat na hindi pa ibinibigay ng ilang operator ang fuel subsidies sa mga tsuper.

 Ayon kay ALTODAP National President Boy Vargas, maaaring winithdraw na ng ilang operator ang cash na hindi naman binigay sa mga jeepney driver.

 Una nang inihayag ng Land Transportation Franchising anD Regulatory Board (LTFRB) na aabot sa 703 million pesos na halaga ng fuel subsidies ang ini-release para sa mahigit isandaanlibong benepisyaryo.

 Nasa 6,500 pesos ang halaga ng subsidy sa bawat tsuper bilang unang bahagi ng pantawid pasada program upang maibsan ang epekto ng mataas na presyo ng krudo.

Lumilitaw na ang senyales na i-e-endorso ni Pangulong Rodrigo Duterte ang presidential bid ni dating senador Ferdinand “Bongbong” Marcos Jr.

 Ito ang inihayag ni Davao City Vice Mayor Sebastian “Baste” Duterte kahit wala pang napupusuan ang kanyang ama sa kabila ng pakikipag-pulong nito kay Marcos kamakailan.

 Ayon sa nakababatang Duterte, ang endorsement ng PDP-Laban ay isa sa mga malinaw na senyales at umaasa siyang susunod na magpapahayag ng suporta ang pangulo, na chairman ng partido.

 Aminado naman ang bise alkalde na kung siya ang tatangungin, mas nais niyang i-endorso ni Pangulong Duterte si BBM Dahil sa pangunguna nito sa mga voter preference survey, lalo sa Davao City.

Naitala ng Pilipinas ang pinaka-mababang COVID-19 cases ngayong taon.

 Sa datos ng Department of Health (DOH), umabot lamang sa 330 additional COVID-19 cases ang naitala kahapon, kabilang ang 84 cases mula Metro Manila.

 Sumampa naman sa 3,676,991 ang total cases, kabilang ang 42,835 na aktibong kaso.

 Samantala, umabot na sa 59,015 ang total death toll kabilang ang 131 na additional deaths, kahapon.