Drew Nacino

Umakyat pa sa 2,323 ang aktibong kaso ng COVID-19 sa bansa kahapon kumpara sa 2,257 noong Miyerkules.

Ito’y makaraang makapagtala ang Department of Health ng karagdagang 199 COVID cases kahapon.

Dahil dito, sumampa na sa 3,689,656 ang kabuuang kaso kabilang ang 3,626,878 ang recoveries.

Nangunguna pa rin ang National Capital Region sa may pinaka-mataas na COVID-19 cases sa 995 sa nakalipas na dalawang linggo.

Sinundan naman ito ng Region 4-A na mayroong 349 at Region 3, na may 274.

Isang araw matapos iproklama bilang nanalong  presidential candidate sa May 9 Elections, inilabas na ni Incoming President Ferdinand “Bongbong” Marcos Jr. ang partial list ng kanyang economic team.

Kabilang sa nadagdag sina Bangko Sentral ng Pilipinas (BSP) Governor Benjamin Diokno na itinalagang Finance Secretary at dating University the Philippines President Alfred Pascual bilang Trade and Industry Secretary.

Una nang napili ni Marcos si dating Philippine Socioeconomic Planning Secretary Arsenio Balisacan na pamunuan muli ang National Economic and Development Authority.

Itatalaga rin ni BBM si SMC Tollways President and Chief Executive Officer Manuel “Manny” Bonoan bilang Public Works and Highways Secretary.

Tiwala si Marcos na sina Diokno, Pascual at Balisacan ang pinaka-mainam na mga italaga bilang economic managers ng bansa lalo’t mahalaga ang economic team sa pagbangon muli ng bansa mula sa epekto ng COVID-19 pandemic.

Prayoridad anya ng kanyang administrasyon ang ekonomiya kaya’t pinili niya nang maigi ang mga itinalagang economic manager.

Karagdagang 333 distressed Overseas Filipinos ang dumating mula Kuwait.

Ini-repatriate ang mga nasabing Pinoy sa pamamagitan ng chartered flight ng Department of Foreign Affairs (DFA).

Kabilang sa mga dumating ay apat na sanggol at dalawang medical repatriates, maging ang mga manggagawang inabuso ng mga kanilang mga employer.

Ito, ayon kay DFA Undersecretary for Migrant Workers’ Affairs Sarah Lou Arriola, ang ikalimang repatriation flight ng DFA mula Kuwait.

Patuloy anya ang pakikipag-ugnayan ng kagawaran sa mga foreign service post sa iba’t-ibang panig ng mundo at nakahandang sumaklolo sa lahat ng distressed OFW.

Kinastigo ni Migrant Workers Secretary Abdullah Mama-O si Labor Secretary Silvestre Bello, III sa pagharang nito sa kautusan na nag-re-assign sa mga opisyal at empleyado ng Philippine Overseas Employment Administration (POEA).

Sa liham na ipinadala sa tanggapan ni Bello, iginiit ni Mama-O na walang “pakialam” ang kapwa kalihim sa re-assignment at designation ng 16 na POEA Officials, na karamihan ay division chiefs at directors sa mga bagong tungkulin.

Ayon kay Mama-O, walang ligal na batayan si Bello upang sabihing hindi pa umiiral ang Department of Migrant Workers.

Wala rin anyang pakialam ang labor secretary sa sinuman at lahat ng opisyal at personnel ng POEA.

Sa memorandum ni Bello kay POEA Administrator Bernard Olalia noong May 23, hindi maaaring ipag-utos ni Mama-O ang re-assignment ng sinumang opisyal at empleyado ng POEA dahil nasa ilalim pa rin ito ng DOLE at wala pang implementing rules and regulations ang DMW.

Disyembre lamang noong isang taon nang lagdaan ni Pangulong Rodrigo Duterte ang batas na nagtatag sa  DMW.

