Drew Nacino

Umakyat sa 1,317 ang naitalang COVID-19 cases sa bansa simula Mayo a – 23 hanggang a – 29.

Kumpara ito sa 1,214 cases simula Mayo a – 16 hanggang a – 22.

Ayon sa Department of Health, ang May 23 hanggang 29 cases ay 8.8% na mataas kumpara sa naunang linggo.

Batay pa sa weekly case bulletin ng DOH, nasa 188 na ang daily case average ng COVID-19 sa bansa kumpara sa 173 kada araw na naitala noong May 16 hanggang 22.

Nakapagtala rin ang DOH ng 12 bagong severe at critical cases ng sakit subalit walang nadagdag sa bilang ng nasawi noong nakaraang linggo.

Kahapon ay umabot sa 197 ang additional COVID-19 infections kaya’t umakyat na sa 2,448 ang aktibong kaso.

Nagsimula na umanong mag-impake ng personal na gamit si Pangulong Rodrigo Duterte sa Malakanyang bilang preparasyon sa pagbabalik sa Davao City.

Ito’y sa gitna nang napapalapit na pagtatapos ng termino ng pangulo sa Hunyo 30.

Ayon kay Senador Christopher “Bong” Go, nagsisimula nangmagligpit ng mga gamit si Pangulong Duterte upang dalhin pauwi sa kanilang bahay sa naturang lungsod.

Doon na anya mananatili ang punong ehekutibo sa kanyang retirement bilang private citizen kapiling ang kanyang pamilya sa oras na matapos ang termino sa Hunyo 30.

Bagaman aminado ang senador na nakalulungkot na patapos na ang termino ng pangulo, masaya na rin ang siya dahil makapagpapahinga na rin ito matapos ang halos anim na taon sa panunungkulan.

Nito lamang Sabado ay namataan sina Pangulong Duterte at Senator Go na nagmo-motorsiklo at nag-ikot sa Davao.

Pinaiimbestigahan na ni Senator Francis Tolentino sa Senado ang malaki umanong pagkalugi ng Social Security System (SSS).

Sa kanyang inihaing Senate Resolution 1006, tinukoy ni Tolentino ang 2021 Unaudited Financial Statement ng SSS kung saan nakasaad na aabot sa 843.9 billion pesos ang kanilang lugi.

Batay naman sa resolusyon ng SSS, aminado itong isa sa mga dahilan ang pagkakaroon umano ng pagbabago sa panuntunan ng accounting ng Philippines Financial Reporting Standard.

Ikinonsidera rito ang mga basic payment na babayaran ng ahensya sa hinaharap.

Sa kabila nito, tiniyak ng SSS na secured ang kanilang cash loan at matutugunan ang pangangailangan ng mga miyembro.

Samantala, iginiit ng senador na kahit sapat ang paliwanag hinggil sa pagkalugi ay kailangan pa rin itong mabusisi at mabatid ang epekto nito sa pinansyal na kakayanan ng SSS na bayaran ang benepisyo ng mga miyembro.

Idineklara nang COVID-19 free ang Tuguegarao City, Cagayan makaraang walang maitalang bagong kaso ng virus ang City Health Office sa nakalipas na mga ilang araw.

Ayon sa City Health Office, nasa 18,750 ang kumpirmadong COVID-19 cases kabilang ang 606 deaths at 18,144 recoveries simula noong 2020.

Sa kabila nito, hinikayat ni Tuguegarao City Health Officer James Guzman ang mga residente na sumunod pa rin sa minimum health protocols lalo’t nananatili sa alert level 1 ang lungsod hanggang bukas, May 31.

Nagpapatuloy din anya ang pagbabakuna laban sa COVID-19 sa Tuguegarao.

Umaasa si Defense Secretary Delfin Lorenzana na ipagpapatuloy ng susunod na administrasyon, partikular ng hahalili sa kanya, ang mga proyektong sinimulan ng Duterte administration.

Kabilang sa tinukoy ni Lorenzana ang pagtiyak sa seguridad ng bansa, gaya ng pagtugis sa mga miyembro ng Communist Party of the Philippines (CPP), New People’s Army (NPA) at mga terorista sa Mindanao.

Inaasahan din ng outgoing DND Secretary na magpapatuloy ang AFP Modernization Program sa ilalim ng administrasyon ni incoming president Bongbong Marcos.

Ito, anya, ay upang mapangalagaan ang maritime domain at yung sovereign rights ng Pilipinas sa gitna ng territorial dispute sa West Philippine Sea.

Hanggang ngayon ay hindi papinapangalana ni Marcos ang kanyang susunod na kalihim ng kagawaran ng tanggulang pambansa.

Bahagyang tumaas ang COVID-19 admissions sa mga pribadong ospital.

Gayunman, nilinaw ng Private Hospital Association of the Philippines Incorporated (PHAPI) na nananatiling “manageable” ang hospitalization utilization rate sa kabila ng local transmission ng Omicron subvariant.

Ayon kay PHAPI President Dr. Jose Rene De Grano, hindi pa naman dapat ikabahala ang bahagyang pagtaas ng hospital admission dahil karamihan sa mga symptomatic patient ay hindi severe o critical.

Mayo 17 nang kumpirmahin ng Department of Health (DOH) naka-detect ito ng local transmission ng mas nakahahawang Omicron subvariant BA.2.12.1 sa bansa.

Iniulat din ng DOH tumaas sa 1.25 ang COVID-19 reproduction rate sa Metro Manila noong may 23 kumpara sa 1.05 noong May 13 hanggang 19.