Kinumpirma ng Department of Education (Deped) na ang sanhi ng pagkamatay ng isang Grade 4 student sa Cavite matapos painumin ng pampurga sa kanilang paaralan ay dulot ng impeksyon na humantong sa septic shock.
Ayon sa DepEd, nasawi ang estudyante noong July 3, isang araw matapos magsagawa ang Hugo Perez Elementary School-Annex sa Trece Martires City, Cavite ng isang regular deworming activity sa pakikipagtulungan ng City Health Office.
Batay rin sa inisyal na imbestigasyon, ilang mga mag-aaral pa ang nagkasakit pagkatapos ng nasabing aktibidad, kabilang ang estudyanteng namatay matapos maospital dahil sa pagsusuka.
Kasunod ng insidente, sinabi ng DepEd na sinusuri na nito ang health and safety protocols habang iniimbestigahan ng otoridad ang mga pangyayari hinggil sa insidente.
Magbibigay din ang ahensya ng kinakailangang emotional, psychological, at logistical support sa pamilya ng mag-aaral, at iginiit na ang kaligtasan at kapakanan ng mga estudyante ang nananatiling pangunahing prayoridad ng kagawaran.