Tiniyak ni incoming President Bongbong Marcos Jr, na ipagtatanggol ng kanyang administrasyon ang soberanya ng Pilipinas sa pamamagitan ng pakikipag-usap sa China nang may paninindigan.

 Sa kanyang kauna-unahang press briefing matapos iproklama bilang presidente, inihayag ni Marcos na sagrado ang soberanya ng bansa at hindi ito dapat i-kompromiso anuman ang mangyari.

 Sa usapin naman ng West Philippine Sea (WPS), iginiit ni BBM na sa ilalim ng kanyang administrasyon ay walang kahit isang bahagi ng teritoryo ng naturang karagatan ang ma-aangkin o masasagasaan, lalo ng ibang claimants.

 Samantala, binigyang-diin ni Marcos na hindi kailanman makikipag-giyera ang Pilipinas sa Tsina para lamang igiit ang karapatan sa WPS.

 Magsasagawa ng “Motu Proprio Investigation” ang Commission on Human Rights (CHR) sa Region 2 sa diumano’y panghahalay at pagpatay sa sampung taong gulang na babae sa Santiago City, Isabela.

 Natagpuan ang bangkay ng bata noong Miyerkules sa Mabiret River, Purok 4 sa Barangay Balluarte.

 Ayon kay CHR Spokesperson Jacqueline Ann de Guia, nakababahala ang ganitong mga krimen, lalo’t may kahalintulad din itong insidente sa Batangas kung saan limang taong gulang naman ang biktima.

 Kinudena naman ng komisyon ang karumal-dumal na krimen at iba pang uri ng karahasan sa kabataan, partikular sa mga menor de edad.

 Samantala, nakiramay din si de Guia at buong CHR sa mga naulilang pamilya at mahal sa buhay ng dalawang paslit.

Dalawa hanggang tatlong trabaho ang kailangan ng mga Filipino upang maka-alpas sa tanikala ng kahirapan.

Ito, ayon kay Commission on Population and Development Executive Director Juan Antonio Perez, III, ang mga dapat ikunsidera ng susunod na administrasyon sa pagkakaloob ng living wage upang mapigilan ang tumataas na poverty incidence sa bansa.

Ipinapanukala anya nila sa POPCOM Board na pag-aralan ang posibilidad na magkaroon ng living wage sa halip na minimum wage na hindi makasabay sa tumataas na cost of living.

Una nang itinakda ng Philippine Statistics Authority (PSA) sa 12,000 pesos kada buwan ang poverty threshold kahit ang minimum wage sa karamihan ng rehiyon ay mababa pa sa poverty threshold.

Ipinunto ni Perez na kung sa NCR nakatira ang isang pamilya na may dalawang anak, dapat ay kapwa may trabaho ang mga magulang.

Gayunman, sa labas ng NCR, gaya sa Southern Luzon, Visayas at Mindanao, kailangan ng tatlong trabaho batay sa minimum wage.

Ipauubaya na ng palasyo sa susunod na administrasyon at economic team ni President-elect Bongbong Marcos Jr. ang pagpapataw ng bagong buwis.

 Magugunitang isinulong ng Department of Finance (DOF) ang nasabing hakbang kung saan nais ipagpaliban ang mga personal income tax reductions at ipinatatanggal ang ilang tax exemptions upang makalikom ng pondo upang makabayad ang gobyerno sa utang ng bansa.

 Ayon kay acting presidential spokesman at Communications Secretary Martin Andanar, nasabing mungkahi ni Finance Secretary Carlos Dominguez III ay dapat pagpasyahan ng susunod na administrasyon.

 Layunin ng plano na matiyak na epektibong matutugunan ang kakulangan sa budget habang pinopondohana ang mga imprastruktura, edukasyon, healthcare at ekonomiya.

 Samantala, pag-aaralan ni outgoing Bangko Sentral ng Pilipinas (BSP) Governor at incoming Finance Secretary Banjamin Diokno ang mga bagong panukala sa pagpapatupad ng mga bagong buwis.