Drew Nacino

Isa pang hinihinalang miyembro ng Daulah Islamiyah-Turaife group ang patay sa nagpapatuloy na operasyon ng militar sa bayan ng Datu Salibo, Maguindanao.

 Kinilala ng Philippine Army-6th Infantry Division ang nasawing si Abdul Patir, na miyembro umano ng Bangsamoro Islamic Freedom Fighters-Karialan Faction (BIFF).

 Lunes nang mapatay naman sa airstrike ang isa pa umanong BIFF member na si Sadam Salandang alyas Sadam sa sitio patawali, Barangay Ganta.

 Nasa 17 pang bandido kabilang ang pinuno nilang si Abu Turaife ang sugatan sa operasyon.

 Samantala, nagsilikas na ang mga residente sa naturang lugar at pansamantalang tumutuloy sa daycare centers sa kanilang mga barangay.

Kinausap na ni President-elect Ferdinand “Bongbong” Marcos Jr. sina House Deputy Speaker Rodante Marcoleta at retired U.P. Professor Clarita Carlos hinggil sa kanilang potential appointments sa ilalim ng kanyang administrayson.

 Ayon kay Marcos, hinihintay pa niya ang tugon nina Marcoleta at Carlos kung ano ang magiging papel na nais ng mga itong gawin sa gobyerno.

 Malaking tulong anya ang tulong sa pamahalaan ng “legal prowess” ni Marcoleta, na kinatawan ng Sagip Party-List at tumakbong senador sa ilalim ng Marcos ticket sa 2022 elections pero umatras.

 Aminado naman ang susunod na pangulo na makatutulong si Carlos sa kanyang administrasyon sa pamamagitan ng kaalaman sa foreign policy at international politics.

 Hindi malayong amyendahan ng susunod na administrasyon ni incoming President Bongbong Marcos Jr. ang Electric Power Industry Reform Act (EPIRA) upang mapababa ang presyo ng kuryente.

 Ayon kay Marcos, dapat maging mahigpit sa pagpapatupad ng EPIRA pero dapat ding silipin ang posibilidad na amyendahan ito lalo’t may ilang probisyon sa nasabing batas ang “outdated” na.

 Gayunman, hindi tinukoy ng susunod na pangulo kung anong probisyon ng EPIRA ang nais nitong amiyendahan.

 Taong 2001 nang pagtibayin sa ilalim ng Arroyo administration ang naturang batas, na layuning tiyakin ang maaasahan at murang kuryente.

 Samantala, bumuo na si Marcos ng grupong titingin kung anong items sa electricity bills ang maaaring ibaba para maibsan ang pasanin ng mga consumers.

Aminado si President-elect Ferdinand “Bongbong” Marcos Jr. na mayroon siyang reservations hinggil sa ratipikasyon ng Mega Trade Deal Regional Comprehensive Economic Partnership (RCEP), kung saan ang Pilipinas ang signatory.

 Inihayag ni Marcos na nais niyang makita kung paano at ano ang magiging epekto ng RCEP sa agriculture sector ng bansa.

 Dapat anyang talakayin muna na hindi malulugi ang ating agri- sector sa sandaling ratipikahan ito at dapat handa na ang sistema pagdating sa kompetisyon.

 Ang RCEP, ay isang trade agreement sa pagitan ng sampung miyembro ng ASEAN kasama ang China, India, Japan, South Korea, Australia at New Zealand, na inaprubahan ng malakanyang noong Setyembre at isinumite sa senado upang sang-ayunan.

Naglabas na ng suspension order ang Department of Environment and Natural Resources (DENR) ang Mineral Production Sharing Agreements (MPSA) Na ipinagkaloob sa tatlong mining companies sa Masungi Georeserve sa bayan ng Baras, Rizal.

 Ito’y sa gitna ng mga pagtutol ng mga residente at environmental group sa mining operation sa nasabing lugar.

 Tinukoy ni DENR acting Secretary Jim Sampula ang mga sinuspindeng MPSA ay ibinigay sa rapid city realty and Development Corporation, Quimson Limestone Incorporated at Quarry Rock Group na pawang non-operational simula 2004.

 Tinanggal na rin anya ang otorisasyon ng kumpanya na mag- operate upang mawala ang agam-agam at pangamba ng mga residente.

Pinapurihan ng grupong Alyansa Tigil Mina (ATM) ang desisyon ng Marinduque Regional Trial Court Branch 38 na pumabor sa 30 nagsasakdal laban sa Marcopper Mining Corporation.

 Kaugnay ito sa naganap na mine spill noong 1993 na nag-iwan ng malaking pinsala sa kapaligiran, komunidad at itinuring bilang pinakamalubhang mining disaster sa bansa.

 Ayon sa ATM, makalipas ang dalawang dekadang paghihintay ay natanggap na rin ng mga biktima ang katarungang matagal na nilang inaasam.

 Ang desisyon anya ng korte ay isang magandang hudyat para sa iba pang komunidad na labis na naapektuhan ng mining.

Matapos ang dalawang dekada, ipinag-utos na ng Marinduque Regional Trial Court (RTC) Branch 38 sa Marcopper Mining Corporation ang pagbabayad ng danyos perwisyo sa mga residenteng naapektuhan ng mine spill noong 1993.

 Sa May 16, 2022 decision ni RTC Branch 38 Judge Emmanuel Recalde, inatasan ang Marcopper na bayaran ang 30 plaintiffs o nagsasakdal ng tig-200,000 peso temperate damages at 100,000 peso moral damages.

 Ang temperate damages ay para sa mga ari-arian, pananim at mga livestock na nawala sa bawat nagsasakdal habang ang moral damages ay para sa physical at mental suffering ng mga plaintiff dahil sa kawalan ng kabuhayan at peligrong hatid ng Maguila-guila dam.

Pinagbabayad din ng korte ang kumpanya ng karagdagang isang milyong piso bilang exemplary damages sa mga nagsakdal.

 Disyembre a – sais, 1993 nasira ang bahagi ng Maguila-guila dam na pagmamay-ari ng Marcopper na nagdulot ng pagbaha ng nakalalasong kemikal sa Mogpog River, na kalauna’y idineklarang “biologically dead” dahil sa epekto ng mining waste.

 Ang nabanggit na ilog din ang pangunahing pinagkukunan ng ikabubuhay ng mga taga-Mogpog.

Bumisita si Pangulong Rodrigo Duterte sa huling lamay ng yumaong Queen of Philippine Movies at aktres na si Susan Roces.

Kasamang nagtungo ng pangulo sa Heritage Park, Taguig City si Senator Bong Go.

Sinalubong naman si Pangulong Duterte at Go ng anak ni Roces na si Senator Grace Poe.

Mayo a – bente nang pumanaw si Roces o Jesusa Purificacion Levy Sonora-Poe dahil sa cardiopulmonary arrest o atake sa puso, sa edad na 80.

Nakatakda namang ihimlay ang aktres sa tabi ng puntod ng kanyang asawang si “The King” Fernando Poe Jr., sa Manila North Cemetery, mamayang alas otso ng umaga.